 |
ໃນການເຂົ້າຢ້ຽມຂໍ່ານັບຄັ້ງນີ້, ທ່ານ U Aung Ko ເອກອັກຄະລັດຖະທູດ ແຫ່ງ ສາທາລະນະລັດ ສະຫະພາບ ມຽນມາ ປະຈຳສປປ ລາວ, ໃນນາມເປັນປະທານກອງປະຊຸມປຶກສາຫາລືອາຊຽນ(ASEAN Consultative Meeting)ໄດ້ຕາງໜ້າບັນດາທູດອາຊຽນ ສະແດງຄວາມຍິນດີ ແລະ ຊົມເຊີຍຢ່າງຈິງໃຈຕໍ່ທ່ານ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ນາຍົກລັດຖະມົນຕີີເເຫ່ງ ສປປ ລາວທີ່ໄດ້ຮັບການເລືອກຕັ້ງເປັນ ນາຍົກລັດຖະມົນຕີ ແຫ່ງ ສປປ ລາວ ຄົນໃໝ່.ການໄດ້ຮັບເລືອກຕັ້ງດຳລົງຕຳແໜ່ງສຳຄັນຄັ້ງນີ້ ແມ່ນໄດ້ຮັບຄວາມເຊື່ອໝັ້ນ ແລະ ໄວ້ວາງໃຈ ຈາກ ພັກ-ລັດ ແລະ ປະຊາຊົນ ແລະ ເຊື່ອໝັ້ນວ່າດ້ວຍຄວາມຮູ້, ຄວາມສາມາດ, ປະສົບການແລະ ບັນດາຜົນງານຕ່າງໆ, ທ່ານນາຍົກລັດຖະມົນຕີ ຈະສືບຕໍ່ນໍາພາລັດຖະບານ ແລະ ປະຊາຊົນ ປະຕິບັດພາລະກິດປົກປັກຮັກສາ ແລະສ້າງສາພັດທະນາປະເທດຊາດໃຫ້ໄດ້ຮັບຜົນສໍາເລັດເປັນກ້າວໆ.
ທ່ານ ສະເຫຼີມໄຊ ກົມມະສິດນາຍົກລັດຖະມົນຕີໄດ້ສະແດງຄວາມຂອບໃຈຕໍ່ຄຳອວຍພອນ ແລະ ຊົມເຊີຍຢ່າງຈິງໃຈຂອງບັນດາທູດອາຊຽນ ປະຈໍາ ສປປ ລາວ ທີ່ໄດ້ໃຫ້ການຮ່ວມມື ແລະ ສະໜັບສະໜູນ ສປປ ລາວ ຕະຫຼອດໄລຍະຜ່ານມາ.ນາຍົກລັດຖະມົນຕີ ຍັງໄດ້ສະແດງຄວາມຊົມເຊີຍຕໍ່ຜົນງານຂອງກອງປະຊຸມປຶກສາຫາລືອາຊຽນທີ່ເຮັດໜ້າທີ່ເປັນຂົວຕໍ່ໃນການສື່ສານ ແລະ ປະສານງານເພື່ອສົ່ງເສີມການພົວພັນຮ່ວມມື ທັງໃນຂອບຫຼາຍຝ່າຍ ແລະ ສອງຝ່າຍ ແລະ ລະຫວ່າງບັນດາປະເທດສະມາຊິກອາຊຽນ ແລະ ສປປ ລາວ ໃຫ້ນັບມື້ແໜ້ນແຟ້ນຍິ່ງຂຶ້ນ. ພ້ອມນີ້, ທ່ານນາຍົກລັດຖະມົນຕີ ໄດ້ຢໍ້າຄືນວ່າ ສປປ ລາວ ແມ່ນໃຫ້ຄວາມສຳຄັນຕໍ່ອາຊຽນໃນການຈັດຕັ້ງປະຕິບັດນະໂຍບາຍການຕ່າງປະເທດຂອງສປປ ລາວແລະ ເຫັນວ່າ ອາຊຽນ ເປັນເວທີພາກພື້ນສຳຄັນ ເພື່ອສົ່ງເສີມສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາແບບຍືນຍົງ. ສປປ ລາວ ຈະສືບຕໍ່ຂັບເຄື່ອນບຸລິມະສິດການພັດທະນາແຫ່ງຊາດແລະ ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 10 (2026-2030) ແລະ ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຜ່ານນະໂຍບາຍເສດຖະກິດເອກະລາດເປັນເຈົ້າຕົນເອງ.
ໃນໂອກາດນີ້,ທ່ານ ສະເຫຼີມໄຊ ກົມມະສິດນາຍົກລັດຖະມົນຕີຍັງໄດ້ສະແດງຄວາມຊົມເຊີຍຕໍ່ຟີລິບປິນທີ່ໄດ້ດໍາເນີນການເປັນປະທານອາຊຽນດ້ວຍຜົນສໍາເລັດອັນຈົບງາມມາຮອດປັດຈຸບັນແລະ ຫວັງວ່າຈະໄດ້ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 49 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ, ຊຶ່ງຈະຈັດຂຶ້ນແຕ່ວັນທີ 15-17 ພະຈິກ 2026ທີ່ ມະນີລາ ຟິລິບປິນ. ພ້ອມນີ້, ສປປ ລາວກຽມພ້ອມສືບຕໍ່ໃຫ້ການຮ່ວມມື ແລະ ສະໜັບສະໜູນບົນພື້ນຖານຄວາມອາດສາມາດຂອງຕົນ ຕໍ່ການເປັນປະທານອາຊຽນຂອງ ສິງກະໂປ ໃນປີ 2027.
(ຂ່າວ: ກຕທ)
ຄໍາເຫັນ