 |
ທ່ານ ຄຳຈັນ ໄຊມຸງຄຸນ ຫົວໜ້າຂະແໜງ ມໍລະດົກໂລກວັດພູຈຳປາສັກໃຫ້ຮູ້ໃນວັນທີ 15 ກໍລະກົດ ວ່າ:ພາຍຫຼັງທີ່ພົບເຫັນພະພຸດທະຮູບແລ້ວ ທາງຂະແໜງມໍລະດົກໂລກວັດພູ ໄດ້ລົງສຳຫຼວດພື້ນທີ່ ແລະ ຮັບເອົາພະພຸດທະຮູບມາອະນາໄມ,ທຳຄວາມສະອາດ,ເກັບຮັກສາໃຫ້ຖືກວິທີ ແລະ ຂຶ້ນທະບຽນ.ໃນນັ້ນ, ມີປະເພດພະທີ່ເຮັດດ້ວຍເງິນ (ພະເງິນບຸ) ຈຳນວນ 69 ອົງ,ພະເຮັດດ້ວຍຄຳ (ຄຳລາວບູຮານ)ຈຳນວນ 1 ອົງ. ຊຶ່ງຮູບຊົງສັນຖານຂອງພະແມ່ນພະປາງສະມະທິ ແລະ ປາງຊະນະມານ ມີຂະໜາດນ້ອຍໜ້າຕັກ 3 ຫາ 5 ຊັງຕີແມັດ,ສູງ 10 ຫາ 18 ຊັງຕີແມັດ.ພະພຸດທະຮູບແມ່ນມີຄວາມເກົ່າແກ່.ອຕາມການສັນນິຖານຂອງນັກວິຊາການແມ່ນສ້າງຂຶ້ນໃນສະຕະວັດທີ 17-18.
 |
ທ່ານ ຄຳຈັນ ໄຊມຸງຄຸນ ກ່າວຕື່ມ: ພາຍຫຼັງທີ່ຂະແໜງມໍລະດົກໂລກວັດພູໄດ້ຂຶ້ນທະບຽນແລ້ວ ຈະໄດ້ປຶກສາຫາລືກັບອົງການປົກຄອງເມືອງຈຳປາສັກ,ພະແນກການທີ່ກ່ຽວຂ້ອງ,ເຈົ້າອະທິການວັດບ້ານເມືອງກາງ ແລະ ເຖົ້າແກ່ແນວໂຮມອີກເທື່ອໜຶ່ງ ເພື່ອຕົກລົງກຳນົດບ່ອນປະດິດສະຖານໄວ້ ເພື່ອໃຫ້ຊາວເມືອງຈຳປາສັກ,ນັກທ່ອງທ່ຽວພາຍໃນ ແລະ ຕ່າງປະເທດໄດ້ເຂົ້າຂາບໄຫວ້ສັກກາລະບູຊາ.
(ຂ່າວ,ພາບ:ເກດສະໜາແກ້ວສຸວັນນະແສງ)
ຄໍາເຫັນ