ວຽກງານໂຄສະນາອົບຮົມຂອງພັກ

1.ວຽກງານໂຄສະນາອົບຮົມ ໃນໄລຍະທີ່ມີການຈັດຕັ້ງພັກນໍາພາຕໍ່ສູ້ປົດປ່ອຍປະເທດຊາດ (1955-1975).

ພາຍຫຼັງມີການຈັດຕັ້ງພັກນຳພາວຽກງານໂຄສະນາອົບຮົມ ແມ່ນໄດ້ສຸມໃສ່ການໂຄສະນາ ຂົນຂວາຍປະຊາຊົນບັນດາເຜົ່າ ໃຫ້ເພີ່ມທະວີນ້ຳໃຈຮັກຊາດ, ຮັກບ້ານເກີດເມືອງນອນ ແລະ ພ້ອມກັນລຸກຂຶ້ນຕໍ່ສູ້ຕ້ານກັບຈັກກະພັດ ແລະ ລູກມືຂອງມັນ.

ຮູບການໂຄສະນາອົບຮົມ ແມ່ນນຳໃຊ້ກອງໂຄສະນາປະກອບອາວຸດ ໂດຍປະຕິບັດຕາມທິດຊີ້ນຳທີ່ວ່າ: “3 ຮ່ວມ 5 ບາດກ້າວ”.ການນຳພາແມ່ນປະຕິບັດຕາມຫຼັກການຂອງພັກ ທັງກຳແໜ້ນສະພາບການ ແລະ ກຳແໜ້ນກາລະໂອກາດ ເພື່ອນຳພາປະຊາຊົນຕໍ່ສູ້ປົດປ່ອຍຊາດຈົນຍາດເອົາໄຊຊະນະ ແລະ ມີຜົນສຳເລັດເປັນກ້າວໆມາ. ເຫດການທີ່ພົ້ນເດັ່ນ ແມ່ນການລຸກຂຶ້ນຢຶດອຳນາດທົ່ວປະເທດ ດ້ວຍຍຸດທະວິທີທີ່ສະຫຼຽວສະຫຼາດ ແລະ ຄ່ອງແຄ້ວ ແບບບົວບໍ່ຊ້ຳ ນ້ຳບໍ່ຂຸ່ນ ໂດຍນຳໃຊ້ 3 ບາດຄ້ອນຍຸດທະສາດ ເຮັດໃຫ້ປະເທດຊາດໄດ້ສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ປີ 1975 ຂຶ້ນຢ່າງສະຫງ່າງາມ.

2. ວຽກງານໂຄສະນາອົບຮົມ ໃນໄລຍະແຫ່ງການຟື້ນຟູບູລະນະປະເທດຊາດ ແລະ ປົກປັກຮັກສາລະບອບໃໝ່ (1976-1985).

ວຽກງານໂຄສະນາອົບຮົມໃນໄລຍະນີ້ ແມ່ນໄດ້ສຸມໃສ່ປຸກລະດົມນ້ຳໃຈຮັກຊາດ, ຮັກບ້ານເກີດເມືອງນອນ, ຮັກສາໝາກຜົນຂອງການປະຕິວັດ, ຍົກສູງນ້ຳໃຈຄຽດແຄ້ນ ແລະ ເຫັນໄດ້ກົນອຸບາຍຂອງສັດຕູຕໍ່ປະເທດຊາດ ແລະ ຕໍ່ປະຊາຊົນບັນດາເຜົ່າຂອງພວກເຮົາ. ທົ່ວສັງຄົມມີສະຕິລະວັງຕົວນັບມື້ສູງຂຶ້ນ ເປັນເງື່ອນໄຂ ແລະ ເປັນພື້ນຖານໃນການຕອບໂຕ້ທຸກເຫດການ, ປະກົດການຫຍໍ້ທໍ້ທີ່ເກີດຂຶ້ນນັບທັງຖ້ອຍທຳນອງບິດເບືອນຂອງສັດຕູ ແລະ ກຸ່ມຄົນບໍ່ດີ ແມ່ນຖືກສະກັດກັ້ນໄດ້ຢ່າງທັນການ.

