ທ່ານສີຈິ້ນຜິງພົບປະເຈລະຈາກັບປະທານາທິບໍດີຝຣັ່ງ

ຂ່າວສານຊີອາໄອລາຍງານ, ໃນຕອນບ່າຍວັນທີ 6 ພຶດສະພາ ຜ່ານມານີ້, ທ່ານສີຈິ້ນຜິງປະທານປະເທດຈີນໄດ້ພົບປະເຈລະຈາກັບທ່ານເອັມມານູເອວມາຄຣົງປະທານາທິບໍດີຝຣັ່ງຢູ່ວັງເອລີເຊທີ່ນະຄອນຫຼວງປາຣີປະເທດຝຣັ່ງ.
ໃນໂອກາດດັ່ງກ່າວ, ຜູ້ນຳສອງປະເທດໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບຈີນ-ຝຣັ່ງສ້າງຕັ້ງສາຍພົວພັນທາງການທູດຄົບຮອບ60ປີ, ສາຍພົວພັນມິດຕະພາບຈີນ-ຝຣັ່ງ, ການຮ່ວມມືດ້ານການຄ້າແລະການແລກປ່ຽນດ້ານວັດທະນະທຳສອງຝ່າຍລວມທັງເຕັກໂນໂລຊີທີ່ທັນສະໄໝຊັ້ນຍອດກໍຄືບັນຫາທົ່ວໂລກເຊັ່ນ: ການປ່ຽນແປງຂອງດິນຟ້າອາກາດ, ຄວາມຫຼາກຫຼາຍດ້ານຊີວະນານາພັນຂອງທະເລແລະອື່ນໆ. ນອກນີ້ສອງຝ່າຍຍັງໄດ້ລົງເລິກແລກປ່ຽນຄວາມເຫັນກ່ຽວກັບບັນຫາໃນສາກົນແລະພາກພື້ນ.
ທ່ານສີຈິ້ນຜິງຊີ້ໃຫ້ເຫັນວ່າ: ຈີນແລະຝຣັ່ງເປັນປະເທດມົນຕີຖາວອນຂອງສະພາຄວາມໝັ້ນຄົງອົງການສະຫະປະຊາຊາດ, ຄວນອອກສຽງເພື່ອແກ້ໄຂບັນຫາ ເຄັ່ງຮ້ອນດ້ວຍສັນຕິວິທີ, ປະກອບສ່ວນເຂົ້າໃນການຊຸກຍູ້ການສ້າງໂລກທີ່ມີສັນຕິພາບຖາວອນແລະມີຄວາມໝັ້ນຄົງຢ່າງທົ່ວເຖິງ. 
ສອງຝ່າຍໄດ້ອອກຖະແຫຼງການຮ່ວມ4ສະບັບກ່ຽວກັບສະຖານະການຢູ່ເຂດຕາເວັນອອກກາງ, ປັນຍາປະດິດກັບການບໍລິຫານໂລກ, ຊີວະນານາພັນກັບທະເລກໍຄືການແລກປ່ຽນການຮ່ວມມືດ້ານກະສິກຳ, ນອກນີ້ຍັງໄດ້ລົງນາມໃນເອກະສານຮ່ວມມືສອງຝ່າຍເກືອບ20ກວ່າສະບັບທີ່ພົວພັນເຖິງຂົງເຂດຕ່າງໆເຊັ່ນ: ການພັດທະນາສີຂຽວ, ການບິນ, ອາຫານທີ່ເປັນຜະລິດຕະພັນກະສິກຳ, ການຄ້າ, ວັດທະນະທຳແລະອື່ນໆ.