ໂດຍ: ວັນໄຊ ຕະວິນຍານ
ເຖິງວ່າໃນປີຜ່ານມາ ເມືອງຊະນະຄາມ ແຂວງວຽງຈັນຈະພົບກັບຄວາມຫຍຸ້ງຍາກຊໍ່າໃດກໍຕາມ, ຄະນະພັກເມືອງຍັງໄດ້ນໍາພາ-ຊີ້ນໍາສຸມໃສ່ພັດທະນາວຽກງານວັດທະນະທໍາ-ສັງຄົມໄດ້ດີຂຶ້ນກວ່າເກົ່າ. ເວົ້າສະເພາະແມ່ນລະ ບົບການສຶກສາຊຶ່ງໄດ້ສ້າງຄວາມເຂັ້ມແຂງດ້ານການບໍລິຫານ, ຄຸ້ມຄອງການສຶກສາເພື່ອຈັດຕັ້ງປະຕິບັດຕົວຊີ້ວັດຂອງຂະແໜງການສຶກສາກໍານົດອອກ; ປີ 2023 ຜ່ານມາ ດ້ານການສຶກສາຢູ່ພາຍໃນເມືອງອັດຕາເຂົ້າຮຽນຊັ້ນປະ ຖົມກວມອັດຕາສ່ວນສູງເຖິງ 99,4%, ອັດຕາປະລະການຮຽນ 2,2%, ອັດຕາຄ້າງຫ້ອງ 1,2%, ອັດຕາເລື່ອນຂັ້ນ-ຈົບຊັ້ນ 96,6%, ອັດຕາລອດເຫຼືອ 89,9%; ອັດຕາເລື່ອນຂັ້ນ-ຈົບຊັ້ນມໍຕົ້ນ 90,1%, ອັດຕາຄ້າງຫ້ອງ 1,5%, ອັດຕາປະລະການຮຽນ 8,4%, ອັດຕາລອດເຫຼືອ 69,9%; ອັດຕາເຂົ້າຮຽນຊັ້ນມັດທະຍົມ 44,0%, ອັດ ຕາເລື່ອນຂັ້ນ-ຈົບຊັ້ນ 85,3%, ອັດຕາປະລະການຮຽນ 14,8%, ອັດຕາລອດເຫຼືອ 61,2%. ໃນ 1 ປີຜ່ານມາໄດ້ກໍ່ສ້າງນັກຮຽນເກັ່ງຊັ້ນປໍ.5 ໄດ້ທີ 3 ຂອງແຂວງມີ 2 ຄົນ, ຍິງ 2 ຄົນ; ຊັ້ນມໍ.4 ໄດ້ອັນດັບທີ 1 ຂອງແຂວງມີ 1 ຄົນ, ອັນດັບທີ 2 ຂອງແຂວງມີ 1 ຄົນ, ຍິງ 1 ຄົນ. ນອກຈາກນີ້, ເມືອງຍັງໄດ້ລົງທຶນ ແລະ ປຸກລະດົມການປະກອບສ່ວນຈາກຊຸມຊົນໃນການສ້ອມແປງອາຄານ, ຫ້ອງຮຽນ, ໂຕະ, ຕັ່ງ ແລະ ອື່ນໆຂອງຊັ້ນປະຖົມ, ມໍຕົ້ນ ແລະ ມັດທະຍົມລວມມູນຄ່າ 322.405.000 ກີບ.
