ຊະນະຄາມ ແຂ່ງຂັນກິລາເປຕັງ ຊີງຂັນເຈົ້າເມືອງ

ເພື່ອເປັນການສ້າງຂະບວນການຕ້ອນຮັບກອງປະຊຸມໃຫຍ່ 3 ຂັ້ນຂອງພັກ ເວົ້າລວມ, ເວົ້າສະເພາະເພື່ອສ້າງ ແລະ ປຸກລະດົມຂະບວນການຮອບດ້ານ, ໂດຍສະເພາະຂະບວນການແຂ່ງຂັນກິລາມວນຊົນຢູ່ພາຍໃນເມືອງໃຫ້ເປັນຂະບວນກວ້າງຂວາງ, ສາມັກຄີ ແລະ ຟົດຟື້ນ, ໃນການປະກອບສ່ວນເພື່ອຕ້ອນຮັບກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງຊະນະຄາມ ແຂວງວຽງຈັນ ແລະ ເພື່ອຂໍານັບຮັບຕ້ອນວັນກໍາມະກອນສາກົນ ວັນທີ 1 ພຶດສະພາ ຄົບຮອບ 138 ປີ ທີ່ຈະໝູນວຽນມາອີກວາລະໜຶ່ງ.
    ການແຂ່ງຂັນໄດ້ຈັດຂຶ້ນໃນວັນທີ 4 ເມສາ 2024 ທີ່ຜ່ານມາ, ໂດຍການເປັນກຽດເຂົ້າຮ່ວມຂອງທ່ານ ນາງ ໄກສອນ ອ່ອນລັງ ຄະນະປະຈໍາພັກເມືອງ ປະທານແນວລາວສ້າງຊາດເມືອງ, ມີບັນດາຫ້ອງການອ້ອມຂ້າງ, ຄະນະຮັບຜິດຊອບຈັດການແຂ່ງຂັນ, ບັນດາພະນັກງານ, ທະຫານ-ຕໍາຫຼວດ, ອົງການຈັດຕັ້ງພາກລັດ ແລະ ເອກະຊົນ, ນັກທຸລະກິດ, ຊາວຄ້າຂາຍ ແລະ ປະຊາຊົນ, ທີ່ເຂົ້າສະໝັກເຂົ້າຮ່ວມການແຂ່ງຂັນທັງໝົດປະກອບມີ: ທີມນັກກິລາຄູ່ຊາຍ 35 ທີມ ແລະ ຍິງ 18 ທີມ.
    ຜ່ານການແຂ່ງຂັນເປັນໄລຍະເວລາ 1 ວັນ, ສາມາດສະຫຼູບຜົນການແຂ່ງຂັ້ນໄດ້ຄື: ການແຂ່ງຂັນທີມຊາຍ ອັນດັບໜຶ່ງ ທີມນັກກິລາສະພາການຄ້າເມືອງ ໄດ້ຮັບຂັນຂອງທ່ານເຈົ້າເມືອງ ແລະ ເງິນ 1 ລ້ານກີບ; ອັນດັບສອງ ໄດ້ແກ່ທີມນັກກິລາກອງຮ້ອຍຊາຍແດນ 321 ໄດ້ຮັບເງິນສົດ 7 ແສນກີບ; ອັນດັບສາມ ທີມກໍາມະບານຮາກຖານຫ້ອງການສຶກສາທິການ ແລະ ກິລາເມືອງ ໄດ້ຮັບເງິນສົດ 5 ແສນກີບ. ສໍາລັບການແຂ່ງຂັນທີມຍິງ ອັນດັບໜຶ່ງ ທີມນັກກິລາຫ້ອງການກະສິກໍາ ແລະ ປ່າໄມ້ເມືອງ ໄດ້ຮັບຂັນຂອງທ່ານເຈົ້າເມືອງ ແລະ ເງິນສົດ 6 ແສນກີບ, ອັນດັບສອງໄດ້ແກ່ທີມ ຫ້ອງວ່າການເມືອງ ໄດ້ຮັບເງິນສົດ 4 ແສນກີບ ແລະ ອັນດັບສາມ ທີມກໍາມະບານຮາກຖານຫ້ອງການອຸດສະຫະກໍາ ແລະ ການຄ້າເມືອງ ໄດ້ຮັບເງິນສົດ 3 ແສນກີບ.
(ຂ່າວ: ເມືອງຊະນະຄາມ)