ຊະນະຄາມ ເອົາໃຈໃສ່ແກ້ໄຂວາລະແຫ່ງຊາດ ວ່າດ້ວຍບັນຫາຢາເສບຕິດ

ໂດຍ: ບຸນອູ້ມ
    ການປະຕິບັດ 2 ວາລະແຫ່ງຊາດຂອງເມືອງຊະນະຄາມ ແຂວງວຽງຈັນ ໄດ້ສຸມໃສ່ນຳພາ-ຊີ້ນຳຢ່າງເປັນເຈົ້າການສະແດງອອກການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໄລຍະທີໜຶ່ງສຳເລັດແລ້ວ 33 ບ້ານ,2.212 ເປົ້າໝາຍ. ໃນນີ້, ມີຜູ້ເສບຢາເສບຕິດ 1.803 ເປົ້າໝາຍ, ຜູ້ຂາຍ 409 ເປົ້າໝາຍ ແລະ ສຶກສາອົບຮົບການເມືອງ-ແນວຄິດໃຫ້ກຸ່ມເປົ້າໝາຍເພື່ອຢຸດເຊົາພ້ອມທັງເຮັດບົດບັນທຶກໄວ້ແລະປັດຈຸບັນແມ່ນສືບຕໍ່ໄລຍະທີສອງ.
    ທ່ານ ແກ້ວ ພິມມະວົງ ເຈົ້າເມືອງຊະນະຄາມໄດ້ໃຫ້ສຳພາດຕໍ່ສື່ມວນຊົນໜັງສືພິມປະຊາຊົນເມື່ອບໍ່ດົນມານີ້ວ່າ: ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນເມືອງໄດ້ແຕ່ງຕັ້ງ, ຊຸກຍູ້ກຳມະການເກັບກຳຂໍ້ມູນແລະ ຊຸກຍູ້ຫົວໜ່ວຍການຜະລິດຜູ້ປະກອບການພາຍໃນເມືອງ, ເຄື່ອນໄຫວເຂົ້າສູ່ລະບຽບການ ພ້ອມທັງປະກອບສ່ວນພັນທະເຂົ້າງົບປະມານ ແລະ ໄດ້ແຕ່ງຕັ້ງຄະນະກຳມະການຂັ້ນເມືອງລົງສົມທົບພາກສ່ວນກ່ຽວຂ້ອງແກ້ໄຂບັນຫາການນໍາໃຊ້ເງິນຕາ, ລາຄາສິນຄ້າ, ລາຄານ້ຳມັນດ້ວຍການສຶກສາອົບຮົມຜູ້ປະກອບການ, ພໍ່ຄ້າຊາວຄ້າຂາຍບໍ່ໃຫ້ສວຍໂອກາດຍາມບ້ານເມືອງພົບຄວາມຫຍຸ້ງຍາກ ແລະ ອື່ນໆ.
    ທ່ານ ແກ້ວ ພິມມະວົງ ກ່າວໃຫ້ຮູ້ອີກວ່າ: ໃນປີ 2023 ແຜນຈັດເກັບລາຍຮັບແມ່ນ 17,92 ຕື້ກີບ, ສາມາດຈັດເກັບລາຍຮັບໄດ້ 22,35 ຕື້ກີບ ທຽບໃສ່ແຜນການ124,72%,ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຄະນະພັກໄດ້ເອົາໃຈໃສ່ນໍາພາ-ຊີ້ນຳວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ໂດຍຫັນເອົາພະນັກງານຫຼັກແຫຼ່ງລົງກໍ່ສ້າງຮາກຖານການເມືອງມີ 57 ທ່ານ, ເພື່ອຊຸກຍູ້ຂະບວນການຕ່າງໆ ແລະກະກຽມດໍາເນີນກອງປະຊຸມໃຫຍ່ຂັ້ນຮາກຖານບ້ານ ແລະໜ່ວຍພັກໂຮງຮຽນ; ປະເມີນມາດຕະຖານພົ້ນທຸກ ແລະ ມາດຕະຖານພັດທະນາຕາມດຳລັດ 348 ສຳເລັດ, ເອົາໃຈໃສ່ນຳພາ-ຊີ້ນຳຈັດຕັ້ງປະຕິບັດນະໂຍບາຍການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາ; ໄດ້ກວດກາປະເມີນຜົນການສ້າງເມືອງເປັນຫົວໜ່ວຍເຂັ້ມແຂງຮອບດ້ານບັນລຸ 40 ຕົວຊີ້ບອກເທົ່າກັບ 85,10%, ບໍ່ເປັນລຸ7 ຕົວຊີ້ບອກ ເທົ່າກັບ 14,98% ແລະປະເມີນຜົນການສ້າງບ້ານເປັນຫົວໜ່ວຍພັດທະນາບັນລຸ 29 ບ້ານ ເທົ່າກັບ 87,88%, ບໍ່ບັນລຸ 4 ບ້ານເທົ່າກັບ 12,12%, ທົ່ວເມືອງມີ 33 ບ້ານ,623 ໜ່ວຍສາມັກຄີ,7.938 ຄອບຄົວ, ພົນລະເມືອງ 35.779 ຄົນ, ໃນນີ້ມີບ້ານພົ້ນທຸກ 29 ບ້ານ, ບ້ານບໍ່ພົ້ນທຸກ 4 ບ້ານ, ຄອບຄົວພົ້ນທຸກ 7.699 ຄອບຄົວ, ຄອບຄົວບໍ່ພົ້ນທຸກ 239 ຄອບຄົວ.