ເມື່ອບໍ່ດົນມານີ້ ຢູ່ທີ່ຫ້ອງປະຊຸມພະແນກແຜນການ ແລະ ການລົງທືນແຂວງຫຼວງນໍ້າທາ ໄດ້ຈັດພິທີເຊັນສັນຍາໂຄງການສໍາປະທານຂົບຫິນ (ຕໍ່ອາຍຸສັນຍາຄັ້ງທີ 1) ຢູ່ເຂດບ້ານຈາອູບ ເມືອງສີງ ແຂວງຫຼວງນໍ້າທາ ລະຫວ່າງ ອົງການປົກຄອງແຂວງ ຕາງໜ້າໂດຍພະແນກແຜນການ ແລະ ການລົງທືນແຂວງ ແລະ ໂຮງງານຂົບຫີນ ຄໍາເປົາ ອ່ອນແສງສີສວນບຸກຄົນ, ໂດຍການເຂົ້າຮວ່ມຂອງທ່ານ ສີວິໄລ ປັນແກ້ວ ຮອງເຈົ້າແຂວງຫຼວງນໍ້າທາ, ມີຫົວໜ້າພະແນກ - ຮອງຫົວໜ້າພະແນກ, ປະທານບໍລິສັດ, ຂະແໜງການທີ່ກ່ຽວຂ້ອງຂອງເຂົ້າຮວ່ມ.
ທ່ານ ນາງ ສົມສີ ແກ້ວປະເສີດ ຫົວໜ້າຂະແໜງສົ່ງເສີມການລົງທຶນ ພະແນກແຜນການ ແລະ ການລົງທຶນແຂວງ ໄດ້ຜ່ານເນື້ອໃນບົດສັນຍາໂດຍຫຍໍ້ ວ່າດ້ວຍໂຄງການສໍາປະທານຂົບຫິນ ຢູ່ເຂດບ້ານຈາອູບ, ກົດ ໝາຍວ່າດ້ວຍການສົ່ງເສີມການລົງທຶນ ສະບັບເລກທີ 14/ສພຊ ລົງວັນທີ 17 ພະຈິກ 2016 ແລະ ກົດໝາຍອື່ນໆທີ່ກ່ຽວຂ້ອງຂອງ ສປປ ລາວ, ໂດຍອິງຕາມ ຂໍ້ຕົກລົງຂອງທ່ານ ເຈົ້າແຂວງ ຫຼວງນໍ້າທາ ວ່າດ້ວຍການອະນຸມັດໃຫ້ພະແນກແຜນການ ແລະ ການລົງທືນ ແຂວງເຊັນສັນຍາ (ຕໍ່ອາຍຸສັນຍາ) ສໍາປະທານໂຄງການຂຸດຄົ້ນ ແລະ ສ້າງຕັ້ງໂຮງງານຂົບຫີນ ຢູ່ເຂດບ້ານຈ່າອູບ ສະບັບເລກທີ 21/ຈຂ ລົງວັນທີ 8 ມັງກອນ 2023 ທັງສອງຝ່າຍໄດ້ຕົກລົງເຫັນດີເປັນເອກະພາບກັນ, ຝາຍຜູ້ລົງທຶນໄດ້ລົງທືນໃນມູນຄ່າ 8 ຕື້ກີບ, ທືນຈົດທະບຽນ 3 ຕື້ກີບ, ອາຍຸສັນຍາ 5 ປີ, ວາງເງີນຮັບປະກັນເປັນເງີນສົດຈໍານວນ 10 ພັນໂດລາ ແລະ ປະຕິບັດຕາມກົດຫມາຍ, ຂໍ້ກໍານົດ, ລະບຽບການ ແລະ ນະໂຍບາຍຕ່າງໆ ຢ່າງເປັນເຈົ້າການໂດຍຄຳນຶງເຖິງຜົນປະໂຫຍດລວມຂອງ 3 ພາກສ່ວນ ຄື: ພາກລັດ, ປະຊາຊົນ ແລະ ຜູ້ລົງທຶນ ໂດຍບໍ່ສ້າງຜົນກະທົບຮ້າຍແຮງຕໍ່ສິ່ງແວດລ້ອມ ແລະ ສັງຄົມ.
(ຂ່າວ: ສົມພອນ ຂູນດາວົງ)
ຄໍາເຫັນ