ສະມາຄົມນັກຂ່າວແຫ່ງ ສປປ ລາວ ແລະ ອົງການແຄຣ໌ ນາໆຊາດປະຈຳ ລາວ ພາຍໃຕ້ໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມ ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວ ໃນ ສປປ ລາວ ຫຼື ເອີ້ນຊື່ຫຍໍ້ວ່າແກມຊິວ (GAMCIL) ໄດ້ຈັດຊຸດອົບຮົມການລາຍງານຂ່າວບັນຫາສີຂຽວ ໃຫ້ນັກຂ່າວ 6 ແຂວງພາກກາງ ແລະ ພາກໃຕ້ ໃນວັນທີ 21-30 ເມສາຜ່ານມາ ທີ່ແຂວງຈໍາປາສັກ.
ຊຸດອົບຮົມຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ຄວາມປອດໄພ ໃນການໃຊ້ສື່ສັງຄົມອອນລາຍ; ການພັດທະນາສີຂຽວ, ບັນຫາສິ່ງແວດລ້ອມ ແລະ ການນໍາໃຊ້ປັັນຍາປະດິດ ຫຼື (AI) ເຂົ້າຊ່ວຍວຽກງານສື່; ບົດບາດ ແລະ ຄວາມສະເໝີພາບຍິງ-ຊາຍ, ຈັນຍາບັນຂອງນັກຂ່າວ,ການຖ່າຍ-ຕັດຕໍ່ວິດີໂອ ແລະ ຮູບພາບຂ່າວ ໂດຍການນໍາໃຊ້ໂປຣແກຣມແຄນວາ (Canva) ແລະ ໂປຣແກຣມແຄັບຂັດ (CapCut).
ທ່ານ ນາງ ມະນີວັນ ນາມວົງ ນັກຂ່າວຈາກແຂວງຄໍາມ່ວນ ໄດ້ກ່າວວ່າ: ຊຸດອົບຮົມຄັ້ງນີ້, ມີປະໂຫຍດຫຼາຍສຳລັບສື່ມວນຊົນ. ຊຶ່ງຂ້າພະເຈົ້າເອງໄດ້ເຂົ້າຮ່ວມການຝືກອົບຮົມໃນຄັ້ງນີ້ແມ່ນເປັນຄັ້ງທຳອິດ, ມີຄວາມດີໃຈຫຼາຍ ແລະ ທຸກໆບົດທີ່ໄດ້ຮຽນແມ່ນມີປະໂຫຍດຫຼາຍ ໂດຍສະເພາະແມ່ນບັນຫາສິ່ງແວດລ້ອມ, ການຂຽນຂ່າວທີ່ນຳໃຊ້ AI, ການຖ່າຍ-ຕັດຕໍ່ວິດີໂອ ແລະ ຮູບພາບຂ່າວ ໂດຍການນໍາໃຊ້ໂປຣແກຣມແຄນວາ (Canva) ແລະ ໂປຣແກຣມແຄັບຂັດ (CapCut) ເພື່ອຈະໄດ້ເຜີຍແຜ່ໃຫ້ສັງຄົມໄດ້ຮັບຮູ້ຢ່າງກວ້າງຂວາງ ເພື່ອໃຫ້ມີສ່ວນຮ່ວມ ໃນການຮັກສາສິ່ງແວດລ້ອມຮ່ວມກັນ.
ທ່ານ ວິໄລວອນ ສິດທິໄຊ ນັກຂ່າວຈາກແຂວງສາລະວັນ ກ່າວວ່າ: ຂ້າພະເຈົ້າດີໃຈຫຼາຍທີ່ໂຄງການແກມຊິວ ໄດ້ຈັດການຝຶກອົບຮົມນີ້ຂຶ້ນ ເພາະວ່າມັນຊ່ວຍໃຫ້ຂ້າພະເຈົ້າມີຄວາມເຂົ້າໃຈຫຼາຍກ່ຽວກັບການປ່ຽນແປງຂອງດິນຟ້າອາກາດ. ສະນັ້ນ, ຂ້າພະເຈົ້າຈິ່ງຈະໃຊ້ຄວາມຮູ້ນີ້ ເພື່ອໂຄສະນາປຸກລະດົມ, ປູກຈິດສໍານຶກໃຫ້ທົ່ວສັງຄົມ ມີສ່ວນຮ່ວມປົກປັກຮັກສາສິ່ງແວດລ້ອມແບບຍືນຍົງ ດ້ວຍປູກໄມ້ຟື້ນຟູປ່າຕາມທິດພັດທະນາສີຂຽວ ແລະ ຍືນຍົງ.
(ຂ່າວ-ພາບ: ສັນຍາ)
ຄໍາເຫັນ