ສະພາປະຊາຊົນແຂວງສາລະວັນ ຈັດກອງປະຊຸມເຜີຍແຜ່ມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 11 ສະໄໝທີ IX ຕິດພັນກັບການເຜີຍແຜ່ເອກະສານໜັງສືແຈ້ງຕອບຂອງພະແນກພາຍໃນແຂວງສາລະວັນ ເລກທີ 68/ພນຂ ກ່ຽວກັບການຂຽນກຳນົດຕຳແໜ່ງງານຂອງສະພາປະຊາຊົນແຂວງ, ໂດຍການເຂົ້າຮ່ວມຂອງ ທ່ານນາງ ສູນໄຖ ໄຊຍະແສງ ຮອງປະທານສະພາປະຊາຊົນແຂວງ, ທ່ານສົມພອນ ແສງສຸລິຈັນ ເລຂາທິການສະພາປະຊາຊົນແຂວງ, ມີຄະນະພັກຮາກຖານ, ເລຂາ-ຮອງເລຂາຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນເຂົ້າຮ່ວມຮັບຟັງ ຊຶ່ງກອງປະຊຸມຈັດຂຶ້ນໃນວັນທີ 21 ກັນຍາ ຜ່ານມານີ້.

ໃນພິທີ ທ່ານນາງ ສູນໄຖ ໄຊຍະແສງ ໄດ້ຍົກໃຫ້ເຫັນວ່າ: ກອງປະຊຸມໄດ້ຍົກສູງຄວາມຮັບຜິດຊອບທາງດ້ານການເມືອງ, ສຸມສະຕິປັນຍາຄົ້ນຄວ້າ, ປຶກສາຫາລື ແລະ ໃຫ້ທິດຊີ້ນໍາຕໍ່ບັນຫາສໍາຄັນ, ພ້ອມທັງຮັບຟັງການຕີລາຄາການນຳພາຮອບດ້ານຂອງຄະນະບໍລິຫານງານພັກແຂວງໃນໄລຍະ 6 ເດືອນຕົ້ນປີ (2023) ໄປພ້ອມກັບການເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 6 ສະໄໝທີ XI, ຕິດພັນກັບການຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນໄລຍະ 6 ເດືອນຕົ້ນປີ 2023 ເພື່ອວາງທິດທາງແຜນການ 6 ເດືອນທ້າຍປີແລະ ລົງເລິກເຈາະຈີ້ມວຽກງານກວດກາ, ວຽກງານແນວລາວສ້າງຊາດ, ວຽກກະກຽມໃຫ້ແກ່ກອງປະຊຸມໃຫຍ່ 3 ຂັ້ນຂອງພັກ-ອົງການຈັດຕັ້ງມະຫາຊົນ ແລະ ການຫັນພະນັກງານລົງກໍ່ສ້າງຮາກຖານການເມືອງ; ພ້ອມດຽວກັນກອງປະຊຸມກໍໄດ້ຮັບຮອງເອົາທິດທາງແຜນການ 6 ເດືອນທ້າຍປີ 2023 ແລະ ວຽກງານຈຸດສຸມໃນຕໍ່ໜ້າເປັນຕົ້ນ: ວຽກງານຂົງເຂດປ້ອງກັນຊາດ-ປ້ອງກັນຄວາມສະຫງົບ, ວຽກງານຂົງເຂດເສດຖະກິດ, ວຽກງານຂົງເຂດວັດທະນະທຳ-ສັງຄົມ, ວຽກງານຂົງເຂດບໍລິຫານລັດ, ວຽກງານແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ, ວຽກງານການຕ່າງປະເທດ, ວຽກງານກໍ່ສ້າງຮາກຖານການເມືອງພັດທະນາຊົນນະບົດ, ການແກ້ໄຂຄວາມທຸກຍາກ ແລະ ວຽກງານ 3 ສ້າງ, ວຽກງານການເມືອງ-ແນວຄິດກໍ່ສ້າງພັກ-ພະນັກງານ ແລະ ວຽກງານຈຸດສຸມຈຳນວນໜຶ່ງເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດໃນຕໍ່ໜ້າໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ. ທັງນີ້ກໍເພື່ອເປັນການສ້າງຄວາມຮັບຮູ້ ແລະ ເຂົ້າໃຈໃຫ້ກັບພະນັກງານຫຼັກແຫຼ່ງ, ພະນັກງານນໍາພາ-ຄຸ້ມຄອງແຕ່ລະຂັ້ນເປັນເຈົ້າການນຳເອົາເນື້ອໃນຈິດໃຈຂອງເອກະສານມະຕິກອງປະຊຸມຄົບຄະນະບໍລິຫານງານພັກແຂວງຄັ້ງທີ 11 ສະໄໝທີ IX ໄປຈັດຕັ້ງຜັນຂະຫຍາຍໃຫ້ກວ້າງຂວາງ ແລະ ເຂົ້າໃນວຽກງານຕົວຈິງຢ່າງປະດິດສ້າງ ແລະ ໃຫ້ເກີດຜົນປະໂຫດສູງສຸດ.

ພ້ອມນັ້ນ, ທ່ານ ສົມພອນ ແສງສຸລິຈັນ ກໍໄດ້ຂຶ້ນຜ່ານເອກະສານໜັງສືແຈ້ງຕອບຂອງພະແນກພາຍໃນແຂວງສາລະວັນ ເລກທີ 68/ພນຂ ລົງວັນທີ 15 ກັນຍາ 2023 ກ່ຽວກັບຜົນການກວດກາການຂຽນກຳນົດຕຳແໜ່ງງານຂອງສະພາປະຊາຊົນແຂວງໃຫ້ໄດ້ຮັບຊາບ, ພ້ອມທັງຄົ້ນຄວ້າປຶກສາຫາລືກ່ຽວກັບຕຳແໜ່ງງານທີ່ຕິດພັນກັບບັນດາກຸ່ມວຽກທີ່ຍັງບໍ່ທັນພຽງພໍໃນການກຳນົດເຂົ້າໃສ່ບາງຂະແໜງການຕື່ມອີກ.

ຂ່າວ-ພາບ: ທິດລານີ ໂຄດໂຍທາ.