ວິທະຍຸກະຈາຍສຽງຫວຽດນາມລາຍງານວ່າ: ໃນການຖະແຫຼງຂ່າວຂອງລັດຖະບານຫວຽດນາມສະໄໝສາມັນເດືອນທັນວາທີ່ດຳເນີນໃນວັນທີ 8 ມັງກອນຜ່ານມາຢູ່ ນະຄອນຫຼວງຮ່າໂນ້ຍ, ການນຳກະຊວງແຜນການແລະການລົງທຶນຫວຽດນາມໄດ້ແຈ້ງໃຫ້ຊາບກ່ຽວກັບແຜນການຂະຫຍາຍຕົວໃນປີ 2025 ຂອງລັດຖະບານແລະບັນດາການຄາດຄະເນກ່ຽວກັບການພັດທະນາເສດຖະກິດ - ສັງຄົມໃນປີ 2025.

ໂດຍບັນດາປັດໄຈເພື່ອໃຫ້ພື້ນຖານເສດຖະກິດບັນລຸເປົ້າໝາຍ 8% ໃນປີ 2025, ທ່ານຫງວຽນດຶກເຕິມຮອງລັດຖະມົນຕີກະຊວງແຜນການແລະການລົງທຶນກ່າວວ່າ: ໃນສະພາບການຍັງປະສົບກັບຄວາມຫຍຸ້ງຍາກ, ແຕ່ເສດຖະກິດປີ 2025 ໄດ້ຮັບການສືບທອດ, ສືບຕໍ່ຂະຫຍາຍຕົວ. ໃນນັ້ນ, ບັນດາສໍານັກງານແຫ່ງລັດໄດ້ຮັບການປັບປຸງກະທັດຮັດລົງ, ຍົກສູງປະສິດທິຜົນ, ປະສິດທິພາບ…ນີ້ແມ່ນໜຶ່ງໃນບັນດາກຳລັງໜູນຈະຊ່ວຍການຂະຫຍາຍຕົວຂອງເສດຖະກິດບັນລຸໝາກຜົນຫຼາຍຢ່າງ. ປັດໄຈທີສອງ, ແມ່ນການຊຸກຍູ້ການຂະຫຍາຍຕົວທີ່ຕິດພັນກັບເສດຖະກິດມະຫາພາກ, ການຄວບຄຸມໄພເງິນເຟີ້, ຮັບປະກັນບັນດາຄວາມດຸ່ນດ່ຽງໃຫຍ່ຂອງພື້ນຖານເສດຖະກິດ. ພ້ອມກັນນັ້ນ, ແມ່ນການເພີ່ມທະວີບັນດາກຳລັງໜູນໃນການຂະຫຍາຍຕົວທີ່ມີມາແຕ່ດົນນານກ່ຽວກັບການລົງທຶນ, ກະຕຸກຊຸກຍູ້ການບໍລິໂພກແລະຍູ້ແຮງການສົ່ງເສີມທາງການຄ້າແລະການສົ່ງອອກ.

ທ່ານຫງວຽນດຶກເຕິມໃຫ້ຮູ້ວ່າ: ພວກຂ້າພະເຈົ້າກຳນົດປີ 2025 ຕ້ອງປະຕິບັດການກະຕຸກຊຸກຍູ້ການບໍລິໂພກພາຍໃນປະເທດແມ່ນໜຶ່ງໃນບັນດາໜ້າທີ່ສຳຄັນ, ບໍ່ພຽງແຕ່ຫວຽດນາມຜັນຂະຫຍາຍປະຕິບັດເທົ່ານັ້ນຫາກຍັງມີຫຼາຍປະເທດຜັນຂະຫຍາຍປະຕິບັດອີກດ້ວຍ. ສຳລັບການດຶງດູດແຂກທ່ອງທ່ຽວພາຍໃນແລະຕ່າງປະເທດ, ປີ 2025 ສູ້ຊົນດຶງດູດແຂກທ່ອງທ່ຽວພາຍໃນປະເທດ 120 – 130 ລ້ານເທື່ອຄົນແລະແຂກທ່ອງທ່ຽວສາກົນ 20 ລ້ານເທື່ອຄົນ.