 |
ທ່ານ ອຸແກ້ວ ສີພັນດອນ ຫົວໜ້າພະແນກເສດຖະກິດ ແລະ ຄຸ້ມຄອງເງິນຕາຕ່າງປະເທດ ທຫລ.ພຕ ລາຍງານໃຫ້ຮູ້ວ່າ: ໃນປີ 2025 ຜ່ານມາ, ການຄຸ້ມຄອງເງິນຕາຕ່າງປະເທດຢູ່ແຂວງເຊກອງ ແມ່ນມີທ່າອ່ຽງດີຂຶ້ນ ໂດຍລວມສາມາດຮັກສາໄດ້ສະຖຽນລະພາບຂອງເງິນກີບ, ອັດຕາແລກປ່ຽນ (ທະນາຄານທຸລະກິດ) ເງິນກີບທຽບເງິນໂດລາສະຫະລັດ ອ່ອນຄ່າ 0.19% ສະເລ່ຍໃນປີຢູ່ໃນລະດັບ 21,502.90 ກີບ/ໂດລາສະຫະລັດ; ເງິນກີບທຽບເງິນບາດໄທ ແຂງຄ່າ 0.07% ສະເລ່ຍໃນປີຢູ່ໃນລະດັບ 649.93 ກີບ/ບາດ; ການເກັບຊື້ ແລະ ຂາຍເງິນຕາຕ່າງປະເທດ ເພື່ອສະໜອງເງິນຕາໃຫ້ແກ່ສັງຄົມ, ສາມາດເກັບຊື້ເງິນໂດລາສະຫະລັດໄດ້ 1.85 ລ້ານໂດລາສະຫະລັດ ທຽບໃສ່ປີຜ່ານມາເພີ່ມຂຶ້ນ 131.07%; ເງິນບາດໄທ 4.18 ລ້ານບາດ ເພີ່ມຂຶ້ນ 86.63%; ຂາຍເງິນໂດລາສະຫະລັດໄດ້ 52,942.45 ໂດລາສະຫະລັດ ຫຼຸດລົງ 81.42% ແລະ ຂາຍເງິນບາດໄທ 4.21 ລ້ານບາດ ທຽບໃສ່ປີຜ່ານມາເພີ່ມຂຶ້ນ 643.04%; ການຄຸ້ມຄອງການຊໍາລະສະສາງເງິນຕາຜ່ານລະບົບທະນາຄານ, ການໂອນເງິນອອກຜ່ານລະບົບທະນາຄານທຸລະກິດມີມູນຄ່າທັງໝົດທຽບເທົ່າ 1.52 ລ້ານໂດລາສະຫະລັດ ທຽບໃສ່ປີຜ່ານມາເພີ່ມຂຶ້ນ 162.91%; ການໂອນເງິນເຂົ້າຜ່ານລະບົບທະນາຄານທຸລະກິດມີມູນຄ່າທັງໝົດທຽບເທົ່າ 18.02 ລ້ານໂດລາສະຫະລັດ ທຽບໃສ່ປີຜ່ານມາເພີ່ມຂຶ້ນ 20.61%. ໃນນັ້ນ, ການໂອນເງິນເຂົ້າຂອງບໍລິສັດ (ເພື່ອຊໍາລະສິນຄ້າ) ກວມເອົາ 64.64%; ບຸກຄົນ (ຄອບຄົວ) ກວມເອົາ 7.26% ແລະ ການລົງທຶນ ກວມເອົາ 28.11%.
ທ່ານ ອຸແກ້ວ ສີພັນດອນ ໃຫ້ຮູ້ຕື່ມວ່າ: ໃນປີ 2026 ທຫລ.ພຕ ຈະປະສານສົມທົບກັບຂະແໜງການກ່ຽວຂ້ອງຂອງແຂວງ ສືບຕໍ່ຕິດຕາມກະແສໂອນເງິນເຂົ້າ-ອອກ ແລະ ການຊື້-ຂາຍຂອງທະນາຄານທຸລະກິດ ໂດຍສະເພາະການຊື້ເງິນຕາຕ່າງປະເທດຈາກຜູ້ສົ່ງອອກ ແລະ ການຂາຍເງິນຕາຕ່າງປະເທດໃຫ້ແກ່ການນຳເຂົ້າສິນຄ້າ; ຕິດຕາມກວດກາການນຳເງິນຕາເຂົ້າ-ອອກ ສປປ ລາວ, ເກັບກຳຂໍ້ມູນການສົ່ງອອກ-ນຳເຂົ້າສິນຄ້າ ຕາມດ່ານສາກົນ ແລະ ດ່ານປະເພນີ; ຕິດຕາມ ແລະ ຄຸ້ມຄອງອັດຕາແລກປ່ຽນບໍ່ໃຫ້ສ້າງຄວາມກົດດັນຕໍ່ອັດຕາເງິນເຟີ້; ຄວບຄຸມອັດຕາເງິນເຟີ້ບໍ່ໃຫ້ເກີນລະດັບໜື່ງຕົວເລກ ຕາມສະພາແຫ່ງຊາດຮັບຮອງ; ຕິດຕາມ ແລະ ຄຸ້ມຄອງລາຍຮັບເງິນຕາຕ່າງປະເທດຈາກການສົ່ງອອກ ຜ່ານລະບົບຄຸ້ມຄອງກະແສເງິນຕາຕ່າງປະເທດ (CAPITAL FLOW MANAGEMENT SYSTEM ຫຼື CMS) ໃຫ້ເຂົ້າສູ່ລະບົບທະນາຄານ ກວມເອົາ 75% ຂອງມູນຄ່າການສົ່ງອອກ.
 |
(ຂ່າວ: ສັນຍາ)
ຄໍາເຫັນ