ໄຊສົມບູນ ເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງ

 ລັດຖະມົນຕີກະຊວງພາຍໃນ, ມີຫົວໜ້າກົມຄຸ້ມຄອງພົນລະເມືອງ ກະຊວງພາຍໃນ ພ້ອມດ້ວຍບັນດາພະແນກການກ່ຽວຂ້ອງຂອງແຂວງ ແລະ ເມືອງເຂົ້າຮ່ວມ.
ທ່ານພອຍຄໍາ ຮຸ່ງບຸນຍວງ ໄດ້ຍົກໃຫ້ເຫັນວ່າ: ວຽກງານຄຸ້ມຄອງພົນລະເມືອງໃນໄລຍະຜ່ານມາ ຍັງເຫັນວ່າພົບຄວາມຫຍຸ້ງຍາກ ແລະ ສັບສົນ. ສະນັ້ນ, ການເປີດຂະບວນການໃນຄັ້ງນີ້ ຈະຊ່ວຍໃຫ້ລະບົບການຄຸ້ມຄອງພົນລະເມືອງຂອງແຂວງມີຄວາມທັນສະໄໝ ແລະ ສະດວກວ່ອງໄວ ຂຶ້ນກວ່າເກົ່າ.
ໂອກາດນີ້, ທ່ານ ລິໄລວົງ ບຸດດາຄໍາ ໄດ້ຍົກໃຫ້ເຫັນຄວາມໝາຍສໍາຄັນຂອງວຽກງານການຈົດທະບຽນ ແລະ ສະຖິຕິພົນລະເມືອງ ຊຶ່ງເປັນວຽກງານໜຶ່ງ ທີ່ມີຄວາມສຳຄັນ ເນື່ອງຈາກຕິດພັນກັບການປົກປ້ອງສິດຜົນປະໂຫຍດຂອງພົນລະເມືອງ ກໍຄືທຸກຄົນຕ້ອງໄດ້ຮັບເອກະສານສໍາຄັນທາງດ້ານກົດໝາຍ ຈາກການຈົດທະບຽນການເກີດ, ການແຕ່ງດອງ, ການຢ່າຮ້າງ, ການເສຍຊີວິດ ແລະ ເຫດການອື່ນໆທີ່ສໍາຄັນໃນຊີວິດ ເພື່ອລະບຸຕົວຕົນ, ສະຖານະພາບການເປັນພົນລະເມືອງ ແລະ ການປະຕິບັດສິດຕ່າງໆ. ການເປີດຂະບວນການຈົດທະບຽນການເກີດໃນຄັ້ງນີ້, ແມ່ນເປັນການສ້າງຂະບວນປຸກລະດົມຄວາມຮັບຮູ້ ແລະ ຄວາມຕື່ນຕົວຂອງພົນລະເມືອງ ໃຫ້ມາຊົມໃຊ້ການບໍລິການລະບົບການຈົດທະບຽນການເກີດ ຜ່ານລະບົບເອເລັກໂຕຼນິກຢ່າງທົ່ວເຖິງ ແລະ ກວ້າງຂວາງ ເພື່ອອໍານວຍຄວາມສະດວກ ໃຫ້ແກ່ການຄຸ້ມຄອງ, ນໍາໃຊ້, ປົກປັກຮັກສາ, ການປິ່ນປົວ, ການສຶກສາ, ການປົກປ້ອງທາງສັງຄົມ ແລະ ການຄົ້ນຫາຂໍ້ມູນໃນກໍລະນີພັດພາກ ໄດ້ສະດວກ ແລະ ວ່ອງໄວ. ຈາກນັ້ນ ໄດ້ຮ່ວມກັນຕັດແຖບຜ້າເພື່ອເປີດຂະບວນການດັ່ງກ່າວ ຢ່າງເປັນທາງການ ພ້ອມທັງມອບໃບຢັ້ງຍືນການເກີດໃຫ້ແກ່ນ້ອງນ້ອຍນັກຮຽນ ນໍາອີກ.
ໂອກາດນີ້, ກົມຄຸ້ມຄອງຜົນລະເມືອງ ກະຊວງພາຍໃນ ຍັງໄດ້ມອບອຸປະກອນຮັບໃຊ້ຈໍານວນໜຶ່ງ ໃຫ້ພະແນກ ແລະ ຫ້ອງການພາຍໃນ 5 ເມືອງ ເພື່ອໝູນໃຊ້ເຂົ້າໃນວຽກງານຈົດທະບຽນ ໃຫ້ເກີດປະໂຫຍດສູງສຸດ.
(ຂ່າວ: ພາພອນ ນະວົງໄຊ)