ເຈົ້າແຂວງໄຊສົມບູນ, ມີຮອງເຈົ້າແຂວງ ພ້ອມດ້ວຍບັນດາຫົວໜ້າ-ຮອງຫົວໜ້າພະແນກການ, ອົງການ, ກົມກອງອ້ອມຂ້າງແຂວງເຂົ້າຮ່ວມ.
ທ່ານ ພອຍຄໍາ ຮຸ່ງບຸນຍວງ ໄດ້ຍົກໃຫ້ເຫັນວ່າ: ກອງປະຊຸມໃນຄັ້ງນີ້ ທຸກພາກສ່ວນຕ້ອງໄດ້ພ້ອມກັນສະຫຼຸບ ຕີລາຄາຄືນການຈັດຕັ້ງປະຕິບັດວຽກງານ ຂອງອົງການປົກຄອງແຂວງ ໃນໄລຍະ 1 ປີຜ່ານມາ ຕາມມະຕິທີ່ສະພາປະຊາຊົນແຂວງໄດ້ຮັບຮອງຜ່ານມາ ເພື່ອສະແດງໃຫ້ເຫັນຜົນງານອັນພົນເດັ່ນ ແລະ ບັນຫາຈຸດອ່ອນ, ຂໍ້ຂົງຄ້າງຕ່າງໆ ທີ່ເຮັດໃຫ້ວຽກງານບໍ່ບັນລຸຜົນສໍາເລັດຕາມລະດັບຄາດໝາຍ, ພ້ອມກັນປຶກສາຫາລື ຄົ້ນຄວ້າ ແລະ ກໍານົດແຜນວຽກຈຸດສຸມໃນປີຕໍ່ໜ້າ ໃຫ້ລະອຽດ ແລະ ຮັດກຸມ ເພື່ອຮັບປະກັນໃຫ້ວຽກງານສາມາດບັນລຸຜົນສໍາເລັດຫຼາຍຂຶ້ນກວ່າເກົ່າ. ຈາກນັ້ນ, ທ່ານ ອຸເງິນ ດວງມະນີ, ຮອງຫົວໜ້າຫ້ອງວ່າແຂວງ ໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານພົ້ນເດັ່ນ ຂອງອົງການປົກຄອງແຂວງປະຈໍາປີ 2024 ແລະ ທິດທາງແຜນການ ປະຈໍາປີ 2025. ຕະຫຼອດໄລຍະ 1 ປີ ຜ່ານມາ ອົງຄະນະພັກ, ອົງການປົກຄອງແຂວງ ໄດ້ເອົາໃຈໃສ່ຈັດຕັ້ງປະຕິບັດວຽກງານສຶກສາອົບຮົມການເມືອງແນວຄິດ ຕິດພັນກັບການຜັນຂະຫຍາຍ ແລະ ຈັດຕັ້ງປະຕິບັດບັນດາມະຕິກອງປະຊຸມຕ່າງໆ, ແຜນພັດທະນາເສດຖະກິດ-ສັງຄົມຂອງແຂວງ ແລະ 2 ວາລະແຫ່ງຊາດ ຊຶ່ງໄດ້ເຮັດໃຫ້ແຕ່ລະຂົງເຂດວຽກງານມີຜົນສໍາເລັດເປັນກ້າວໆ ເປັນຕົ້ນແມ່ນເຮັດໃຫ້ເສດຖະກິດມະຫາພາກຂອງແຂວງ ສືບຕໍ່ຂະຫຍາຍຕົວ ແລະ ໝັ້ນທ່ຽງ ຕາມທິດຫັນເປັນທັນສະໄໝ, ລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 7.5%, ລວມມູນຄ່າທັງໝົດ 2,542.84 ຕື້ກີບ, ສະເລ່ຍໃສ່ຫົວຄົນ ສາມາດບັນລຸ 24 ລ້ານກວ່າກີບ ຫຼື ເທົ່າກັບ 1,106 ໂດລາສະຫະລັດ ຂອງຈໍານວນພົນລະເມືອງທັງໝົດ 105,000 ຄົນ. ພ້ອມນັ້ນ ບັນດາພະແນກການຂອງແຂວງ ໄດ້ພ້ອມກັນລາຍງານ ແລະ ປະກອບຄໍາເຫັນຄິດເຫັນຕໍ່ວຽກງານສໍາຄັນ ທີ່ຈະຕ້ອງໄດ້ສືບຕໍ່ປັບປຸງ, ແກ້ໄຂໃນຕໍ່ໜ້າ ໃຫ້ໄດ້ຮັບຜົນດີເປັນຕົ້ນ ແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2024 ແລະ ທິດທາງແຜນການປະຈໍາປີ 2025.
(ຂ່າວ: ພາພອນ ນະວົງໄຊ)
ຄໍາເຫັນ