ທ່ານ ຄໍາພັນ ພົມມະທັດ ຕ້ອນຮັບທູດຫວຽດນາມ

ໄດ້ຕ້ອນຮັບທ່ານ ຫງວຽນ ມິງ ເຕິມ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສສ ຫວຽດນາມ ປະຈຳ ສປປ ລາວຄົນໃໝ່ໃນຕອນເຊົ້າທີວັນທີ 20 ກັນຍາ ນີ້ ທີ່ຄກສພ¬-ອກຫລ
ໂອກາດດັ່ງກ່າວ ທ່ານຄຳພັນ ພົມມະທັດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານຫງວຽນ ມິງ ເຕິມ ທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ຊຶ່ງເປັນການສະແດງເຖິງ ຄວາມໄວ້ເນື້ອເຊື່ອໃຈສູງຂອງພັກ, ລັດ ແລະ ປະຊາຊົນຫວຽດນາມ ຕໍ່ຜົນງານການປະກອບສ່ວນຢ່າງຕັ້ງໜ້າຂອງ ທ່ານເອກອັກຄະລັດຖະທູດ ເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃນໄລຍະຜ່ານມາ.ພ້ອມນີ້ຍັງສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫຼວງ, ຮອບດ້ານທີ່ ພັກ, ລັດ ແລະ ປະຊາຊົນຫວຽດນາມ ຍາດມາໄດ້ໃນຕະຫຼອດໄລຍະແຫ່ງການດໍາເນີນພາລະກິດປ່ຽນແປງໃໝ່,ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງຢ່າງໜັກແໜ້ນ,ວຽກງານປ້ອງກັນຊາດ,ປ້ອງກັນຄວາມສະຫງົບມີຄວາມເຂັ້ມແຂງ,ເສດຖະກິດມີການຂະຫຍາຍຕົວດ້ວຍຈັງຫວະສູງ ແລະ ຕໍ່ເນື່ອງ,ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນ,ການພົວພັນຮ່ວມມື ແລະ ເຊື່ອມໂຍງສາກົນ ສືບຕໍ່ໄດ້ຮັບການເປີດກວ້າງ,ບົດບາດອິດທິພົນຂອງ ພັກ ແລະ ລັດ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ; ຂ້າພະເຈົ້າເຊື່ອໝັ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງ ພັກກອມມູນິດຫວຽດນາມ, ປະຊາຊົນຫວຽດນາມ ຈະສືບຕໍ່ຍາດໄດ້ຜົນສໍາເລັດໃໝ່ ໃຫຍ່ຫຼວງກວ່າເກົ່າ ໃນການປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກ ໄລຍະທ້າຍສະໄໜ ແລະ ກະກຽມກອງປະຊຸມໃຫຍ່ ສະໄໜທີ XIV ໃນຕໍ່ໜ້າ ໄດ້ຢ່າງມີໄຊ ແລະ ສ້າງສາປະເທດຊາດເປັນປະເທດອຸດສາຫະກໍາຕາມທິດທັນສະໄໝ ແລະ ບັນລຸເປົ້າໝາຍ ປະຊາຊົນຮັ່ງມີຜາສຸກ,ປະເທດຊາດມັ່ງຄັ່ງເຂັ້ມແຂງ,ປະຊາທິປະໄຕ, ຍຸຕິທໍາ, ສີວິໄລ; ຕອນທ້າຍ ທ່ານຄຳພັນ ພົມມະທັດ ຍັງສະແດງຄວາມຂອບໃຈມາຍັງ ລັດຖະບານ ແລະ ປະຊາຊົນຫວຽດນາມ ທີ່ຍາມໃດ ກໍໃຫ້ການຊ່ວຍເຫຼືອ ແລະ ສະໜັບສະໜູນ ດ້ານວິຊາການ - ຊ່ຽວຊານ ໃນການແກ້ໄຂບັນຫາເສດຖະກິດ-ການເງິນ ກໍຄື ການພັດທະນາເສດຖະກິດ - ສັງຄົມ ແລະ ການເຊື່ອມໂຍງສາກົນໃນຕະຫຼອດໄລຍະຜ່ານມາ, ໂດຍສະເພາະການພັດທະນາຂົງເຂດບຸລິມະສິດຂອງລາວ ເປັນຕົ້ນແມ່ນການພັດທະນາຊັບພະຍາກອນມະນຸດ, ໂຄງລ່າງພື້ນຖານ, ສາທາລະນະສຸກ, ກະສິກໍາ-ປ່າໄມ້ ແລະ ອື່ນໆ.
ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ, ຈຶ່ງສະເໜີ ທ່ານທູດສືບຕໍ່ຕິດຕາມຊຸກຍູ້ການຈັດຕັ້ງຜັນຂະຫຍາຍ ບົດບັນທຶກລະຫວ່າງການນໍາຂັ້ນສູງຂອງ ສອງພັກ,ສອງລັດ,ບັນດາຖະແຫຼງການຮ່ວມສອງຝ່າຍ ກໍຄື ການຈັດຕັ້ງປະຕິບັດບັນດາໂຄງການຮ່ວມມືລົງທຶນ ແລະ ຊ່ວຍເຫຼືອ ທີ່ສອງຝ່າຍໄດ້ເປັນເອກະພາບກັນ ໃຫ້ມີປະສິດທິຜົນສູງ,ປະກອບສ່ວນເຂົ້າໃນການປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່,ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ,ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ຫວຽດນາມ-ລາວ ໃຫ້ນັບມື້ນັບແຕກອອກອອກຜົນ,ຂຽວສົດງົດງາມ ແລະ ໝັ້ນຄົງຂະໜົງແກ່ນຊົ່ວກາລະນານ.
ພ້ອມນັ້ນ, ສະເໜີ ທ່ານທູດ ລົງຢ້ຽມຢາມ ບັນດາແຂວງຂອງລາວ ເພື່ອເຫັນໄດ້ສະພາບຕົວຈິງ ການພັດທະນາຢູ່ແຕ່ລະແຂວງ ແລະ ເປັນການເພີ່ມທະວີຄວາມໃກ້ຊິດກັບບັນດາການນໍາ-ອົງການປົກຄອງທ້ອງຖິ່ນຂອງລາວ ແລະ ຫວັງວ່າທ່ານຈະຊ່ວຍພິຈາລະນາສືບຕໍ່ຍາດແຍ່ງໃຫ້ການຊ່ວຍເຫຼືອທີ່ແທດເໝາະກັບສະພາບຕົວຈິງຂອງແຕ່ລະທ້ອງຖິ່ນ ທີ່ມີຄວາມຕ້ອງການໃນການພັດທະນາເສດຖະກິດ ແລະ ສັງຄົມ.
ທ່ານທູດ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບໃນຄັ້ງນີ້ພ້ອມທັງຢືນຢັນຈະສືບຕໍ່ການພົວພັນຮ່ວມມືປະກອບສ່ວນຢ່າງຕັ້ງໜ້າຕະຫຼອດໄລຍະປະຕິບັດໜ້າທີ່ການທູດຢູ່ ສປປ ລາວໃຫ້ໄດ້ຮັບຜົນສຳເລັດ.
(ຂ່າວ-ພາບ:ຕູ່ນາ ເລົ່າຖາວອນ)