ບົດລາຍງານສະແດງໃຫ້ເຫັນວ່າ: ປະມານ 66% ຂອງຊາວນູແວນເຊລັງ ທີ່ມີອາຍຸແຕ່ 15-29 ປີ ເຂົ້າສູ່ຕະຫຼາດແຮງງານໃນປີ 2023 ຊຶ່ງເພີ່ມຂຶ້ນຈາກ 57% ໃນປີ 2013. ໂດຍກຸ່ມອາຍຸ 15-19 ປີ ເຂົ້າສູ່ຕະຫຼາດແຮງງານເພີ່ມຂຶ້ນຫຼາຍທີ່ສຸດ ຊຶ່ງເພີ່ມຂຶ້ນຈາກ 33.7% ໃນປີ 2013 ເປັນ 45.1% ໃນປີ 2023.
ທ່ານ ໂຣສແມຣີ ກູດເຢຍ ໂຄສົກສຳນັກງານສະຖິຕິແຫ່ງຊາດນູແວນເຊລັງ ກ່າວວ່າ: ນີ້ເປັນຜົນມາຈາກຕະຫຼາດແຮງງານພາຍຫຼັງໂຣກລະບາດໃຫຍ່ ໂດຍອັດຕາການຫວ່າງງານຕໍ່າ ແລະ ຄວາມຕ້ອງການແຮງງານສູງ ຫຼັງຈາກຂໍ້ຈຳກັດຊາຍແດນກ່ຽວກັບໂຣກລະບາດໂຄວິດ-19.
ຫຼາຍຂົງເຂດຂອງນູແວນເຊລັງທີ່ມີອຸດສາຫະກໍາຕາມລະດູການທີ່ເຂັ້ມແຂງ ເຊັ່ນ: Marlborough, Tasman ແລະ Southland ມີອັດຕາການຈ້າງງານໄວໜຸ່ມສູງທີ່ສຸດ, ໂດຍໂອກາດການວຽກເຮັດວຽກສ່ວນໃຫຍ່ຢູ່ໃນຂະ ແໜງການກະສິກໍາ, ປ່າໄມ້ ແລະ ການປູກໝາກລະແຊັງ.
ໃນຂະນະດຽວກັນ, ຊາວນູແວນເຊລັງທີ່ມີອາຍຸສູງມີທ່າອ່ຽງທີ່ຈະຢູ່ໃນຕະຫຼາດແຮງງານນດົນຂຶ້ນ. ໂດຍອັດຕາສ່ວນຂອງຜູ້ທີ່ມີອາຍຸ 65 ປີຂຶ້ນໄປທີ່ກໍາລັງເຮັດວຽກເພີ່ມຂຶ້ນຈາກ 22% ໃນປີ 2013 ເປັນ 24% ໃນປີ 2023, ໂດຍກຸ່ມອາຍຸ 70-74 ປີມີອັດຕາສ່ວນຫຼາຍທີ່ສຸດ.
ທ່ານ ກູດເຢຍ ກ່າວຕື່ມວ່າ: ສຸຂະພາບທີ່ດີຂຶ້ນ, ອາຍຸຍືນຍາວ ແລະ ຄວາມກົດດັນທາງດ້ານການເງິນແມ່ນປັດໄຈສໍາຄັນທີ່ຢູ່ເບື້ອງຫຼັງທ່າອ່ຽງນີ້, ໂດຍການຈ້າງງານໃນກຸ່ມແມ່ຍິງອາຍຸສູງເພີ່ມຂຶ້ນຢ່າງໄວວາ.
ຄໍາເຫັນ