ພິທີເຊັນສັນຍາຮ່ວມມື ເພື່ອຊ່ວຍເຫຼືອສັງຄົມ ລະຫວ່າງ ກົມຊັ້ນຄົນ-ການຈັດຕັ້ງສັງຄົມ ສູນກາງແນວລາວສ້າງຊາດ ສນຊ ແລະ ມູນນິທິກຽດຕິສັກ ໄດ້ຈັດຂຶ້ນໃນວັນທີ 22 ກັນຍານີ້ ທີສູນກາງແນວລາວສ້າງຊາດ ໂດຍຮ່ວມລົງນາມໃນຄັ້ງນີ້ລະຫວ່າງ ທ່ານ ນາງ ຈັນສະຫງ່າ ວາລະກອນ ປະທານ ມູນນີທິກຽດຕິສັກ ແລະ ທ່ານ ວັນດີ ຈັນສົມບັດ ຫົວໜ້າກົມຊັ້ນຄົນ-ການຈັດຕັ້ງສັງຄົມ ສນຊ ໂດຍມີ ທ່ານ ເຍ່ຍເກີຢ່າ ໜໍ່ຈໍຈົງຕົວ ຮອງປະທານ ສນຊ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ຈັນສະຫງ່າ ວາລະກອນ ໄດ້ກ່າວວ່າ: ມູນນິທິກຽດຕິສັກ ມີການເຄື່ອນໄຫວ ຢູ່ 3 ຂົງເຂດຄື: ຂົງເຂດການສຶກສາ ແລະ ກິລາ, ຂົງເຂດແຮງງານ ແລະ ສະຫວັດດີການສັງຄົມ ແລະ ຂົງເຂດສາທາລະນະສຸກ ໂດຍມີສິດ ແລະ ໜ້າທີ່ໃນການລະດົມຂົນຂວາຍ ແລະ ຮັບເອົາການສະໜັບສະໜູນ, ຊ່ວຍເຫຼືອ, ການບໍລິຈາກທຶນ, ຊັບສິນຈາກບຸກຄົນ ແລະ ນິຕິບຸກຄົນທັງພາຍໃນ ແລະ ຕ່າງປະເທດ ບົນພື້ນຖານປະຕິບັດລະບຽບກົດໝາຍ ເພື່ອນຳໄປຊ່ວຍເຫຼືອສັງຄົມ ກໍຄືປະຊາຊົນລາວບັນດາເຜົ່າ ຢູ່ເຂດທີ່ມີຄວາມຫຍຸ້ງຍາກ, ຫ່າງໄກສອກຫຼີກ, ທຸລະກັນດານໃນຂອບເຂດທົ່ວປະເທດ ເປັນຕົ້ນແມ່ນຊ່ວຍເຫຼືອໂຮງຮຽນ, ໂຮງໝໍ, ຫໍສະໝຸດ, ອຸປະກອນການສຶກສາ-ອຸປະກອນການແພດ, ເຄື່ອງນຸ່ງ ແລະ ອື່ນໆ; ສະເພາະວຽກງານໃນຂົງເຂດສະຫວັດດີການສັງຄົມພວກເຮົາຈະໄດ້ສົມທົບຢ່າງແໜ້ນກັບສູນກາງແນວລາວສ້າງຊາດ, ແນວລາວສ້າງຊາດຂັ້ນທ້ອງຖິ່ນ ຮ່ວມກັບກະຊວງ-ອົງການກ່ຽວຂ້ອງໃນການໂຄສະນາ, ປະຊາສຳພັນ ແລະ ຊ່ວຍເຫຼືອຄອບຄົວ-ບຸກຄົນ ທີ່ໄດ້ຮັບຜົນກະທົບຈາກລະເບີດບໍ່ທັນແຕກ ແລະ ມີສ່ວນຮ່ວມໃນການເກັບກູ້ລະເບີດທີ່ບໍ່ທັນແຕກຢູ່ບັນດາແຂວງ-ເມືອງເປົ້າໝາຍ ຊຶ່ງຖືວ່າເປັນວຽກບຸລິມະສິດໜຶ່ງຂອງການຮ່ວມມືສອງຝ່າຍໃນເທື່ອນີ້.