3. ວຽກງານໂຄສະນາອົບຮົມ ໃນພາລະກິດປ່ຽນແປງໃໝ່ (ປີ 1986-ມາເຖິງປັດຈຸບັນ) ກໍໄດ້ສຸມໃສ່ ຄືດັ່ງນີ້:

1). ສຶກສາອົບຮົມພະນັກງານ-ສະມາຊິກພັກ ແລະ ປະຊາຊົນ ໂດຍສະເພາະແມ່ນຄົນຮຸ່ນໜຸ່ມໃຫ້ມີນ້ຳໃຈຮັກຊາດ, ນ້ຳໃຈສາມັກຄີປອງດອງ, ໃຫ້ມີຄວາມເອກອ້າງທະນົງໃຈຕໍ່ກັບມູນເຊື້ອປະຕິວັດທີ່ສະຫງ່າອົງອາດຂອງພັກ ແລະ ຂອງປະຊາຊົນເຮົາ, ກ່ຽວກັບອຸດົມການສັງຄົມນິຍົມ, ຫຼັກໝັ້ນຊົນຊັ້ນທີ່ໜັກແໜ້ນ, ກຳຈັດແກ້ໄຂທຸກປະກົດການຂອງແນວຄິດຄັບແຄບ, ຖືຕົວຕ່ຳ, ແນວຄິດລັ່ງເລ, ຢ້ານແຕ່ຄວາມຫຍຸ້ງຍາກ, ຫຼຸດຜ່ອນຄວາມເຊື່ອໝັ້ນຕໍ່ກັບສັງຄົມນິຍົມ.

2). ສຶກສາອົບຮົມກ່ຽວກັບສະຕິ ແລະ ພັນທະໃນການປົກປັກຮັກສາ ແລະ ສ້າງສາພັດທະນາປະເທດຊາດ, ເຊີດຊູສະຕິລະວັງຕົວຕ້ານທຸກກົນອຸບາຍ, ເລ່ລ່ຽມຂອງຈັກກະພັດ ແລະ ອິດທິກຳລັງປໍລະປັກ, ກຳຈັດແກ້ໄຂປະກົດການຈຳແນກບໍ່ໄດ້ລະຫວ່າງມິດກັບສັດຕູ.

3). ສຶກສາອົບຮົມກ່ຽວກັບມູນເຊື້ອດຸໝັ່ນອອກແຮງງານປະດິດສ້າງ, ນ້ຳໃຈສະແຫວງຫາຄວາມກ້າວໜ້າ, ກ້າຄິດ, ກ້າເຮັດ, ກ້າຮັບຜິດຊອບ; ສ້າງແບບແຜນດຳລົງຊີວິດປອດໃສ, ງ່າຍດາຍ, ປະຢັດມັດທະຍັດ, ຮູ້ຮັກສາຮີດຄອງປະເພນີອັນດີງາມຂອງຊາດ, ຕ້ານທຸກປະກົດການຂີ້ຄ້ານ, ມັກງ່າຍ, ແລ່ນນຳເງິນ, ຫຼິ້ນກິນຟຸ່ມເຟືອຍ, ເສື່ອມຊາມ.

4). ສຶກສາອົບຮົມກ່ຽວກັບສະຕິເຄົາລົບລະບຽບກົດໝາຍ, ຕ້ານການສໍ້ລາດບັງຫຼວງ, ຕ້ານການກະທຳທີ່ກໍ່ຄວາມວຸ້ນວາຍຕໍ່ຄວາມເປັນລະບຽບຮຽບຮ້ອຍຂອງສັງຄົມ.

5). ສຶກສາອົບຮົມກ່ຽວກັບລັກສະນະນຳໜ້າເປັນແບບຢ່າງຂອງພະນັກງານ, ສະມາຊິກພັກ, ຕໍ່ສູ້ຕ້ານແນວຄິດຄັບແຄບ, ເຫັນແກ່ຈຸ້ມເຈື້ອ, ເຊື້ອສາຍ, ພາກສ່ວນ, ທ້ອງຖິ່ນ; ຕ້ານແນວຄວາມຄິດຊິນເຄີຍແບບເກົ່າ, ຂີ້ຄ້ານ, ບໍ່ຢາກຄົ້ນຄິດ, ແບບແຜນອາດຍາສິດ, ຫ່າງເຫີນຈາກມະຫາຊົນ, ລໍຄອຍ, ເອື່ອຍອີງແຕ່ການຈັດຕັ້ງ.

(ຂໍ້ມູນຈາກ: ກົມອົບຮົມ ຄອສພ)