ໂດຍການເປັນປະທານຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ ຜູ້ຊີ້ນຳວຽກງານວັດທະນະທຳ-ສັງຄົມ, ມີທ່ານ ລີເຢີ ໄຊຍະຊ້າງ ຫົວໜ້າອົງການກາແດງແຂວງ.
ທ່ານ ລີເຢີ ໄຊຍະຊ້າງ ໄດ້ຂຶ້ນຜ່ານຂໍ້ຕົກລົງແຕ່ງຕັ້ງຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດ ແລະ ຜ່ານບົດສະຫຼຸບການຈັດຕັ້ງປະຕິບັດວຽກງານຈັດຫາເລືອດ ຂອງອົງການກາແດງແຂວງ ປະຈຳປີ 2024 ແລະ ທິດທາງແຜນການ 2025. ໃນໄລຍະຜ່ານມາ ອົງການກາແດງແຂວງ ໄດ້ຂຶ້ນແຜນອອກເຄື່ອນໄຫວຮັບບໍລິຈາກເລືອດຮ່ວມກັບບັນດາພະແນກການອ້ອມຂ້າງແຂວງ ແລະ ເມືອງ ຈຳນວນ 13 ຄັ້ງ, ວຽກງານປຸກລະດົມ ການຮັບບໍລິຈາກເລືອດ ໄດ້ຕິດຕໍ່ພົວພັນສະຖານທີ່ຮັບບໍລິຈາກເລືອດ 62 ຄັ້ງ, ມີຜູ້ເຂົ້າຮ່ວມທັງໝົດ 1,207 ເທື່ອຄົນ ຍິງ 367 ເທື່ອຄົນ, ວຽກງານວິເຄາະທົດລອງເລືອດ, ກວດຄຸນນະພາບເລືອດ ສາມາດກວດພະຍາດທາງເລືອດຜູ້ບໍລິຈາກທັງໝົດ 292 ເທື່ອຄົນ, ກວດຄຸນນະພາບນໍ້າຢາກວດໝວດເລືອດ ແລະ ນໍ້າຢາກວດພະຍາດນຳສົ່ງທາງເລືອດ 12 ຄັ້ງ. ວຽກງານເກັບຮັກສາ ແລະ ແຈກຈ່າຍເລືອດ ຄົນເຈັບທີ່ມາໃສ່ເລືອດມີທັງໝົດ 110 ເທື່ອຄົນ, ນະໂຍບາຍໃຫ້ພີ່ນ້ອງຜູ້ບໍລິຈາກເລືອດ 8 ຖົງ.
ອົງການກາແດງແຂວງ ໄດ້ຮັບການຊີ້ນຳ-ນຳພາ, ຕິດຕາມ ຊຸກຍູ້ ຈາກອົງການປົກຄອງແຂວງ ແລະ ສາຍຕັ້ງສະຖາບັນເລືອດແຫ່ງຊາດ ໂດຍໄດ້ຕອບສະໜອງເສື້ອໃຫ້ຜູ້ບໍລິຈາກ, ອຸປະກອນ-ນໍ້າຢາເຄມີ, ນໍ້າດື່ມ, ອາຫານບຳລຸງ ແລະ ເຄື່ອງຕ່າງໆ ທີ່ຈຳເປັນໃຫ້ແກ່ສູນເລືອດແຂວງ. ຈາກນັ້ນ ໄດ້ຮັບຟັງຄວາມຮູ້ພື້ນຖານກ່ຽວກັບເລືອດ ແລະ ການບໍລິຈາກເລືອດ ຊຶ່ງຈະໄດ້ຮັບຮູ້ກ່ຽວກັບຄວາມໝາຍຂອງເລືອດ, ເລືອດຖືກຜະລິດມາຈາກໃສ, ມີໝວດເລືອດໃດແດ່, ຄວາມສຳຄັນຂອງເລືອດ, ເງື່ອນໄຂຂອງການບໍລິຈາກເລືອດ, ຜົນດີ ແລະ ຜົນເສຍ ຂອງການບໍລິຈາກເລືອດ ແລະ ການກະກຽມກ່ອນບໍລິຈາກເລືອດ. ພ້ອມດຽວກັນນັ້ນ ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄຳຄິດ-ຄຳເຫັນ ໃສ່ບົດສະຫຼຸບ ເພື່ອຕີລາຄາຜົນການຈັດຕັ້ງປະຕິບັດວຽກງານຈັດຫາເລືອດ ໃຫ້ເຫັນໄດ້ຈຸດດີ, ຈຸດອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ວິທີແກ້ໄຂໃຫ້ແທດເໝາະກັບສະພາບຄວາມເປັນຈິງ.
(ຂ່າວ: ສີລິພອນ ສົງຄຳ)
ຄໍາເຫັນ