ສື່ມວນຊົນລາວມີຄວາມເອົາໃຈໃສ່, ດຸໝັ່ນປະກອບສ່ວນຢ່າງຕັ້ງໜ້າເຂົ້າໃນພາລະກິດຕໍ່ສູ້ກູ້ຊາດຕ້ານຈັກກະພັກຜູ້ຮຸກຮານ ກໍຄືໃນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ.
ສື່ມວນຊົນລາວຮັກສາໄດ້ມູນເຊື້ອຄວາມຈົງຮັກພັກດີຕໍ່ພັກ ແລະ ລັດຢ່າງສະເໝີຕົ້ນສະເໝີປາຍ; ສື່ມວນຊົນລາວໄດ້ເຮັດໜ້າທີ່ໂຄສະນາແນວທາງນະໂຍບາຍຂອງພັກ, ມະຕິ, ຄໍາສັ່ງ, ກົດໝາຍຂອງລັດ. ຜົນສໍາເລັດໃນການສ້າງສາພັດທະນາປະເທດຊາດ, ແນວທາງການຕ່າງປະເທດຂອງພັກໄດ້ຮັບຮູ້ທັງເຮັດໜ້າທີ່ຕອບໂຕ້ທຸກຖ້ອຍທຳນອງຂອງພວກຄົນບໍ່ຫວັງດີທີ່ໃສ່ຮ້າຍປ້າຍສີຕໍ່ລະບອບໃໝ່ໄດ້ຢ່າງທັນການ; ສື່ມວນຊົນລາວໄດ້ພັດທະນາ, ຍົກລະດັບ, ຄວາມຮູ້, ສາມາດ, ອຸປະກອນທີ່ທັນສະໄໝເປັນແຕ່ລະບາດກ້າວ ເພື່ອຮອງຮັບກັບໜ້າທີ່ການເມືອງຂອງພັກໃນໄລຍະໃໝ່.
ໃນພາລະກິດແຫ່ງການປົກປັກຮັກສາ ແລະສ້າງສາພັດທະນາປະເທດຊາດ ສື່ມວນຊົນ ກໍຄື ໜັງສືພິມຍິ່ງມີບົດບາດສໍາຄັນໃນການໂຄສະນາວຽກງານຕ່າງໆ ຂອງພັກ, ລັດ ກໍຄື ຜົນຜະລິດຂອງປວງຊົນບັນດາເຜົ່າ ໂດຍໄດ້ປຸກລະດົມປະຊາຊົນທຸກຊັ້ນຄົນທຳການຜະລິດ, ສ້າງເສດຖະກິດຄອບຄົວ ເພື່ອໃຫ້ມີຊີວິດການເປັນຢູ່ນັບມື້ນັບດີຂຶ້ນ. ໂຄສະນາພາລະກິດການປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ເສີມສ້າງຄວາມສາມັກຄີປອງດອງປວງຊົນທັງຊາດ, ໂຄສະນາ, ປຸກລະດົມ, ຊຸກຍູ້ການພັດທະນາສ້າງສາ ເສດຖະກິດຂອງປະເທດ, ຫັນປ່ຽນເສດຖະກິດ ທຳມະຊາດ ໄປສູ່ເສດຖະກິດສິນຄ້າ ເພື່ອໃຫ້ປວງຊົນມີລາຍຮັບທີ່ໝັ້ນຄົງ, ພ້ອມທັງສຶກສາອົບຮົມ ການເມືອງ-ແນວຄິດ, ສ້າງທັດສະນະຫຼັກໝັ້ນ ແລະ ຄວາມເຊື່ອໝັ້ນຕໍ່ອຸດົມຄະຕິ ແລະ ການນໍາພາຂອງພັກ, ໃນການຊຸກຍູ້, ປຸກລະດົມທົ່ວປວງຊົນເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ, ໃນການໂຄສະນາດຶງດູດເອົາການຮ່ວມມື, ການຊ່ວຍເຫຼືອ ແລະ ການລົງທຶນຈາກຕ່າງປະເທດ ໃນແຕ່ລະໄລຍະຂອງການປະຕິວັດ, ສື່ມວນຊົນ ກໍຄື ສິ່ງພິມ ແມ່ນກະບອກສຽງຂອງພັກ ຍ້ອນວ່າ ສື່ມວນຊົນໄດ້ເຮັດໜ້າທີ່ການເມືອງຂອງພັກ ຕາມການຂະຫຍາຍຕົວຂອງເສດຖະກິດ-ສັງຄົມດ້ວຍຄວາມຮັບຜິດຊອບສູງ, ເຮັດໜ້າທີ່ການເມືອງຢ່າງສະເໝີຕົ້ນສະເໝີປາຍ.ບໍ່ພຽງແຕ່ເທົ່ານັ້ນ ສື່ມວນຊົນ ກໍຄື ສື່ສິ່ງພິມ, ໜັງສືພິມ “ປະຊາຊົນ”ແມ່ນເຮັດໜ້າທີ່ສະໜອງຂໍ້ມູນ-ຂ່າວສານ, ສາລະໜ້າຮູ້, ສາລະບັນເທີງ, ເປັນເວທີສະແດງຄວາມຄິດ, ຄວາມເຫັນຂອງສັງຄົມ, ພົວພັນລະຫວ່າງພັກ, ລັດ, ກັບປະຊາຊົນ ແລະ ພົວພັນກັບພາກພື້ນໃນໂລກ ທັງເປັນເຄື່ອງມືອັນແຫຼມຄົມ ໃນການໂຄສະນາເຜີຍແຜ່ ແລະ ຈັດຕັ້ງປະຕິບັດ ວຽກງານຕ່າງໆຂອງພັກ, ນະໂຍບາຍ, ລະບຽບ, ກົດໝາຍຂອງລັດເລື້ອຍໆ.
ມາເຖິງປັດຈຸບັນ ສັງເກດໄດ້ວ່າ: ປວງຊົນລາວ ໄດ້ເຂົ້າເຖິງຂໍ້ມູນຂ່າວສານໄດ້ຫຼາຍໆຊ່ອງທາງ ເປັນຕົ້ນ: ໜັງສືພິມສະບັບເຈັ້ຍ, ຈາກແຕ່ກ່ອນພິມດ້ວຍເຄື່ອງມືທີ່ບໍ່ທັນສະໄໝ ຈົນກ້າວມາເຖິງ ໜັງສືພິມເອເລັກໂຕຣນິກ, ເຟສບຸກ, ເວັບໄຊ ແລະ ອື່ນໆ ໂດຍການເຂົ້າອ່ານເທິງໂທລະສັບມືຖືສະມາດໂຟນໄດ້ຢ່າງສະດວກ ຊຶ່ງຖືເປັນທາງເລືອກທີ່ດີ ສໍາລັບຄົນຍຸກໃໝ່ ຍຸກແຫ່ງຂໍ້ມູນຂ່າວສານທີ່ທັນສະໄໝ.
ຄໍາເຫັນ