 |
ຈຸດປະສົງລົງນາມເຊັນບົດບັນທຶກຄວາມເຂົ້າໃຈ (MOU) ໃນຄັ້ງນີ້, ເພື່ອເປັນການສະທ້ອນໃຫ້ເຫັນເຖິງຄວາມຕັ້ງໃຈໃນການ ຊື້-ຂາຍ ຖຸລຽນລາວ ທັງສອງຝ່າຍ ເພື່ອຢືນຢັນຄວາມສໍາພັນການຮ່ວມມືແບບຍາວນານ ແລະ ຮອບດ້ານ ລະຫວ່າງ ບໍລິສັດ Eleven Gold Fruit ກັບ ບໍລິສັດ Nanjing Qiandu Culture Technology Co.,LTD. ຊຶ່ງພິທີລົງນາມເຊັນບົດບັນທຶກຄວາມເຂົ້າໃຈ ໃນຄັ້ງນີ້ ຖືເປັນມິດໝາຍອັນດີໃນການຄ້າຂາຍ ລະຫວ່າງ ສປປ ລາວ - ສປ ຈີນ ເປັນການເພີ່ມທະວີສາຍພົວພັນຮັດແໜ້ນການຄ້າ ລະຫວ່າງ ລາວ-ຈີນ ໃຫ້ນັບມື້ນັບຂະຫຍາຍຕົວ ເຮັດໃຫ້ການຮ່ວມສ້າງ “ຄູ່ຮ່ວມຊາຕາກຳ ລາວ-ຈີນ; ຈີນ-ລາວ” ໃຫ້ເກີດດອກອອກຜົນໃນພາກປະຕິບັດຕົວຈິງ, ຜະລິດຕະພັນກະສິກຳຂອງລາວ ໂດຍສະເພາະແມ່ນຖຸລຽນ ຊຶ່ງຖືວ່າເປັນໝາກໄມ້ ທີ່ກຳລັງໄດ້ຮັບຄວາມນິຍົມໃນຕະຫຼາດ ສປ ຈີນ ຊຶ່ງຈະສາມາດເດີນທາງໄປສູ່ຜູ້ບໍລິໂພກ ໄດ້ຢ່າງສະດວກວ່ອງໄວ ແລະ ຍັງຮັກສາຄວາມສົດໃໝ່ ໄວ້ໄດ້ເປັນຢ່າງດີ, ການລົງນາມໃນຄັ້ງ ຈະເປັນການຊ່ວຍຊຸກຍູ້ ແລະ ຍົກລະດັບໃຫ້ແກ່ການປູກຖຸລຽນໃນລາວ ໃຫ້ນັບມື້ນັບຫຼາຍຂຶ້ນ ແລະ ເປັນລະບົບເຂົ້າສູ່ມາດຕະຖານສາກົນ.
ໃນພິທີ, ທ່ານ ວັນທ່ຽງ ພົມມະສຸລິນ ໄດ້ມີຄຳເຫັນເນັ້ນໜັກຕໍ່ພິທີ ລົງນາມເຊັນບົດບັນທຶກ ໃນຄັ້ງນີ້ ປະກອບມີ 3 ຢ່າງທີ່ຜູ້ປະກອບການຕ້ອງເອົາໃຈໃສ ດັ່ງນີ້: 1). ຂະບວນການຜະລິດຕ້ອງໄດ້ຮັບການຢັ້ງຢືນມາດຕະຖານກະສິກໍາສະອາດ ໂດຍສະເພາະແມ່ນຄວາມປອດໄພຂອງຜູ້ບໍລິໂພກ, ສໍາລັບການກວດ ກາວິໄຈສານພິດຕົກຄ້າງແມ່ນມີຄວາມສໍາຄັນ ແລະ ຕ້ອງໄດ້ມີການຄວບຄຸມຕາມມາດຕະຖານກະສິກຳທີ່ດີ (GAP) ເປັນຢ່າງຕໍ່າ ກ່ອນຈະນໍາຜະລິດຕະພັນເຂົ້າ ສປ ຈີນ, 2). ການປຸງແຕ່ງເບື້ອງຕົ້ນ ໂດຍສະເພາະການສ້າງໂຮງເຮືອນຄັດເກດໃຫ້ໄດ້ມາດຕະຖານ ຕ້ອງມີການແຍກເກດ ຄັກແນ່ຕ້ອງມີເກດ A.B ແລະ ເກດ C, 3). ຂະບວນການສົ່ງອອກເຮົາຕ້ອງປະຕິບັດຕາມປະເທດລູກຄ້າ ໂດຍສະເພາະ ສປ ຈີນ ຕ້ອງປະຕິບັດຕາມມາດຕະຖານຂອງ ສປ ຈີນ.
ການລົງນາມເຊັນບົດບັນທຶກຄວາມເຂົ້າໃຈ (MOU) ໃນຄັ້ງນີ້ແມ່ນ ທ່ານ ເອລາວັນ ລາດປາກດີ ປະທານບໍລິສັດ Eleven Gold Fruit ຈໍາກັດ ແລະ ທ່ານ ກ່າວ ຊິ້ວຢູ ປະທານ ບໍລິສັດ ໜານຈິງຊຽນຕູ້ ວັດທະນະທຳ ແລະ ເຕັກໂນໂລຊີ ຈຳກັດຜູ້ດຽວ ໂດຍການເປັນສັກຂີພີຍານຂອງທ່ານ ບຸນເລີດ ຫຼວງປະເສີດ, ທ່ານ ວັນທ່ຽງ ພົມມະສຸລິນ ແລະ ທ່ານ ບຸນທ່ຽງ ລັດຕະນະວົງ ພ້ອມທັງແຂກຜູ້ເຂົ້າຮ່ວມທັງສອງຝ່າຍເປັນສັກຂີພິຍານ.
(ຂ່າວ-ພາບ: ອາມຸດ ແສນທອນ ກະຊວງ ກສ)
ຄໍາເຫັນ