ທ່ານ ເຍ່ຍເກີຢ່າ ໜໍ່ຈໍຈົງຕົວ ໄດ້ກ່າວໃນພິທີວ່າ: ການເຊັນຍາຮ່ວມມື ເພື່ອຊ່ວຍເຫຼືອສັງຄົມ ລະຫວ່າງ ກົມຊັ້ນຄົນ-ການຈັດຕັ້ງສັງຄົມ ສນຊ ແລະ ມູນນິທິກຽດຕິສັກ ຊຶ່ງເປັນການຜັນຂະຫຍາຍມະຕິກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI, ແຜນພັດທະນາອົງການແນວລາວສ້າງຊາດ 5 ປີ (2022-2025) ໃນນັ້ນແມ່ນໂຄງການປັບປຸງ ແລະ ປຸກລະດົມການຈັດຕັ້ງສັງຄົມ (ສະມາຄົມ-ມູນນິທິ) ເພື່ອເຄື່ອນໄຫວຮັບໃຊ້ສິດຜົນປະໂຫຍດຂອງປະຊາຊົນຊັ້ນຄົນຕ່າງໆ, ອີກດ້ານໜຶ່ງແມ່ນສ້າງການຫັນປ່ຽນວຽກງານແນວໂຮມໃຫ້ເປັນຮູບປະທຳ ພາຍໃຕ້ທິດນຳ ທີ່ວ່າ: ກຳມະການສູນກາງແນວລາວສ້າງຊາດ ຫຼື ການຈັດຕັ້ງແນວລາວສ້າງຊາດ ຫຼື ການຈັດຕັ້ງສັງຄົມ (ສະມາຄົມ-ມູນນິທິ) ໜຶ່ງໃຫ້ສ້າງຄຸນງາມຄວາມດີແກ່ສັງຄົມຢ່າງໜ້ອຍໃຫ້ໄດ້ໜຶ່ງໂຄງການຢູ່ບ້ານເກີດ ຫຼື ບ່ອນທີ່ຕົນເອງອາໄສຢູ່. ພ້ອມດຽວກັນນັ້ນ, ການຮ່ວມມືຂອງພວກເຮົານີ້ ຍັງເປັນການປະຕິບັດເນື້ອໃນ 4 ການຫັນປ່ຽນໃນວຽກງານແນວໂຮມ ໂດຍສະເພາະແມ່ນການສ້າງການຫັນປ່ຽນດ້ານຮູບແບບການຮ່ວມສຳພັນລະຫວ່າງອົງການພາຄີດ້ວຍກັນໃນການເຄື່ອນໄຫວວຽກງານມະຫາຊົນໃຫ້ໄປຕາມທິດລວງດຽວກັນ, ຮ່ວມມືຊ່ວຍໜູນ ແລະ ສ້າງຄວາມເຂັ້ມແຂງໃຫ້ແກ່ກັນ ແລະ ກັນ; ສ້າງການຫັນປ່ຽນ ແລະ ແກ້ໄຂຂອດທີ່ຍັງຫຍຸ້ງຍາກຕົ້ນຕໍແມ່ນການປະຕິບັດມະຕິຂອງແນວລາວສ້າງຊາດຂັ້ນຕ່າງໆເປັນຕົ້ນແມ່ນຄວາມຫຍຸ້ງຍາກທາງດ້ານລາຍຮັບ ທີ່ອາໄສແຕ່ແຫຼ່ງລາຍຮັບຂອງລັດພຽງແຫຼ່ງດຽວ ມາສູ່ການສ້າງລາຍຮັບເພີ່ມເຕີມທີ່ບໍ່ຜິດກົດໝາຍໃຫ້ຫຼາຍຂຶ້ນ. ຮູບແບບການຮ່ວມມື: ສູນກາງແນວລາວສ້າງຊາດ ກໍຄືແນວລາວສ້າງຊາດຂັ້ນທ້ອງຖິ່ນ ພວກເຮົາເປັນຜູ້ຊອກຫາເປົ້າໝາຍຊ່ວຍເຫຼືອ, ສ້າງແຜນງານ-ໂຄງການ ແລະ ກິດຈະກຳ, ແລ້ວສະເໜີຕໍ່ມູນນິທິກຽດຕິສັກ ເປັນຝ່າຍຊອກຫາແຫຼ່ງທຶນເພື່ອສະໜັບສະໜູນ ແລະຈັດຕັ້ງປະຕິບັດຮ່ວມກັນ, ຄາດຄະເນໄລຍະເວລາຮ່ວມມືແມ່ນ 5 ປີ ແລະ ມີເປົ້າໝາຍ 10 ແຂວງທີ່ມີຊາຍແດນຕິດຈອດກັບ ສສ ຫວຽດນາມ. ເນື່ອງຈາກວ່າ ໂຄງການຮ່ວມມື ເພື່ອຊ່ວຍເຫຼືອສັງຄົມ ແມ່ນຕິດພັນກັບຫຼາຍພາກສ່ວນເປັນຕົ້ນ: ກະຊວງແຮງງານ ແລະ ສະຫວັດດີການສັງຄົມ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ,ກະຊວງກະສືກຳ ແລະ ປ່າໄມ້, ກະຊວງພາຍໃນ, ກະຊວງການຕ່າງປະເທດ ແລະ ຂົງເຂດທະນາຄານ.
ຂ່າວ-ພາບ: ບຸນຕອມ
ຄໍາເຫັນ