ຢ່າແຕກຕື່ນ! ພາກສ່ວນກ່ຽວຂ້ອງ ເລັ່ງໃຫ້ບໍລິສັດ ສະໜອງນ້ຳມັນກາຊວນໃຫ້ພຽງພໍກັບຄວາມຕ້ອງການ 

ໃນທ້າຍອາທິດຜ່ານມາ ປ້ຳບໍລິການຈຳນວນໜຶ່ງໄດ້ຕິດປ້າຍປິດບໍລິການນ້ຳມັນກາຊວນຊົ່ວຄາວ ເຮັດໃຫ້ເກີດມີສະພາບລົດຕໍ່ແຖວ ລໍຖ້າໃສ່ນ້ຳມັນຢູ່ບາງປ້ຳ ຈຶ່ງເຮັດໃຫ້ສັງຄົມເກີດຄວາມກັງວົນວ່າ ຈະເກີດບັນຫາຂາດແຄນນ້ຳມັນອີກຄັ້ງ, ດັ່ງນັ້ນ ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ຮ່ວມກັບ ສະມາຄົມນ້ຳມັນເຊື້ອໄຟ ແລະ ອາຍແກັດລາວ ໄດ້ປະສານຫາບໍລິສັດນຳເຂົ້ານ້ຳມັນເຊື້ອໄຟ ເລັ່ງຈັດຫານ້ຳມັນ ເພື່ອສະໜອງໃຫ້ແກ່ສັງຄົມຢ່າງພຽງພໍກັບຄວາມຕ້ອງການ.
ອີງຕາມຂໍ້ມູນຈາກສະມາຄົມນ້ຳມັນເຊື້ອໄຟ ແລະ ອາຍແກັດລາວໃຫ້ຮູ້ວ່າ: ໃນຫຼາຍປີຜ່ານມານີ້ ການຊົມໃຊ້ນ້ຳມັນເຊື້ອໄຟຂອງ ສປປ ລາວ ໄດ້ມີທ່າອ່ຽງເພີ່ມຂຶ້ນ ຕາມການຂະຫຍາຍຕົວຂອງເສດຖະກິດ, ໃນປີ 2023 ມີການນຳເຂົ້ານ້ຳມັນທັງໝົດ 1.654 ລ້ານລິດ, ໃນນີ້ ນ້ຳມັນກາຊວນ 1.259 ລ້ານລິດ, ແອັດຊັງ 365 ລ້ານລິດ ແລະ ນ້ຳມັນປະເພດອື່ນໆອີກ, ສະເລ່ຍການຊົມໃຊ້ປະມານ 135-140 ລ້ານລິດຕໍ່ເດືອນ, ໃນນັ້ນ ແອັດຊັງປະມານ 30 ລ້ານລິດຕໍ່ເດືອນ ຫຼື 1 ລ້ານລິດຕໍ່ມື້. ສ່ວນກາຊວນປະມານ 105 ລ້ານລິດຕໍ່ເດືອນ ຫຼື ປະມານ 3,5 ລ້ານລິດຕໍ່ມື້, ສ່ວນແຫຼ່ງທີ່ມາຂອງນ້ຳມັນແມ່ນມາຈາກໂຮງກັ່ນ ແລະ ຜູ້ສະໜອງຢູ່ປະເທດໃກ້ຄຽງ ໂດຍສະເພາະຢູ່ ປະເທດໄທ ແລະ ສສ ຫວຽດນາມ. ມາຮອດປັດຈຸບັນໂຮງກັ່ນນ້ຳມັນຂອງປະເທດເພື່ອນບ້ານທີ່ເປັນແຫຼ່ງສະໜອງນ້ຳມັນໃຫ້ແກ່ ສປປ ລາວ ໄດ້ປິດບາງສາຍການຜະລິດກະຊົ່ວຄາວ ເພື່ອປັບປຸງການຜະລິດ ຍົກລະດັບມາດຕະຖານຂອງນ້ຳມັນ ຊຶ່ງຄາດວ່າ ຈະສາມາດກັບມາດຳເນີນການຜະລິດໄດ້ປົກກະຕິໃນທ້າຍເດືອນມັງກອນນີ້. ການປິດສາຍການຜະລິດຊົ່ວຄາວນັ້ນ ໄດ້ເຮັດໃຫ້ການສົ່ງອອກນ້ຳມັນເຊື້ອໄຟໄປຍັງປະເທດອ້ອມຂ້າງ ລວມທັງ ສປປ ລາວ ຂອງພວກເຮົາ ຫຼຸດລົງ ແລະ ໄດ້ຂາຍໃນລາຄາທີ່ສູງຂຶ້ນ ໂດຍສະເພາະແມ່ນນ້ຳມັນກາຊວນ.    