ຊາວໜຸ່ມ ເປັນກຳລັງແຮງສຳຄັນໃນການຕໍ່ສູ້ປົດປ່ອຍຊາດ 

ໂດຍ: ໂຈ່ລີ້ ວົງໄຊ
    ເນື່ອງໃນໂອກາດວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ (ຄຊປລ)14 ເມສາ 1955-14 ເມສາ 2024ຄົບຮອບ 69 ປີທີ່ຈະມາເຖິງນີ້ສະຫາຍ ພັນໂທ ຈັນນະຄອນ ອາດສະໝຸດ ຫົວໜ້າພະແນກຊາວໜຸ່ມຫ້ອງການເມືອງ ກົມໃຫຍ່ການເມືອງກອງທັບໄດ້ໃຫ້ສຳພາດຕໍ່ສື່ມວນຊົນວ່າ: ຕະຫຼອດໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດນັ້ນ ຊາວໜຸ່ມເຮົາຈໍານວນບໍ່ໜ້ອຍໄດ້ເສຍສະຫຼະຊີວິດ ແລະ ເລືອດເນື້ອເພື່ອປົກປັກຮັກສາເອກະລາດ ແລະ ຜືນແຜ່ນດິນອັນຄົບຖ້ວນທີ່ແສນຮັກຂອງຕົນໄວ້, ຊາວໜຸ່ມມີນໍ້າໃຈຮັກເຊື້ອແພງຊາດບໍ່ຍອມຈຳນົນຕໍ່ສັດຕູ ແລະ ນໍ້າໃຈເສຍສະຫຼະເລືອດເນື້ອອັນ ໜຸ່ມແໜ້ນເພື່ອປະເທດຊາດໄດ້ຖືກອົບຮົມບົ່ມສອນມາຕັ້ງແຕ່ຕອນຍັງໜຸ່ມ ດັ່ງຄຳເວົ້າທີ່ພັກປະຊາຊົນປະຕິວັດລາວໄດ້ຂະໜານນາມໃຫ້ຊາວໜຸ່ມວ່າ: ຊາວໜຸ່ມເປັນແຂນຂວາຂອງພັກ, ເປັນກະດູກສັນຫຼັງຂອງຊາດ, ເປັນຜູ້ສືບທອດມູນເຊື້ອ ແລະ ວິລະກຳປະຫວັດສາດທີ່ຈົງຮັກພັກດີຕໍ່ພັກ ແລະ ຍັງໄດ້ປະກອບສ່ວນເສີມຂະຫຍາຍບົດບາດປະຈັນບານເຂົ້າໃນສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດຕາມທິດຍືນຍົງສູ່ຈຸດໝາຍສັງຄົມນິຍົມ.
    ຕະຫຼອດ 69 ປີແຫ່ງການເຕີບໃຫຍ່ຂະຫາຍຕົວຂອງ ຄຊປລ ໄລຍະຕໍ່ສູ້ປົດປ່ອຍປະເທດຊາດປີ 1955-1975, ຄົນລາວຍາມໃດກໍມີມູນເຊື້ອອັນອົງອາດກ້າຫານບໍ່ຍອມເປັນຂ້ອຍຂ້າ ແລະ ບໍ່ຍອມຈໍານົນຕໍ່ຄວາມໂຫດຮ້າຍຂອງສັດຕູ ແລະ ຈັກກະພັດຕ່າງດ້າວໂດຍສະເພາະຊາວໜຸ່ມລາວ ກໍຄືບັນພະບຸລຸດລາວໄດ້ລຸກຮືຂຶ້ນຕໍ່ສູ້ກັບການກົດຂີ່ຂູດຮີດຂອງພວກຈັກກະພັດລ່າເມືອງຂຶ້ນແບບເກົ່າ ແລະ ໃໝ່ດ້ວຍຄວາມເຊື່ອໝັ້ນໃນກໍາລັງແຮງ, ຄວາມສາມາດ ແລະ ນໍ້າໃຈອົງອາດກ້າຫານຂອງຊາວໜຸ່ມລາວບັນດາເຜົ່າໃນພາລະກິດຕໍ່ສູ້ຕ້ານຈັກກະພັດຜູ້ຮຸກຮານນັ້ນ, ພັກໄດ້ຖືເອົາວຽກງານຂົນຂວາຍ, ຈັດຕັ້ງ ແລະ ນໍາພາວຽກງານຊາວໜຸ່ມເປັນວຽກງານໜຶ່ງທີ່ສໍາຄັນຂອງພັກໃນພາລະກິດຕໍ່ສູ້ປົດປ່ອຍຊາດ: ພັກໄດ້ຕົກລົງສ້າງຕັ້ງຊາວໜຸ່ມຕະລຸມບອນຂຶ້ນໃນຖັນແຖວກຳລັງປະກອບອາວຸດໃນວັນທີ 14 ເມສາ 1955 ຊຶ່ງອົງການຈັດຕັ້ງດັ່ງກ່າວນີ້ໄດ້ກາຍເປັນໃຈກາງເຕົ້າໂຮມ ແລະ ສຶກສາອົບຮົມຊາວໜຸ່ມປະຕິບັດບົດບາດປະຈັນບານໃນທຸກສະໜາມຮົບດ້ວຍມານະຈິດທີ່ວ່າ: ຍອມຕາຍດີກວ່າເສຍເອກະລາດ, ເດັດຂາດບໍ່ໃຫ້ປະເທດຊາດຖືກຕັດແບ່ງ ແລະ ຄວາມປອງດອງຊາດຖືກທໍາລາຍ, ຊາວໜຸ່ມເຮົານັບເປັນແສນໄດ້ສະໝັກໃຈຮັບໃຊ້ຊາດເປັນກໍາລັງປະກອບອາວຸດຢູ່ແນວໜ້າ, ເປັນກຳລັງແນວຫຼັງລຳລຽງຂົນສົ່ງ, ເປັນກຳລັງຂົນຂວາຍປະກອບອາວຸດ, ເປັນກຳລັງພົນຕໍ່ສູ້ດ້ານການເມືອງ, ເຂົາເຈົ້າແມ່ນກໍາລັງປະກອບອາວຸດທີ່ໄດ້ປະກອບສ່ວນສ້າງວິລະກຳອັນລ້ຳເລີດ ແລະ ເຫດການມະຫັດສະຈັນໃນປະຫວັດສາດເຊັ່ນ: ການຜ່າວົງປິດລ້ອມຂອງກອງພັນທີ 2 ອອກຈາກທົ່ງໄຫຫີນໃນວັນທີ 8 ພຶດສະພາ 1959 ແລະ ການເອົາຜູ້ນໍາແນວລາວຮັກຊາດອອກຈາກຄຸກໂພນເຄັງຢ່າງມະຫັດສະຈັນໃນວັນທີ 24 ພຶດສະພາ 1960.
