ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ຂຶ້ນສະເໜີຮ່າງກົດໝາຍວ່າດ້ວຍການຮັກສາສຸຂະພາບຂັ້ນຕົ້ນ(ສະບັບສ້າງໃໝ່) ແນໃສ່ເພື່ອເປັນບ່ອນອີງໃນການປະຕິບັດວຽກງານຮັກສາສຸຂະພາບຂັ້ນຕົ້ນໃຫ້ມີຄຸນນະພາບໃນວັນທີ 15 ພະຈິກນີ້ ໃນວາລະກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ພາຍໃຕ້ການເປັນປະທານຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ.

ທ່ານ ບຸນແຝງ ພູມມະໄລສິດ ກ່າວວ່າ: ໄລຍະຜ່ານມາໄດ້ນຳໃຊ້ນະໂຍບາຍຮັກສາສຸຂະພາບຂັ້ນຕົ້ນສະບັບປີ2019 ເປັນບ່ອນອີງໃນການຈັດຕັ້ງປະຕິບັດວຽກງານຮັກສາສຸຂະພາບຂັ້ນຕົ້ນ.ຜ່ານການຈັດຕັ້ງປະຕິບັດເຫັນວ່າຍັງມີບັນຫາ, ຂໍ້ຄົງຄ້າງ ແລະ ສິ່ງທ້າທາຍຫຼາຍໃນວຽກງານດັ່ງກ່າວ. ເປັນຕົ້ນເງື່ອນໄຂໃນການເຂົ້າເຖິງການບໍລິການດ້ານສຸຂະພາບຂອງປະຊາຊົນ ໂດຍສະເພາະຢູ່ເຂດຫ່າງໄກສອກຫຼີກ ແລະ ທຸລະກັນດານຍັງບໍ່ມີຄວາມສະດວກ, ຄວາມຮັບຮູ້ ແລະ ການເປັນເຈົ້າການຂອງປະຊາຊົນຕາມການຮັກສາສຸຂະພາບ ຍັງບໍ່ສູງ, ພະນັກງານທີ່ເຮັດວຽກຮັກສາສຸຂະພາບຂັ້ນຕົ້ນຢູ່ຂັ້ນສູນກາງ ແລະ ທ້ອງຖິ່ນ ຍັງບໍ່ທັນພຽງພໍກັບຄວາມຕ້ອງການ, ການຝຶກອົບຮົມວຽກງານຮັກສາສຸຂະພາບຂັ້ນຕົ້ນໃຫ້ແກ່ອາສາສະໝັກຂັ້ນບ້ານ(ອສບ) ຍັງປະຕິບັດໜ້າວຽກບໍ່ໄດ້ຢ່າງເປັນປົກກະຕິ, ຕໍ່ເນື່ອງ ແລະ ທົ່ວເຖິງ, ຄວາມຮັບຜິດຊອບຂອງຄະນະກຳມະການຮັກສາສຸຂະພາບຂັ້ນບ້ານ ແລະ ອສບ ທີ່ມີຢູ່ຍັງບໍ່ທັນຈະແຈ້ງ ແລະ ການເຮັດວຽກຍັງມີລັກຊະນະຊໍ້າຊ້ອນກັນ ລວມທັງຈຳນວນ ອສບ ກໍຍັງບໍ່ພຽງພໍ ແລະບໍ່ລວມສູນ ຊຶ່ງຍັງຂຶ້ນກັບວິຊາການສາຍຕັ້ງ; ການຕິດຕາມ ກວດກາ, ການປະເມີນຜົນ ແລະ ໃຫ້ບໍລິການວຽກງານປິ່ນອ້ອມຍັງບໍ່ເປັນລະບົບ, ຕໍ່ເນື່ອງ, ການຊຸກຍູ້ສົ່ງເສີມ ແລະ ການຮ່ວມມືຈາກຄູ່ຮ່ວມພັດທະນາ ແລະ ອົງການຈັດຕັ້ງສາກົນທັງພາຍໃນ ແລະ ຕ່າງປະເທດ ກ່ຽວກັບວຽກງານຮັກສາສຸຂະພາບຂັ້ນຕົ້ນ ຍັງມີຂອບເຂດຈຳກັດ. ສະນັ້ນຈຶ່ງໄດ້ສ້າງກົດໝາຍສະບັບນີ້ຂຶ້ນມາ.

ຮ່າງກົດໝາຍສະບັບນີ້ປະກອບມີ XIພາກ, 6 ໝວດ, 78 ມາດຕາ. ພາຍຫຼັງກົດໝາຍຖືກຮັບຮອງ ແລະ ມີຜົນບັງຄັບໃຊ້ຈະເປັນບ່ອນອີງອັນສໍາຄັນໃນການເຄື່ອນໄຫວວຽກງານການຮັກສາສຸຂະພາບຂັ້ນຕົ້ນ ຢ່າງຖືກຕ້ອງ ແລະ ສອດຄ່ອງກັບແນວທາງນະໂຍບາຍ, ກົດໝາຍ, ມີຄວາມເປັນລະບົບ, ຄ່ອງຕົວ, ມີປະສິດທິພາບ ແລະ ປະສິດທິຜົນ;ເຮັດໃຫ້ລະບົບສາທາລະນະສຸກຂັ້ນຮາກຖານມີຄວາມເຂັ້ມແຂງ, ກົນໄກໃນການຄຸ້ມຄອງ, ຕິດຕາມກວດກາແລະ ພັດທະນາໄດ້ຮັບການປັບປຸງ ແລະ ພັດທະນາໃຫ້ມີຄຸນນະພາບດີຂຶ້ນ;ເຮັດໃຫ້ປະຊາຊົນລາວບັນດາເຜົ່າເຂົ້າເຖິງການບໍລິການດ້ານສາທາລະນະສຸກຂັ້ນພື້ນຖານໄດ້ຢ່າງທົ່ວເຖິງ.

ຂ່າວ: ຍຸພິນທອງ