ທົບທວນ ການຈັດຕັ້ງປະຕິບັດວຽກງານຄວບຄຸມຢາສູບ

ກອງປະຊຸມຄັ້ງນີ້, ຈັດຂຶ້ນເພື່ອລາຍງານການຈັດຕັ້ງປະຕິບັດ ວຽກງານຄວບຄຸມຢາສູບໄລຍະຜ່ານມາ, ລາຍງານຄວາມຄືບໜ້າຂອງສັນຍາການລົງທຶນໃນກິດຈະການຢາສູບ, ກົນໄກການເກັບອາກອນຊົມໃຊ້ຢາສູບ ແລະ ງົບປະມານເຂົ້າກອງທຶນຄວບຄຸມຢາສູບ ຕາມກົດໝາຍກໍານົດ, ພາຍຫຼັງສັນຍາສິ້ນສຸດໃນເດືອນທັນວາ 2026 ແລະ ລາຍງານຄວາມຄືບໜ້າ ແລະ ສິ່ງທ້າທາຍ ໃນການຈັດຕັ້ງປະຕິບັດການຫ້າມຢາສູບໄຟຟ້າ ແລະ ການຕະຫຼາດຂອງຜະລິດຕະພັນຢາສູບຮູບແບບໃໝ່ ພ້ອມທັງປຶກສາຫາລືບັນຫາອື່ນໆ ໃນການປະຕິບັດກົດໝາຍ ແລະ ລະບຽບການຄວບຄຸມຢາສູບໃນ ສປປ ລາວ

ທ່ານ ນາງ ໃບຄໍາ ຂັດທິຍະ ກ່າວວ່າ: “ອຸດສາຫະກຳຢາສູບຍັງຄົງເປັນອຸປະສັກທີ່ໃຫຍ່ຫຼວງທີ່ສຸດຕໍ່ວຽກງານສາທາລະນະສຸກ ແລະ ການພັດທະນາ ເຮັດໃຫ້ເກີດພະຍາດບໍ່ຕິດຕໍ່ຫຼາຍຊະນິດ ເປັນຕົ້ນ ພະຍາດຫົວໃຈ-ເສັ້ນເລືອດ, ພະຍາດປອດອັກເສບຊໍ້າເຮື້ອ ແລະ ອື່ນໆ, ໃນແຕ່ລະປີ ສປປ ລາວ ມີຄົນເສຍຊີວິດຍ້ອນພະຍາດທີ່ມີສາເຫດມາຈາກການຊົມໃຊ້ຢາສູບປະມານຫຼາຍກວ່າ 6,000 ຄົນ ຊຶ່ງເຮັດໃຫ້ມີຜົນກະທົບ ແລະ ມີການສູນເສຍທາງເສດຖະກິດປະມານ 3.6 ຕື້ກີບ.

ໄລຍະນີ້, ຍັງສັງເກດເຫັນວ່າ ມີຜະລິດຕະພັນຢາສູບຮູບແບບໃໝ່ປະກົດຂຶ້ນ ແລະ ຂາຍຕາມທ້ອງຕະຫຼາດໃນ ສປປ ລາວ, ກ່ຽວກັບປະເດັນນີ້, ທາງກະຊວງສາທາລະນະສຸກມີຄວາມເປັນຫ່ວງຫຼາຍ ເພາະວ່າການຕະຫຼາດແມ່ນແນໃສ່ກຸ່ມໄວໝຸ່ມ ຊຶ່ງເປັນກຸ່ມທີ່ອ່ອນແອ ແລະ ຢາກຮູ້ຢາກລອງ. ການອອກກົດໝາຍ ແລະ ນິຕິກໍາພຽງຢ່າງດຽວແມ່ນບໍ່ພຽງພໍທີ່ຈະສົ່ງເສີມສຸຂະພາບ, ການປົກປ້ອງສຸຂະພາບ ແລະ ການຊ່ວຍຊີວິດຂອງປະຊາຊົນ; ພວກເຮົາຕ້ອງພ້ອມພຽງກັນຈັດຕັ້ງປະຕິບັດ ແລະ ບັງຄັບໃຊ້ກົດໝາຍ ແລະ ນິຕິກໍາດັ່ງກ່າວໃຫ້ເຂັ້ມງວດ ນັບແຕ່ສູນກາງຮອດທ້ອງຖິ່ນ ແລະ ປາສະຈາກການແຊກແຊງຂອງບັນດາບໍລິສັດຢາສູບຕໍ່ການພັດທະນາ ແລະ ບັງຄັບໃຊ້ກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ຊຶ່ງການມີສ່ວນຮ່ວມຂອງບັນດາຂະແໜງການທີ່ກ່ຽວ ຂ້ອງໃນການພັດທະນາ ແລະ ບັງຄັບໃຊ້ນະໂຍບາຍ, ນິຕິກໍາ ແລະ ດໍາລັດ ແມ່ນມີຄວາມຈໍາເປັນອັນຮີບດ່ວນ ແລະ ເປັນໃຈກາງຂອງວຽກງານຄວບຄຸມຢາສູບ.

ຂ່າວ: ສູນຂ່າວສານການແພດສຸຂະສຶກສາ