ທ່ານສີຈິ້ນຜິງພົບປະກັບທ່ານຮຸນມາເນັດ ນາຍົກລັດຖະມົນຕີກຳປູເຈຍ

ເພື່ອສ້າງຄູ່ຮ່ວມຊາຕາກຳຈີນ-ກຳປູເຈຍໃນທຸກສະພາບການໃນຍຸກໃໝ່ ແລະ ປະກາດປີ 2025 ເປັນ “ປີທ່ອງທ່ຽວຈີນ-ກຳປູເຈຍ”.

ທ່ານສີຈິ້ນຜິງກ່າວວ່າ: ປັດຈຸບັນ, ການປ່ຽນແປງໃນຮອບຮ້ອຍປີຂອງໂລກພວມເລັ່ງຜັນແປ, ການລົງເລິກການສ້າງຄູ່ຮ່ວມຊາຕາກຳຈີນ-ກຳປູເຈຍແມ່ນສອດຄ່ອງກັບຜົນປະໂຫຍດຂອງປະຊາຊົນສອງຊາດຢ່າງສົມບູນ. ຈີນຈະເຮັດຄືດັ່ງທີ່ເຄີຍໄດ້ປະຕິບັດໃນໄລຍະຜ່ານມາ, ສະໜັບສະໜູນກຳປູເຈຍເດີນໄປຕາມເສັ້ນທາງແຫ່ງການພັດທະນາທີ່ສອດຄ່ອງກັບສະພາບການຂອງປະເທດຕົນ, ສະໜັບສະໜູນລັດຖະບານກຳປູເຈຍທີ່ປົກຄອງປະເທດຢ່າງສະດວກ, ສະໜັບສະໜູນກຳປູເຈຍເສີມຂະຫຍາຍບົດບາດສຳຄັນກວ່າເກົ່າໃນວຽກງານສາກົນ ແລະ ພາກພື້ນ.

ທ່ານສີຈິ້ນຜິງກ່າວເນັ້ນໜັກວ່າ: ຈີນຍິນດີຊົມໃຊ້ໂອກາດຮ່ວມກັບກຳປູເຈຍ, ສະແຫວງຫາການພັດທະນາຮ່ວມກັນ. ສອງຝ່າຍຄວນສຸມກຳລັງເຂົ້າໃນການຊຸກຍູ້ການຮ່ວມມືດ້ານຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຢ່າງມີຄຸນນະພາບສູງ, ເພີ່ມຕື່ມເນື້ອໃນເຂົ້າໃນໂຄງສ້າງການຮ່ວມມືໃນ 6 ຂົງເຂດ ຄື: ການເມືອງ, ກຳລັງການຜະລິດ, ກະສິກຳ, ພະລັງງານ, ຄວາມໝັ້ນຄົງ ແລະ ວັດທະນະທຳ ຫຼື ການຮ່ວມມື “ເພັດພອຍ 6 ລ່ຽມ” ໃຫ້ອຸດົມສົມບູນຂຶ້ນເລື້ອຍໆ ເພື່ອເພີ່ມພະລັງຂັບເຄື່ອນໃໝ່ເຂົ້າໃນການສ້າງສາຄວາມທັນສະໄໝຂອງປະເທດຕົນ.

ທ່ານຮຸນມາເນັດ ນາຍົກລັດຖະມົນຕີກຳປູເຈຍກ່າວວ່າ: ກຳປູເຈຍເດັດດ່ຽວປະຕິບັດນະໂຍບາຍປະເທດຈີນດຽວ, ສະໜັບສະໜູນຈີນໃນການປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຕົນ. ພາຍໃຕ້ສະຖານະການທີ່ລັດທິຝ່າຍດຽວໄດ້ເຮັດໃຫ້ໂລກເກີດຄວາມປັ່ນປ່ວນ ແລະ ລະບົບການຄ້າຫຼາຍຝ່າຍໄດ້ຮັບຜົນກະທົບ, ກຳປູເຈຍຍິນດີເພີ່ມທະວີການປະສານງານ ແລະ ການປະສານສົມທົບກັບຈີນ ເພື່ອປົກປັກຮັກສາຜົນປະໂຫຍດຮ່ວມກັນຂອງສອງຝ່າຍ.