ທ່ານ ນາລອນ ໂພທີສານ ໃຫ້ສໍາພາດໃນວັນທີ 13 ມັງກອນ 2025ນີ້ວ່າ: ຄອບຄົວຂອງຂ້າພະເຈົ້າມີທັງມົດ 5 ຄົນຍີງ 3 ຄົນ, ແຮງງານຕົ້ນຕໍ່ 2ຄົນ. ແຕ່ກ່ອນມີອາຊີບຄ້າຂາຍ ແລະ ຮັບຈ້າງແກ່ກ້ວຍ,ລາຍຈ່າຍປະຈໍາວັນມີຫຼາຍ ແຕ່ລາຍຮັບພັດມີໜ້ອຍ ຈິ່ງເຮັດໃຫ້ຊີວິດການເປັນຢູ່ມີຄວາມຫຍຸ້ງຍາກຂາດເຂີນ, ບໍ່ມີເງິນສະສົມໄວ້. ຍ້ອນແນວນັ້ນ, ຂ້າພະເຈົ້າພ້ອມດ້ວຍຄອບຄົວ ຈິ່ງຊອກຫາອາຊິບອື່ນ ທີ່ສາມາດເຮັດໄດ້.ຕໍ່ມາ ກໍໄດ້ຕັດສີນໃຈລອງປູກມັນດ້າງ ເພາະວ່າໃນຄອບຄົວ ມີເນື້ອທີ່ດີນຈໍານວນ 20 ເຮັກຕາ ທັງເປັນການເພື່ອປະຕິບັດຕາມແນວທາງນະໂຍບາຍຂອງພັກ - ລັດທີ່ປຸກລະດົມໃຫ້ປະຊາຊົນທໍາການຜະລິດ, ປູກຝັງງ - ລ້ຽງສັດ ເປັນສີນຄ້າ ເພື່ອພັດທະນາຊີວິດການເປັນຢູ່ຂອງຄອບຄົວ ໂດຍເລີ່ມປູກມັນດ້າງ ໃນປີ 2010, ປູກປີທໍາອິດ ເຫັນວ່າມີຄວາມຫຍຸ້ງຍາກ ເພາະວ່າລົງທຶນຫຼາຍ ໂດຍສະເພາະແມ່ນການຈ້າງລົດໄຖດິນສວນ ເພື່ອປູກມັນດ້າງ, ຄວາມຮູ້ໃນການປູກ ກໍບໍ່ມີ ເພາະບໍ່ໄດ້ສຶກສາຮໍ່າຮຽນ ພຽງແຕ່ຮຽນຮູ້ຈາກຜູ້ທີ່ເຄີຍປູກມາກ່ອນ, ປູກໄປນໍາຖອດຖອນບົດຮຽນພ້ອມ. ແຕ່ກໍໄດ້ບຸກບືນສູ້ຊົນປູກມັນດ້າງມາເລື້ອຍໆເພາະເຫັນວ່າ ມັນດ້າງເປັນລາຄາ, ມີຕະຫຼາດຮອງຮັບ ທັງຕະຫຼາດພາຍໃນ ແລະ ຕ່າງປະເທດ. ປີຕໍ່ມາ ລາຍຮັບກໍຄ່ອຍໆເພີ່ມຂຶ້ນ, ສາມາດຊື້ພາຫານະ ແລະ ລົດໄຖໃຫຍ່ ເພື່ອມາຮັບໃຊ້ແກ່ການຜະລິດ. ໄລຍະການປູກມັນຕົ້ນແຕ່ລະປີແມ່ນບໍ່ແນ່ນອນ ໂດຍອີງຕາມສະພາບຟ້າຝົນໃນແຕ່ລະປີ, ບາງປີຝົນຕົກໄວ ກໍເລີ່ມປູກແຕ່ເດືອນທີ 6, ບາງປີ ກໍເດືອນທີ 7, ບາງປີ ກໍເດືອນທີ 8, ໄລຍະການປູກ 4 ເດືອນ ແມ່ນເກັບກູ້ ເພາະຫົວມັນຈະໃຫຍ່, ຖ້າກາຍ 4 ເດືອນ ຫົວມັນຈະເປັນແມງ, ບໍ່ມີໃຜຊື້. ການປູກ ແລະ ເກັບກູ້ ແມ່ນໄດ້ຈ້າງພະນັກງານ.ຮອດປີ 2022 ມີລາຍຮັບຈາກການຂາຍຜົນຜະລິດທັງໝົດແມ່ນ 1 ຕື້ກີບ, ສະເລ່ຍ 200 ລ້ານກີບ/ຄົນ/ປີ,
ທ່ານ ນາລອນ ໂພທິສານ ກ່າວຕື່ມວ່າ: ປັດຈຸບັນນີ້ສະພາບການເປັນຢູ່ຂອງຄອບຄົວຂ້າພະເຈົ້ານັບມື້ດີຂຶ້ນເປັນກ້າວໆ, ມີເຮືອນຢູ່ແໜ້ນໜາຖາວອນ, ມີລົດໄຖຂະໜາດໃຫຍ່ 3 ຄັນແລະ ອື່ນໆ. ສັງລວມແລ້ວຄວາມອຸດົມສົມບູນຂອງຄອບຄົວຂ້າພະເຈົ້າ ແມ່ນໄດ້ມາຈາກການປູກມັນດ້າງ ແລະ ຍ້ອນມີການນໍາພາ - ຊີ້ນໍາຂອງພັກ-ລັດ ເວົ້າລວມ, ເວົ້າສະເພາະແມ່ນຄະນະພັກ - ອົງການປົກຄອງເມືອງບາຈຽງຈະເລີນສຸກ ແລະ ພະນັກງານວິຊາການຫ້ອງການກະສິກໍາ ແລະ ປ່າໄມ້ເມືອງ ທີ່ໄດ້ຊີ້ນໍາໃຫ້ເຫັນຊ່ອງທາງອຸດົມການທີ່ຖືກຕ້ອງ, ສາມາດເຮັດໃຫ້ຄອບຄົວຂ້າພະເຈົ້າຫຼຸດພົ້ນອອກຈາກຄວາມທຸກຍາກໄດ້.
ທ່ານ ນາລອນ ໂພທີສານ ກ່າວຕອນທ້າຍອີກວ່າ: ໃນຕໍ່ໜ້ານີ້ ຄອບຄົວຂອງຂ້າພະເຈົ້າ ຍັງຈະສືບຕໍ່ປູກມັນດ້າງ ເປັນສິນຄ້າ ເພື່ອສ້າງເສດຖະກິດ ກໍຄືຊີວິດການເປັນຢູ່ຂອງຄອບຄົວຈະເລີນກ້າວໜ້າຂຶ້ນໄປເລື້ອຍໆ. ສ່ວນວ່າ ຈະປູກຫຼາຍ ຫຼື ປູກໜ້ອຍ ແມ່ນອີງໃສ່ສະພາບຄວາມຕ້ອງການມັນດ້າງຂອງຕະຫຼາດໃນແຕ່ລະໄລຍະ.
(ຂ່າວ-ພາບ: ທູນທອງໃຈ)
ຄໍາເຫັນ