ຄະນະພັກຮາກຖານ ຫ້ອງການກອງບັນຊາການທະຫານແຂວງບໍ່ແກ້ວ ໄດ້ຈັດພິທີມອບບັດແດງ ໃຫ້ແກ່ສະມາຊິກພັກສົມບູນ ຊຸດທີ II ຂອງໜ່ວຍພັກ I ຂຶ້ນເມື່ອບໍ່ດົນມານີ້, ທີ່ຫ້ອງການດັ່ງກ່າວ ໂດຍການເປັນປະທານຂອງສະຫາຍ ພັນໂທ ບຸນຄ້ຳ ຄຳພັນ ຮອງຄະນະພັກຮາກຖານເລຂາໜ່ວຍພັກ I ຫ້ອງການກອງບັນຊາການທະຫານແຂວງ, ມີຄະນະໜ່ວຍພັກ, ສະມາຊິກພັກເຂົ້າຮ່ວມ.

ໃນພິທີ, ສະຫາຍ ພັນຕີ ເພັດຈໍາພອນ ຄໍາປະດິດ ກໍາມະການໜ່ວຍພັກ ໄດ້ຜ່ານມະຕິຕົກລົງຂອງຄະນະປະຈຳພັກແຂວງສະບັບເລກທີ 466/ຄປພຂ ລົງວັນທີ 24 ກຸມພາ 2022 ວ່າດ້ວຍການຮັບຮອງອອກບັດໃຫ້ສະມາຊິກພັກສົມບູນ ຂອງພັກປະຊາຊົນປະຕິວັດລາວ ໂດຍອິງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ໝວດທີ I ມາດຕາ 8 ວ່າດ້ວຍສະມາຊິກພັກ ແລະ ການນຳໃຊ້ບັດສະມາຊິກພັກ. ດັ່ງນັ້ນ, ຄະນະປະຈໍາພັກ ແຂວງບໍ່ແກ້ວ ຕົກລົງຮັບຮອງເອົາລາຍຊື່ສະມາຊິກພັກສົມບູນຂອງພັກປະຊາຊົນປະຕິວັດລາວ ຜູ້ທີ່ມີມາດຖານເງື່ອນໄຂຄົບຖ້ວນໄດ້ຮັບບັດ ຈໍານວນທັງໝົດ 9 ສະຫາຍ ຍິງ 3 ສະຫາຍ. ເປັນກຽດຂຶ້ນມອບບັດໂດຍສະຫາຍ ພັນໂທ ບຸນຄ້ຳ ຄຳພັນ.

ໂອກາດນີ້, ສະຫາຍ ຮອງຄະນະພັກຮາກຖານ ເລຂາໜ່ວຍພັກ I ໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນ ຂອງບັດສະມາຊິກພັກສົມບູນທີ່ໄດ້ຮັບ ແມ່ນໝາກຜົນ ແລະ ຜົນງານອັນຍິງໃຫຍ່ ເປັນເອກກະສານທີ່ສຳຄັນຂອງຊາດ ຂອງພັັກ ເອົາໃຈໃສ່ປົກປັກຮັກສາ ແລະ ຄຸ້ມຄ້ອງການນຳໃຊ້ບັດໃຫ້ຖືກຕ້ອງຕາມລະບຽບຂອງພັກປະຊາຊົນປະຕິວັດລາວວາງອອກ, ເປັນແບບຢ່າງນຳໜ້າທຸກຂົງເຂດວຽກງານໃຫ້ແກ່ມະຫາຊົນ, ປັບປຸງແບບແຜນວິທີເຮັດວຽກ ຕາມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກ ຕິດພັນກັບພະລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມເຕີບໃຫ່ຍເຂັ້ມແຂງ ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ.

(ຂ່າວ: ພາກ ສຸທິປັນຍາ)