    ສະຫາຍ ພັນໂທ ຈັນນະຄອນ ອາດສະໝຸດ ໃຫ້ຮູ້ຕື່ມວ່າ: ໂດຍຕິດພັນກັບມູນເຊື້ອ ແລະ ຜົນງານດັ່ງກ່າວ ໃນໄລຍະຜ່ານມາ, ພະແນກຊາວໜຸ່ມໄດ້ເອົາໃຈໃສ່ປັບປຸງກໍ່ສ້າງຊີ້ນໍາໆບັນດາຄະນະບໍລິຫານງານ, ຄະນະໜ່ວຍຊາວໜຸ່ມ ແລະ ສະມາຊິກຊາວໜຸ່ມທົ່ວກົມໃຫຍ່ການເມືອງກອງທັບຫຼາຍດ້ານ ເປັນຕົ້ນແມ່ນວຽກງານສຶກສາອົບຮົມການເມືອງນໍາພາແນວຄິດ ແນໃສ່ເຮັດໃຫ້ສະມາຊິກຊາວໜຸ່ມມີແນວຄິດຫຼັກໝັ້ນ, ມີຄວາມສາມັກຄີເປັນເອກະພາບ ຢຶດໝັ້ນຕາມແນວທາງປ່ຽນແປງໃໝ່ຂອງພັກ, ຊີ້ນໍາຊາວໜຸ່ມໃຫ້ເອົາໃຈໃສ່ໃນການຝຶກຝົນຫຼໍ່ຫຼອມຕົນເອງ, ຄົ້ນຄ້ວາຮໍ່າຮຽນເພື່ອຄວາມກ້າວໜ້າ ແລະ ພັດທະນາຕົນເອງ, ຝຶກຝົນຕົນເອງໃຫ້ມີຄວາມເປັນແບບຢ່າງທາງດ້ານລະບຽບວິໃນ, ຄຸນສົມບັດສິນທຳປະຕິວັດ ມີຄຸນທາດການເມືອງ ໜັກແໜ້ນເຂັ້ມແຂງທາງດ້ານການຈັດຕັ້ງ ແລະ ວິຊາການ ຮັບປະກັນທາງດ້ານວຽກງານວິຊາສະເພາະ.ໄປຄຽງຄູ່ກັນນີ້, ອົງການຈັດຕັ້ງຊາວໜຸ່ມກົມໃຫຍ່ການເມືອງກອງທັບ ຍັງໄດ້ເອົາໃຈໃສ່ຢ່າງຕັ້ງໜ້າໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ ຕິດພັນກັບການສ້າງເສດຖະກິດແກ້ໄຂຊີວິດການເປັນຢູ່ດ້ວຍການປູກຝັງ, ລ້ຽງສັດ ຕາມເງື່ອນໄຂຕົວຈິງຂອງແຕ່ລະກົມກອງ, ຜ່ານການເຄື່ອນໄຫວດັ່ງກ່າວ ສາມາດຍົກລະດັບຊີວິດການເປັນຢູ່ຂອງສະມາຊິກຊາວໜຸ່ມໄດ້ດີຂຶ້ນເທື່ອລະກ້າວ ແລະ ໄດ້ຮັບການຍ້ອງຍໍຜົນງານຈາກຂັ້ນເທິງຫຼາຍລະດັບຕະຫຼອດມາ.

    ເນື່ອງໃນໂອກາດວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 69 ປີນີ້, ສະຫາຍ ພັນໂທ ຈັນນະຄອນ ອາດສະໝຸດ ຕາງໜ້າໃຫ້ສະມາຊິກຊາວໜຸ່ມທົ່ວກົມໃຫຍ່ການເມືອງກອງທັບ ຂໍອວຍພອນໄຊອັນປະເສີດມາຍັງການນໍາພັກ-ລັດ, ການນໍາກະຊວງປ້ອງກັນປະເທດ, ການນໍາກົມໃຫຍ່ການເມືອງກອງທັບ, ສູນກາງຊາວໜຸ່ມ ປປລາວ, ການນໍາຊາວໜຸ່ມກອງທັບ ຂໍໃຫ້ທຸກທ່ານຈົ່ງມີພະລານາໄມສົມບູນ ສືບຕໍ່ຊີ້ນໍາໆພາຊາວໜຸ່ມ ປປລາວ ເວົ້າລວມ, ເວົ້າສະເພະກໍຄືຊາວໜຸ່ມກົມໃຫຍ່ການເມືອງກອງທັບໃຫ້ມີຜົນສໍາເລັດອັນໃໝ່ ແລະ ມີຄວາມເຂັ້ມແຂງຢ່າງບໍ່ຢຸດຢັ້ງ.