ທ່ານ ຟາຣຮານ ຮັດ ຮອງໂຄສົກຂອງເລຂາທິການໃຫຍ່ອົງການສະຫະປະຊາຊາດ ກ່າວໃນກອງປະຊຸມຖະແຫຼງຂ່າວວ່າ: ແທນທີ່ໂລກຈະສືບຕໍ່ຟື້ນຟູຢ່າງຕໍ່ເນື່ອງຫຼັງຈາກວິກິດການຕ່າງໆທີ່ເກີດຂຶ້ນໃນໄລຍະປີ 2020-2021, ແຕ່ພົບວ່າຄວາມຄືບໜ້າດ້ານການພັດທະນາຍັງອ່ອນແອກວ່າທີ່ຄາດໄວ້. ໂດຍອີງຕາມບົດລາຍງານການພັດທະນາມະນຸດ ຂອງອົງການພັດທະນາແຫ່ງສະຫະລັດປະຊາຊົນ (UNDP).
ທ່ານ ອາຄິມ ສະໄຕເນີ ຜູ້ອຳນວຍການໃຫຍ່ອົງການUNDP ກ່າວວ່າ: ການຄາດຄະເນສຳລັບປີ 2024 ເປີດເຜີຍໃຫ້ເຫັນວ່າຄວາມກ້າວໜ້າດ້ານດັດຊະນີການພັດທະນາມະນຸດ (HDI) ໄດ້ຢຸດສະງັກໃນທຸກຂົງເຂດທົ່ວໂລກ. ຖ້າຫາກທ່າອ່ຽງການເຕີບໂຕທີ່ຊ້າລົງນີ້ກາຍເປັນເລື່ອງປົກກະຕິໃໝ່ໂລກຈະປະເຊີນກັບຄວາມອ່ອນແອຫຼາຍຂຶ້ນ. ທັງໃນດ້ານຄວາມໝັ້ນຄົງ, ວິກິດການເສດຖະກິດແລະສິ່ງແວດລ້ອມ
ບົດລາຍງານສະບັບນີ້ວິເຄາະຄວາມກ້າວໜ້າຂອງການພັດທະນາຜ່ານຕົວຊີ້ວັດຕ່າງໆເຊັ່ນ: ສຸຂະພາບ, ການສຶກສາແລະລະດັບລາຍຮັບ.
ຂໍ້ມູນດັ່ງກ່າວຍັງສະແດງໃຫ້ເຫັນວ່າ: ຄວາມບໍ່ສະເໝີພາບລະຫວ່າງປະເທດທີ່ມີຄ່າHDI ຕ່ຳ ກັບປະເທດທີ່ມີ HDI ສູງຫຼາຍໄດ້ສືບຕໍ່ຂະຫຍາຍຕົວເປັນປີທີ 4 ຕິດຕໍ່ກັນ. ໂດຍສິ່ງທ້າທາຍສໍາລັບປະເທດທີ່ມີ HDI ຕ່ໍາສຸດນັ້ນທະວີຄວາມຮຸ່ນແຮງຂຶ້ນຈາກຄວາມເຄັ່ງຕຶງດ້ານການຄ້າ, ວິກິດການໜີ້ສິນທີ່ເພີ່ມຂຶ້ນແລະທ່າອ່ຽງການພັດທະນາອຸດສາຫະກຳທີ່ບໍ່ມີການຈ້າງງານ.
ບົດລາຍງານຍັງໄດ້ເປີດເຜີຍຜົນການສຳຫຼວດໃໝ່ທີ່ສະແດງໃຫ້ເຫັນວ່າ: ຜູ້ຄົນເບິ່ງໂລກຕາມຄວາມເປັນຈິງ. ແຕ່ໃນຂະນະດຽວກັນກໍຍັງມີຄວາມຫວັງຕໍ່ການປ່ຽນແປງທີ່ເກີດຈາກAI, ໂດຍຫົກໃນສິບຄົນຄາດວ່າ AI ຈະສົ່ງຜົນດີຕໍ່ການຈ້າງງານແລະອາດຈະສ້າງໂອກາດໃນອາຊີບທີ່ຍັງບໍ່ມີຢູ່ໃນປັດຈຸບັນ.
ທັງນີ້, ບົດລາຍງານດັ່ງກ່າວສະໜັບສະໜູນວິທີການໃຊ້AI ທີ່ຖືມະນຸດເປັນສູນກາງ. ພ້ອມທັງສະເໜີ 3 ດ້ານທີ່ສຳຄັນທີ່ຕ້ອງໄດ້ດຳເນີນການແກ້ໄຂຄື: ສ້າງເສດຖະກິດທີ່ມະນຸດຮ່ວມມືກັບ AI ແທນທີ່ຈະແຂ່ງຂັນກັນ,ການເສີມຂະຫຍາຍບົດຂອງມະນຸດຕະຫຼອດວົງຈອນຊີວິດຂອງAI, ຕັ້ງແຕ່ການອອກແບບໄປຈົນເຖິງການໃຊ້ງານ ແລະການປັບປຸງລະບົບການສຶກສາ ແລະສຸຂະພາບ ໃຫ້ທັນສະໄໝເພື່ອຕອບສະໜອງຄວາມຕ້ອງການຂອງສະຕະວັດທີ 21.
ຄໍາເຫັນ