ບ້ານນໍ້າພຸ ເມືອງໄຊພູທອງ ແຂວງສະຫວັນນະເຂດ ໄດ້ເປີດຂະບວນການກໍ່ສ້າງເສັ້ນທາງເບຕົງເສີມເຫຼັກ ຂຶ້ນໃນວັນທີ 12 ກຸມພາ ຜ່ານມາ ໂດຍປະຕິບັດຕາມການປຶກສາຫາລືລະຫວ່າງຮອງເລຂາ-ນາຍບ້ານ,ເຖົ້າແກ່ແນວໂຮມພໍ່ແມ່ປະຊາຊົນພາຍໃນບ້ານນໍ້າພຸ ໃນການແຕ່ງຕັ້ງຄະນະຊີ້ນໍາ ແລະ ຄະນະຮັບຜິດຊອບການກໍ່ສ້າງທາງເບຕົງເສີມເຫຼັກຂອງບ້ານນໍ້າພຸ ຕາມແຜນການກໍ່ສ້າງພື້ນຖານໂຄງລ່າງບ້ານ, ເພື່ອເປັນການຍົກລະດັບທາງຂອງບ້ານໃຫ້ກາຍເປັນເສັ້ນທາງເບຕົງເສີມເຫຼັກ. ສ່ວນງົບປະມານແມ່ນຈະໄດ້ປຸກລະດົມຂົນຂວາຍເກັບເງິນ ນໍາພໍ່ແມ່ປະຊາຊົນພາຍໃນບ້ານແຕ່ລະຄົວເຮືອນ, ເກັບເງິນນໍາຄອບຄົວຜູ້ທີ່ມີພາຫະນະປະເພດລົດໃຫຍ່, ລົດກະບະ, ຂໍການລະດົມໃນທົ່ວສັງຄົມ, ຈັດງານບຸນປະເພນີ ແລະ ອື່ນໆ. ຊຶ່ງຈະໃຊ້ງົບປະມານທັງໝົດເກືອບ 157 ລ້ານກ່ວາກີບ.
ທ່ານ ຂຽວ ບຸນຍະເດດ ນາຍບ້ານນໍ້າພຸ ທັງເປັນຄະນະຮັບຜິດຊອບການກໍ່ສ້າງເສັ້ນທາງ ໄດ້ໃຫ້ຮູ້ໃນຄັ້ງວັນທີ 9 ມັງກອນ ຜ່ານມານີ້ວ່າ: ເສັ້ນທາງເບຕົງເສີມເຫຼັກເສັ້ນທີ 4 ຂອງບ້ານນໍ້າພຸ ແມ່ນໄດ້ເລີ່ມ ລົງມືກໍ່ສ້າງໃນຄັ້ງວັນທີ 5 ກຸມພາ 2024 ແລະ ຄາດຄະເນຈະໃຫ້ສໍາເລັດໃນທ້າຍເດືອນ ມີນາ 2024. ສໍາລັບແຜນການກໍ່ສ້າງເບື້ອງຕົ້ນແມ່ນມີລວງຍາວ 348 ແມັດ, ກວ້າງ 5,50 ແມັດ, ໜາ 16 ຊັງຕີແມັດ, ສາມາດຮັບນໍ້າໜັກໄດ້ 15 ໂຕນ, ໂດຍແມ່ນແຮງງານຂອງປະຊາຊົນບ້ານ. ການກໍ່ສ້າງໄດ້ແບ່ງອອກເປັນ 5 ຈຸ, ຊຶ່ງໄດ້ຜັດປ່ຽນກັນມື້ລະ 3 ຈຸ, ໄດ້ກໍານົດເອົາມື້ລະ 6 ເຟມ, ເຟມລະ 6 ແມັດ, ສ່ວນທຶນຮອນ ທີ່ນຳໃຊ້ເຂົ້າໃນການກໍ່ສ້າງເສັ້ນ ທາງດັ່ງກ່າວແມ່ນໄດ້ມາຈາກ ການປະກອບສ່ວນຂອງພໍ່ແມ່ປະຊາຊົນພີ່ນ້ອງລູກຫຼານຊາວບ້ານ ແລະ ພີນ້ອງຢູ່ຕ່າງປະເທດ, ຜູ້ປະກອບການ, ນັກທຸລະກິດ ພ້ອມທັງໄດ້ຮັບການປະກອບ ສ່ວນຂອງສັງຄົມຈາກຫຼາຍພາກສ່ວນລວມມູນຄ່າໃນການກໍ່ສ້າງທັງໝົດ 157 ລ້ານກ່ວາກີບ.
(ຂາວ: ເມືອງໄຊພູທອງ)
ຄໍາເຫັນ