ນັກຄົ້ນຄວ້າໄດ້ດໍາເນີນການທົບທວນການສຶກສາຄົ້ນຄວ້າ 57 ລາຍການຢ່າງເປັນລະບົບ. ເພື່ອກວດກາເບິ່ງວ່າການນຳໃຊ້ເຕັກໂນໂລຊີມີສ່ວນຊ່ວຍ ຫຼືຶ ເປັນອັນຕະລາຍຕໍ່ສະຕິປັນຍາຂອງກຸ່ມຜູ້ໃຫຍ່ໃນຍຸກທຳອິດທີ່ນຳໃຊ້ອຸປະກອນດີຈີຕອນເປັນເວລາດົນນານເຊັ່ນ: ໂທລະສັບມືຖື, ແທັບເລັດ ແລະ ຄອມພິວເຕີ. ໂດຍການສຶກສາຄັ້ງນີ້ມີຜູ້ໃຫຍ່ເຂົ້າຮ່ວມຫຼາຍກວ່າ 411,000 ຄົນທີ່ມີອາຍຸສະເລ່ຍ 69 ປີ.
ທ່ານ ຈາເຣັດ ເບນ ນັກຊ່ຽວຊານດ້ານຈິດຕະວິທະຍາ ຈາກຄະນະແພດເດລ ມະຫາວິທະຍາໄລເທັກຊັສ, ວິທະຍາເຂດອອສຕິນ ແລະ ທ່ານ ໄມເຄິນ ສະຄັລລິນ ຜູ້ຊ່ວຍສາດສະດາຈານດ້ານຈິດຕະວິທະຍາ ແລະ ປະສາດວິທະຍາ ປະຈຳມະຫາວິທະຍາໄລເບເລີ ກ່າວວ່າ: ການວິເຄາະໄດ້ເປີດເຜີຍວ່າເຕັກໂນໂລຊີອາດມີບົດບາດໃນການຮັກສາການເຮັດວຽກຂອງສະໝອງບໍ່ແມ່ນເຮັດໃຫ້ການເຮັດວຽກຂອງສະໝອອງຮ້າຍແຮງຂຶ້ນ.
ໃນວັນທີ 26 ພຶດສະພາ ຜ່ານມາ, ສື່ມວນຊົນທ້ອງຖິ່ນຂອງ ສະຫະລັດ ອາເມຣິກາ ລາຍງານຜົນຂອງການສຶກສາດັ່ງກ່າວໂດຍລະບຸວ່າ: ເຫດຜົນທີ່ເປັນໄປໄດ້ຄືສິ່ງທ້າທາຍຂອງການນໍາໃຊ້ ແລະ ການປັບຕົວກັບການປ່ຽນແປງຂອງເຕັກໂນໂລຊີດີຈີຕອນອາດຊ່ວຍກະຕຸ້ນການຮັບຮູ້ ຊຶ່ງຊ່ວຍຮັກສາການເຮັດວຽກຂອງສະໝອງ. ອີກປະການໜຶ່ງຄືເຕັກໂນໂລຊີສາມາດເຮັດໃຫ້ການພົວພັນທາງສັງຄົມງ່າຍຂຶ້ນສໍາລັບບາງຄົນ ຊຶ່ງກ່ຽວຂ້ອງກັບການເຮັດວຽກດ້ານການຮັບຮູ້ຂອງມັນສະໝອງທີ່ດີຂຶ້ນໃນຜູ້ອາຍຸສູງ.
ຄໍາເຫັນ