ຊາວກະສິກອນແຂວງຫຼວງນໍ້າທາ ສຸມໃສ່ການຜະລິດປູກພືດເປັນສິນຄ້າ

ຕາມການໃຫ້ສຳພາດຂອງທ່ານ ພິມແກ້ວ ທຳລະສິນ ຫົວໜ້າພະແນກກະສິກຳ ແລະ ປ່າໄມ້ແຂວງຫຼວງນໍ້າທາ ໄດ້ໃຫ້ຮູ້ໃນວັນທີ 21 ກຸມພາ 2024ນີ້ວ່າ: ການປູກພືດລະດູແລ້ງໃນປີ 2024ນີ້ ທຽບໃສ່ໄລຍະຜ່ານມາເຫັນວ່າເປັນຂະບວນກວ້າງຂວາງດີພໍສົມຄວນ ຍ້ອນວ່າສະພາບດິນຟ້າອາກາດໄດ້ອຳນວຍຄວາມສະດວກ, ພ້ອມນັ້ນທົ່ງພຽງເມືອງຫຼວງນ້ຳທາ ແລະ ທົ່ງພຽງເມືອງສິງ ກໍໄດ້ສຳເລັດການສ້ອມແປງຊົນລະປະທານ ສາມາດສະໜອງນ້ຳໄດ້ເປັນປົກກະຕິ. ຕໍ່ກັບການຜະລິດໃນປີນີ້ ພະແນກກະສິກຳ ໄດ້ອຳນວຍຄວາມສະດວກ ໂດຍໄດ້ແຕ່ງຕັ້ງຄະນະຮັບຜິດຊອບການຊຸກຍູ້ການປູກພືດລະດູແລ້ງຂັ້ນແຂວງ, ຂັ້ນເມືອງ ລົງຊຸກຍູ້ຮ່ວມກັບຜູ້ປະກອບການໃນການໄກເກ່ຍເກັບກຳຂໍ້ມູນການຜະລິດ ຊຶ່ງເລີ່ມແຕ່ ເດືອນ ພະຈິກ 2023 ເປັນຕົ້ນມາ, ບວກກັບຄວາມສະດວກຂອງພື້ນທີ່ໄດ້ມີເງື່ອນໄຂຫຼາຍບ່ອນ ແລະ ປັດໃຈການຜະລິດ, ການສົ່ງອອກມີຄວາມສະດວກສະບາຍ.
      ມາເຖິງປັດຈຸບັນໄດ້ເລີ່ມດໍາເນີນການກະກຽມດິນ ແລະ ປູກສໍາເລັດແລ້ວ 90% ໃນເນື້ອທີ່ທັງໝົດ 1.316 ເຮັກຕາ, ຖ້າທຽບໃສ່ປີຜ່ານມາແມ່ນມີເນື້ອທີ່ເພີ່ມຂຶ້ນ.  ພຶດທີ່ນໍາມາປູກປີນີ້ ແມ່ນອິງໃສ່ຄວາມຕ້ອງການຂອງຕະຫຼາດເປັນຕົ້ນແມ່ນ: ຖົ້ວເຫຼືອງບັນລຸໄດ້ 766 ເຮັກຕາ, ໝາກແຕງໂມ 400 ກວ່າເຮັກຕາ, ຖົ່ວເບີ ມີ113 ເຮັກຕາ, ຄຽງຄູ່ກັນນັັ້ນ ຍັງມີຢາສູບ ແລະ ໝາກເຜັດ ປະຕິບັດໄດ້ 17 ເຮັກຕາ ແລະ ໄດ້ຊຸກຍູ້ການຜະລິດພຶດຜັກຊະນິດຕ່າງໆເພື່ອບໍລິໂພກພາຍໃນແຂວງ, ຕ່າງແຂວງ ແລະ ສົ່ງອອກໄປ ສປຈີນ, ທັງເປັນການສົ່ງເສີມໃຫ້ຊາວກະຊິກອນ ຜະລິດເພື່ອຫຼຸດຜ່ອນການນຳເຂົ້າ.  
      ທ່ານຍັງຕື່ມວ່າ: ການຜະລິດເຂົ້ານາແຊງໃນປີນີ້, ຕາມແຜນການທີ່ວາງໄວ້ແມ່ນ 700 ກວ່າເຮັກຕາ, ຜ່ານການຈັດຕັ້ງປະຕິບັດຕົວຈິງແມ່ນຫຼຸດລົງ ຍ້ອນວ່າຊາວກະສິກອນໄດ້ຫັນເນື້ອທີ່ນາຂອງຕົນໄປປູກພືດຊະນິດອື່ນໆ ກ່າຍເປັນສີນຄ້າຈິ່ງເຮັດໃຫ້ເນື້ອທີ່ປູກເຂົ້ານາແຊງໄດ້ຫຼຸດລົງ.
(ຂ່າວ: ສົມພອນ ຂຸນດາວົງ)