ຜ່ານມການຕິດຕາມສະພາບການນຳເຂົ້ານ້ຳມັນເລີ່ມແຕ່ວັນທີ 1 ຫາ 21 ມັງກອນ 2024 ມີການນຳເຂົ້າທັງໝົດ 106 ລ້ານລິດ, ໃນນັ້ນ ນ້ຳມັນແອັດຊັງ 21 ລ້ານລິດ, ກາຊວນ 80 ລ້ານລິດ ແລະ ນ້ຳມັນອື່ນໆ 5 ລ້ານລິດ.    ເຖິງວ່າຈະເປັນໂຕເລກຕ່ຳ ເມື່ອທຽບກັບເດືອນທັນວາ 2023 ແຕ່ກໍຢູ່ໃນເກນທີ່ສາມາດສະໜອງໄດ້ ແຕ່ອາດຈະບໍ່ພຽງພໍກັບຄວາມຕ້ອງການທີ່ມີທ່າອ່ຽງເພີ່ມຂຶ້ນໃນປັດຈຸບັນ. ໃນອາທິດຜ່ານມາ ມີການຊົມໃຊ້ນ້ຳມັນເພີ່ມຂຶ້ນສູງ, ໃນຂະນະທີ່ນ້ຳມັນແຮຂອງປ້ຳບໍ່ພຽງພໍກັບການສະໜອງ ໂດຍສະເພາະນ້ຳມັນກາຊວນ ຈຶ່ງເຮັດໃຫ້ປ້ຳບໍລິການຈຳນວນໜຶ່ງຕິດປ້າຍປິດບໍລິການນ້ຳມັນກາຊວນຊົ່ວຄາວ ເຮັດໃຫ້ເກີດມີສະພາບລົດຕໍ່ແຖວລໍຖ້າໃສ່ນ້ຳມັນຢູ່ບາງປ້ຳ ຈຶ່ງເຮັດໃຫ້ສັງຄົມມີຄວາມກັງວົນວ່າ ຈະເກີດບັນຫາຂາດແຄນນ້ຳມັນຂຶ້ນອີກ.
    ຕໍ່ບັນຫາດັ່ງກ່າວ ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ຮ່ວມກັບສະມາຄົມນ້ຳມັນເຊື້ອໄຟ ແລະ ອາຍແກັດລາວ ໄດ້ປະສານຫາບັນດາບໍລິສັດນຳເຂົ້ານ້ຳມັນ ແລະ ບໍລິສັດຈຳໜ່າຍນ້ຳມັນ ເພື່ອໃຫ້ຄວາມຮ່ວມມືລະບາຍນ້ຳມັນເຊື້ອໄຟໃຫ້ປ້ຳຂາຍຍ່ອຍຂອງຕົນ ເພື່ອແກ້ໄຂບັນຫາຄວາມຫຍຸ້ງຍາກດັ່ງກ່າວນີ້ ແລະ ຈະໄດ້ລະດົມໃຫ້ບໍລິສັດນຳເຂົ້ານ້ຳມັນເຊື້ອໄຟ ເລັ່ງຈັດຫານ້ຳມັນຈາກແຫຼ່ງຕ່າງໆ ຈາກປະເທດໃກ້ຄຽງ ເຂົ້າມາສະໜອງໃຫ້ສັງຄົມໃຫ້ມີຄວາມຕໍ່ເນື່ອງ ເພື່ອເຮັດໃຫ້ການສະໜອງນ້ຳມັນກາຊວນ ກັບຄືນສູ່ປົກະຕິໃນໄວໆນີ້.
ຂ່າວ: ຄ.ຄຳປະສິດ