ທີ່ສະຖາບັນວິຈິດສິນແຫ່ງຊາດເປັນກຽດເຂົ້າຮ່ວມມີທ່ານຄຳສຸກ ແກ້ວວົງຊາຍ ຜູ້ອຳນວຍການສະຖາບັນວິຈິດສິນແຫ່ງຊາດ,ມີບັນດາແຂກຖືກເຊີນ,ພະນັກງານຄູ-ອາຈານ, ນັກສຶກສາເຂົ້າຮ່ວມ.
ທ່ານຄຳສຸກ ແກ້ວວົງຊາຍ ກ່າວວ່າ: ການຈັດງານໃນຄັ້ງນີ້ ເພື່ອສະເຫຼີມສະຫຼອງວັນວິຈິດສິນລາວຄົບຮອບ 65 ປີ ຊຶ່ງມີສິນລະປິນ, ນັກຮຽນ, ນັກສຶກສາທີ່ກຳລັງສຶກສາຢູ່ ແລະ ຜູ້ທີ່ໄດ້ສຳເລັດການສຶກສາໄປແລ້ວໄດ້ມາເຕົ້າໂຮມກັນເພື່ອສະແດງຜົນງານຂອງຕົນອອກສູ່ສັງຄົມໃຫ້ນັບມື້ນັບກວ້າງຂວາງ. ສະຖາບັນວິຈິດສິນແຫ່ງຊາດ ເປັນຫົວໜ່ວຍວິຊາການລະດັບ 1 ຂຶ້ນກັບກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ມີບົດບາດໃນການຈັດຕັ້ງການສຶກສາ,ການຄົ້ນຄວ້າວິໄຈດ້ານວິຈິດສິນ, ສິລະປະວັດທະນະທໍາໃນສາຂາຕ່າງໆໃນລະດັບຊັ້ນສູງ,ປະລິນຍາຕີ, ປະລິນຍາໂທ ຫຼືສູງກວ່ານັ້ນ. ພັດທະນາຫຼັກສູດການຮຽນ-ການສອນ,ຈັດຕັ້ງຄົ້ນຄວ້າທາງວິທະຍາສາດ, ອະນຸລັກສົ່ງເສີມສິລະປະ-ວັດທະນະທຳອັນດີງາມຂອງຊາດ,ເຜີຍແຜ່ຜົນສຳເລັດຂອງການຄົ້ນຄວ້າວິທະຍາສາດ ແລະ ໃຫ້ການບໍລິການທາງດ້ານວິຊາການ,ວິຊາສະເພາະໃຫ້ແກ່ສັງຄົມ.ການຈັດງານຄັ້ງນີ້ ເປັນຄັ້ງທີ 3 ເພື່ອເປັນການສົ່ງເສີມໃຫ້ມີການສ້າງຜະລິດຕະພັນທາງດ້ານວິຈິດສິນໃຫ້ຫຼາກຫຼາຍ ລວມທັງເປັນການໂຄສະນາເຜີຍແຜ່ວຽກງານວິຈິດສິນ ເຮັດໃຫ້ສັງຄົມຮັບຮູ້ ແລະ ສະໜັບສະໜູນວຽກງານວິຈິດສິນໃຫ້ມີການພັດທະນານັບມື້ນັບຫຼາຍຂຶ້ນ.
ສຳລັບກິດຈະກຳວາງສະແດງຜົນງານເລີ່ມແຕ່ວັນທີ 6-10 ພະຈິກ 2024,ມີຫຼາຍພາກສ່ວນທີ່ກ່ຽວຂ້ອງໄດ້ໃຫ້ຄວາມຮ່ວມມືນຳເອົາຜົນງານວິຈິດສິນມາວາງສະແດງຮ່ວມກັນເຊັ່ນ:ພາກວິຊາຈິດຕະກຳ40 ຜົນງານ,ພາກວິຊາປະຕິມາກໍາ500 ຜົນງານ,ພາກວິຊາສິລະປະພາບພິມ350 ຜົນງານ,ພາກວິຊາພື້ນເມືອງ ແລະ ປະຕິສັງຂອນ100 ຜົນງານ,ພາກວິຊາອອກແບບນິເທດສິນ350 ຜົນງານ,ສາມອົງການຈັດຕັ້ງມະຫາຊົນ 65 ຜົນງານ,ຕາງໜ້າກົມມໍຣະດົກ30 ຜົນງານ,ນອກຈາກນີ້ຍັງມີຜົນງານຈຳນວນໜຶ່ງທີ່ນໍາມາສະແດງໃນຄັ້ງນີ້ຈາກອະດີດຜູ້ອໍານວຍການສະຖາບັນວິຈິດສິນແຫ່ງຊາດ, ອະດີດຄູ-ອາຈານພະນັກງານອາວຸໂສບຳນານ, ອະດີດນັກສຶກສາອື່ນໆລວມທັງໝົດ 1,797 ຜົນງານ.
ຂ່າວ:ບຸນຕອມ, ຮູບ:ບຸນອຸ້ມ
ຄໍາເຫັນ