ໄດ້ຈັດພິທີສະເຫຼີມຫຼອງວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ 2024 ໂດຍການເຂົ້າຮ່ວມຂອງ ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີທ່ານ ຄຳສອນ ກອນເຍີ ຮອງເຈົ້າແຂວງ ປະທານ ຄກມດຂ, ທ່ານ ນາງ ວິໄລວັນ ດາລາສິນ ປະທານສະຫະພັນແມ່ຍິງແຂວງ ຮອງປະທານຜູ້ປະຈຳການ ຄກມດຂ, ມີຄະນະພັກ-ຄະນະນຳຂັ້ນແຂວງ, ພະນັກງານ-ລັດຖະກອນ ພ້ອມດ້ວຍນ້ອງນັກຮຽນເຂົ້າຮ່ວມ.
ວັນທີ 25 ພະຈິກ ໄດ້ຖືກຍົກຂຶ້ນທໍາອິດຢູ່ອາເມລິກາລາຕິນ ແລະ ຄ່ອຍໆແຜ່ຂະຫຍາຍອອກໄປສູ່ປະເທດ ຕ່າງໆໃນທົ່ວໂລກໃຫ້ເປັນວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ໄດ້ຖືກປະກາດເປັນຄັ້ງທໍາອິດໃນ ກອງປະຊຸມເຄື່ອນໄຫວສົ່ງເສີມດ້ານສິດທິແມ່ຍິງ ແລະ ໃນຂົງເຂດອາເມລິກາລາຕິນ ແລະ ຄາຣິບຽນ ຊຶ່ງຈັດທີ່ນະຄອນຫຼວງໂບກາຕາ ປະເທດໂກລົມເບຍ ລະຫວ່າງທີ 18-21 ກໍລະກົດ 1981 ເພື່ອລະນຶກເຖິງວິລະກໍາຂອງສາມເອື້ອຍນ້ອງຕະກຸນມີຣາບານ ຈາກສາທາລະນະລັດໂດມີນິແກນ ທີ່ຖືກລອບຄາດຕະກຳຢ່າງໂຫດຮ້າຍປ່າເຖື່ອນ ໃນປີ 1960 ໃນລະບອບຜະເດັດການ ຣາຟາເອລ ທຣູກິໂຣ ແຕ່ປີ 1930-1961. ວັນດັ່ງກ່າວໄດ້ຖືກກຳນົດເປັນວັນລະນຶກ ແລະ ໄຫວ້ອາໄລເຖິງສາມ ເອື້ອຍນ້ອງຕະກຸນນິລາບານ, ຊຶ່ງທົ່ວໂລກໄດ້ຮັບຮູ້ວ່າເປັນວັນຕ້ານຄວາມຮຸນແຮງບົນພື້ນຖານທາງເພດ, ການໃຊ້ຄວາມຮຸນແຮງຕໍ່ແມ່ຍິງ ເປັນບັນຫາໜຶ່ງທີ່ເກີດຂຶ້ນມາຫຼາຍຍຸກ, ຫຼາຍສະໄໝຢູ່ຫຼາຍປະເທດໃນໂລກ ແລະ ມີລະດັບແຕກຕ່າງກັນ, ໂດຍອີງໃສ່ສະພາບຈຸດພິເສດທາງດ້ານເສດຖະກິດ, ຮີດຄອງປະເພນີ ຫຼື ຄວາມເຊື່ອຖື ແລະ ອື່ນໆ ຊຶ່ງໄດ້ສົ່ງຜົນກະທົບຕໍ່ແມ່ຍິງ ບໍ່ວ່າທາງດ້ານຮ່າງກາຍ, ຈິດໃຈ, ທາງເພດ, ຊັບສິນ ຫຼື ເສດຖະກິດ.
ໃນພິທີຍັງຮັບຊົມວິດີໂອສານຂອງພະນະທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປລາວ ແລະ ມີກິດຈະກຳຍ່າງມາລາທອນ ເພື່ອສຸຂະພາບ ໄລຍະທາງ 2.5 ກິໂລແມັດ ຕື່ມອີກ.
(ແຫຼ່ງຂ່າວ: ແຂວງເຊກອງ)
ຄໍາເຫັນ