ສຳລັບວຽກງານສາທາລະນະສຸກເມືອງໄດ້ສູ້ຊົນຈັດຕັ້ງປະຕິບັດນະໂຍບາຍ 5 ດີ 1 ພໍໃຈ ໂດຍຖືເອົາການປິ່ນປົວ-ຟຶ້ນຟູໃຫ້ມີຄຸນນະພາບເປັນຕົ້ນຕໍ ສາມາດບັນລຸໄດ້ 97%; ໃຫ້ບໍລິການທາງດ້ານສາທາລະນະສຸກ 23.710 ເທື່ອຄົນ, ຄົນເຈັບນອນໂຮງໝໍ 2.358 ເທື່ອຄົນ, ກວດວິເຄາະ 8.479 ເທື່ອຄົນ, ເອັກສະເລ 393 ເທື່ອຄົນ, ເອໂກ້ 1.230 ເທື່ອຄົນ ແລະ ແທກຄື້ນຫົວໃຈ 78 ເທື່ອຄົນ; ຜ່າຕັດໄດ້ທັງໝົດ 79 ກໍລະນີ (ໃນນີ້ຜ່າຕັດກາງ 54 ກໍລະນີ, ຜ່າຕັດໃຫຍ່ 5 ກໍລະນີ, ຜ່າຕັດເອົາລູກອອກ 20 ກໍລະນີ). ນອກຈາກນີ້, ຍັງໄດ້ສົມທົບກັບການຈັດຕັ້ງຂັ້ນເມືອງ, ຂັ້ນແຂວງ, ການຈັດຕັ້ງສັງຄົມ, ອົງການພຸດທະສາສະໜາເພື່ອປຸກລະດົມທຶນຊື້ດິນ-ຖົມດິນຫຼັງໂຮງໝໍ ມູນຄ່າ 525.000.000 ກີບ, ໄດ້ເປີດນໍາໃຊ້ໂຮງໝໍນ້ອຍໂນນສະຫວັນຢ່າງເປັນທາງການ.
ສໍາລັບວຽກງານແຮງງານ ແລະ ສະຫວັດດີການສັງຄົມເມືອງໄດ້ລົງເຄື່ອນໄຫວຕິດຕາມ, ກວດກາ, ເກັບກຳຂໍ້ມູນແຮງງານຢູ່ 12 ຫົວໜ່ວຍມີ 1.345 ຄົນ, ຍິງ 130 ຄົນ ພ້ອມທັງຊຸກຍູ້ໃຫ້ບັນດາຫົວໜ່ວຍແຮງງານສ້າງກົດລະບຽບ, ສັນຍາແຮງງານລະຫວ່າງຜູ້ນຳໃຊ້ແຮງງານ ແລະ ຜູ້ອອກແຮງານໃຫ້ຖືກຕ້ອງຕາມລະບຽບກົດໝາຍ; ໄດ້ປະຕິບັດນະໂຍບາຍ, ອຸດໜູນພະນັກງານເກີດລູກໃຫ້ແກ່ພະນັກງານ-ລັດຖະກອນ 29.943.196 ກີບ, ເງິນອຸດໜູນການເສຍຊີວິດ 87.174.335 ກີບ, ເງິນອຸດໜູນບຳເນັດ 190.787.463 ກີບ; ເງິນນະໂຍບາຍກອງທຶນ(ສບຜ) ເມືອງ ແລະ (ສບຜ) ແຂວງ 78.780.000 ກີບ. ນອກຈາກນີ້ຍັງໄດ້ຊ່ວຍເຫຼືອປະເພດເຄື່ອງນຸ່ງຫົ່ມໃຫ້ແກ່ຄອບຄົວທີ່ມີຄວາມຍາກຈົນຈໍານວນ 5 ບ້ານ, ມີ 82 ຄອບຄົວ ແລະ ປຸກລະດົມທຸກພາກສ່ວນທົ່ວສັງຄົມບໍລິຈາກເລືອດໄດ້ 238 ຖົງ.
ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຊຸກຍູ້ສົ່ງເສີມເປັນປົກກະຕິ, ອໍານວຍຄວາມສະດວກໃຫ້ນັກຂ່າວລົງເຄື່ອນເກັບກຳຂ່າວ, ຂຽນຂ່າວສົ່ງໃຫ້ສື່ຕ່າງໆ 1.430 ຂ່າວ ທຽບໃສ່ແຜນປະຕິບັດໄດ້ 100%, ສ້ອມແປງໂທລະໂຄ່ງ 9 ຄັ້ງ, ອອກອະນຸຍາດສືບຕໍ່ດຳເນີນທຸລະກິດຕ່າງໆທີ່ຂຶ້ນກັບຄວາມຮັບຜິດຊອບຂອງ ຖວທ ສຳເລັດ 100%; ປະກອບເອກະສານການຄຸ້ມຄອງ-ເຄື່ອນຍ້າຍພະພຸດທະຮູບໃຫ້ຖືກຕ້ອງຕາມລະບຽບກົດໝາຍ; ເກັບກໍາຂໍ້ມູນແຂກທີ່ມາພັກເຊົາຢູ່ພາຍໃນເມືອງມີ 3.659 ເທື່ອຄົນ, ຍິງ 2.120 ເທື່ອຄົນ, ຄົນຕ່າງ ປະເທດ 389 ເທື່ອຄົນ, ຍິງ 170 ເທື່ອຄົນ ແລະ ສ້າງລາຍຮັບເຂົ້າເມືອງໄດ້ປະມານ 914.750.000 ກີບ. ຈັດງານເທດສະການໝາກຂາມຫວານຕິດພັນກັບການເປີດປີທ່ອງທ່ຽວລາວ 2024 ຢູ່ເມືອງຊະນະຄາມໄດ້ສໍາເລັດ.
ທ່ານ ແກ້ວ ພິມມະວົງ ເຈົ້າເມືອງຊະນະຄາມ ກ່າວຕື່ມວ່າ: ຜົນສໍາເລັດທີ່ສ້າງມາໄດ້ນັ້ນ ຕົ້ນຕໍແມ່ນພວກເຮົາມີແນວທາງທີ່ຖືກຕ້ອງ, ມີແຜນການ, ໂຄງການດໍາເນີນງານ, ການນໍາພາ-ຊີ້ນໍາຂອງຄະນະປະຈໍາພັກແຂວງ ເປັນບ່ອນອີງພື້ນຖານໃຫ້ແກ່ການນໍາພາຈັດຕັ້ງປະຕິບັດວຽກງານຕ່າງໆຂອງເມືອງ, ຄະນະພັກແຕ່ລະຂັ້ນໄດ້ມີການແບ່ງງານ ແບ່ງຄວາມຮັບ ຜິດຊອບຈະແຈ້ງ, ຍົກສູງຄວາມຮັບຜິດຊອບນໍາພາ-ຊີ້ນໍາຈັດຕັ້ງປະຕິບັດຢ່າງເປັນເຈົ້າການ. ເຖິງວ່າເມືອງຂອງພວກເຮົາຈະປະເຊີນກັບບັນຫາຫຼາຍດ້ານ ໂດຍລວມເມືອງພວກເຮົາກໍມີຄວາມສະຫງົບໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ວຽກງານວັດທະນະທໍາ-ສັງຄົມໄດ້ຮັບການຂະຫຍາຍຕົວ ຊີວິດການເປັນຢູ່ຂອງປະ ຊາຊົນຂະຫຍາຍຕົວດີຂຶ້ນ. ຍ້ອນຄວາມເອົາໃຈໃສ່ຂອງຖັນແຖວພະນັກງານ, ສະມາຊິກພັກ, ທະຫານ, ຕຳຫຼວດ ມີຄວາມເປັນເອກະພາບ, ເຊື່ອໝັ້ນຕໍ່ການນໍາພາຄະນະພັກແຕ່ລະຂັ້ນ, ເປັນເຈົ້າການຈັດຕັ້ງປະຕິບັດໜ້າວຽກງານຂອງຕົນດ້ວຍຫົວຄິດປະດິດສ້າງ, ສາມາດເປັນກໍາລັງທີ່ສໍາຄັນໃນການປະຕິບັດໜ້າທີ່ການເມືອງໃຫ້ມີຜົນສໍາເລັດ.
ຄໍາເຫັນ