ສປປ ລາວ ສ້າງຕັ້ງສາຍພົວພັນການທູດ ກັບ ໂບລິວີ

ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ໂບລິວີ, ເມື່ອບໍ່ດົນມານີ້ທີ່ ນະຄອນນິວຢອກສ ອາເມຣິກາ, ໄດ້ມີພິທີລົງນາມ ໃນຖະແຫຼງການຮ່ວມວ່າດ້ວຍການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ໂບລິວີ, ໂດຍຕາງໜ້າໃຫ້ລັດຖະບານແຫ່ງ ສປປ ລາວ ແມ່ນ ທ່ານ ອານຸພາບ ວົງໜໍ່ແກ້ວເອກອັກຄະລັດຖະທູດວິສາມັນຜູ້ມີອຳນາດເຕັມຜູ້ຕາງໜ້າຖາວອນແຫ່ງ ສປປ ລາວ ປະຈໍາອົງການ ສະຫະປະຊາຊາດ ແລະ ຕາງໜ້າໃຫ້ລັດຖະບານແຫ່ງ ໂບລິວີ ແມ່ນທ່ານ ດິເອໂກ ປາຣີ ໂຣດີຣເກສ (Mr. Diego Pary Rodríguez) ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນແຫ່ງ ໂບລິວີ ປະຈໍາອົງການສະຫະປະຊາຊາດ ໂດຍມີບັນດານັກການທູດຂອງທັງສອງຝ່າຍ ເຂົ້າຮ່ວມເປັນສັກຂີພິຍານ.

ສາທາລະນະລັດ ໂບລິວີ ຕັ້ງຢູ່ພາກກາງຕອນໃຕ້ ຂອງ ທະວີບ ອາເມຣິກາ, ມີຊາຍແດນຕິດກັບ 5 ປະເທດ ຄື: ບຣາຊິນ, ເປຣູ, ປຣາໄກວ, ຈິເລ, ອາກຊັງຕິນ;ມີເນື້ອທີ່ທັງໝົດ 1,098,581 ກິໂລຕາແມັດ. ໂບລິວີ ມີປະຊາກອນ ປະມານ 12,186,079 ຄົນ (2023) ແລະ ນະຄອນຫຼວງຊື່ວ່າ ລາປາສ (La Paz). ປະຊາຊົນ ໂບລິວີ ນໍາໃຊ້ພາສາແອສປາຍ ແລະ ນັບຖືສາສະໜາ ໂຣມັນ ກາໂຕລິກ ແລະ ໂປເຕສຕັງ ເປັນສ່ວນໃຫຍ່. ໂບລິວີ ໄດ້ຮັບເອກະລາດ ຈາກ ແອສປາຍ ໃນວັນມີ 6 ສິງຫາ 1825 ແລະ ລະບົບການເມືອງ ແມ່ນມີປະທານາທິບໍດີ ດຳລົງຕໍາແໜ່ງເປັນທັງ ປະມຸກລັດ ແລະ ຫົວໜ້າລັດຖະບານ. ທ່າແຮງດ້ານເສດຖະກິດ ແມ່ນອີງໃສ່ດ້ານກະສິກຳ-ປ່າໄມ້, ການປະມົງ, ບໍ່ແຮ່ແລະ ການຜະລິດສິນຄ້າ ເຊັ່ນ: ແຜ່ນແພ, ເຄື່ອງນຸ່ງຫົ່ມ, ແຮ່ໂລຫະແລະ ນໍ້າມັນ. ໂບລິວີ ມີຄວາມຮັ່ງມີດ້ານຊັບພະຍາກອນແຮ່ທາດແລະ ອາຍແກັສທໍາມະຊາດ ທີ່ເປັນຄັງສໍາຮອງໃຫຍ່ທີ່ສຸດເປັນອັນດັບສອງ ໃນພາກພື້ນອາເມຣິກາໃຕ້. ໂບລິວີ ມີສາຍພົວພັນການທູດກັບ 140 ປະເທດໃນໂລກ ແລະ ເຂົ້າເປັນສະມາຊິກຂອງອົງການ ສປຊ ໃນວັນທີ 14 ພະຈິກ 1945,ເປັນສະມາຊິກກຸ່ມປະເທດ ອາເມຣິກາລາຕິນ ແລະ ກາຣີບຽນ,ກຸ່ມ 77 ແລະ ຈີນ, ກຸ່ມປະເທດທີ່ບໍ່ມີຊາຍແດນຕິດກັບທະເລ (LLDCs), ຂະບວນການບໍ່ຮ່ວມກຸ່ມ (NAM)ລວມທັງ ເຄີຍເຮັດໜ້າທີ່ເປັນສະມາຊິກໃນຫຼາຍອົງກອນສໍາຄັນຂອງ ສປຊ.

ໃນໂອກາດນີ້, ເອກອັກຄະລັດຖະທູດ ທັງສອງຝ່າຍ ໄດ້ຕີລາຄາສູງຕໍ່ການພົວພັນ ແລະ ຮ່ວມມືໃນເວທີຕ່າງໆ ຂອງ ອົງການ ສປຊ, ພ້ອມທັງໄດ້ຢືນຢັນຄືນເຈດຕະນາລົມ ເພື່ອສືບຕໍ່ຄວາມພະຍາຍາມຮ່ວມກັນ ໃນການຂະຫຍາຍການພົວພັນ ແລະ ຮ່ວມມືໃນດ້ານຕ່າງໆໃນຕໍ່ໜ້າ, ລວມທັງ ການສະໜັບສະໜູນຊຶ່ງກັນ ແລະ ກັນ ໃນເວທີສາກົນໂດຍສະເພາະໃນກຸ່ມປະເທດທີ່ ສປປ ລາວ ແລະ ໂບລິວີ ເປັນສະມາຊິກນໍາກັນ. ການສ້າງຕັ້ງສາຍພົວພັນການທູດຮ່ວມກັບ ສາທາລະນະລັດ ໂບລິວີ ໃນຄັ້ງນີ້ ເປັນການສືບຕໍ່ປະກອບສ່ວນໃຫ້ແກ່ການຈັດຕັ້ງປະຕິບັດແນວທາງການຕ່າງປະເທດ “ສັນຕິພາບ, ເອກະລາດ, ມິດຕະພາບ ແລະ ການຮ່ວມມື” ອັນສະເໝີຕົ້ນສະເໝີປາຍ ຂອງ ສປປ ລາວ ແລະ ເຮັດໃຫ້ ສາທາລະນະລັດ ປະຊາທິປະໄຕ ປະຊາຊົນລາວ ມີສາຍພົວພັນການທູດ ຮ່ວມກັບ 151ປະເທດ ໃນທົ່ວໂລກ.(ຂ່າວ-ພາບ: ກຕທ)