ພິທີເປີດຊຸດອົບຮົມວຽກງານສ້າງຄວາມເຂັ້ມແຂງໃຫ້ນັກຂ່າວ 7 ຕົວເມືອງ ແລະ ບັນດາພະແນກການອ້ອມຂ້າງ ແຂວງບໍລິຄໍາໄຊ ເພື່ອກະກຽມຄວາມພ້ອມຮັບໃຊ້ກອງປະຊູມໃຫຍ່ 3 ຂັ້ນຂອງພັກ, ໄດ້ຈັດຂຶ້ນໃນລະຫວ່າງວັນທີ 28-30 ຕຸລາ ຢູ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງບໍລິຄຳໄຊ, ໂດຍການເປັນປະທານເຂອງທ່ານ ສົນທອງ ວີບຸນກ້ວາງ ຫົວໜ້າພະແນກ ຖວທ ແຂວງ, ໃຫ້ກຽດເຂົ້າຮ່ວມມີ ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພີມປະຊາຊົນ, ມີບັນດາວິທະຍາກອນຈາກສູນກາງ ແລະ ສຳມະນາກອນຈາກພະແນກການອ້ອມຂ້າງແຂວງ ແລະ ຫ້ອງການ ຖວທ ຈາກ 7 ເມືອງເຂົ້າຮ່ວມ.

ຊຸດອົມຮົມຄັ້ງນີ້, ບັນດາຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບ 5 ຫຼັກການພື້ນຖານໃນການຂຽນຂ່າວ, ເຕັກນິກການຂຽນຂ່າວອອກສື່ອອນລາຍ, ເຕັກນິກການຕັດຕໍ່ພາບ-ສຽງ, ເຕັກນິກການລາຍງານຂ່າວ, ການສົ່ງຂ່າວ ແລະ ໂພດຂ່າວລົງສື່ອອນລາຍ; ເຕັກນິກການຖ່າຍທອດສົດຜ່ານສື່ ແລະ ຖ່າຍບັນທຶກຂ່າວກອງປະຊຸມ ເຫຼົ່ານີ້ເປັນຕົ້ນ. ບັນດາຫົວຂໍ້ຝຶກຕ່າງໆ ເຫຼົ່ານີ້ແມ່ນເປັນພື້ນຖານໃຫ້ແກ່ບັນດານັກສໍາມະນາກອນທີ່ເປັນນັກຂ່າວ ມາຈາກບັນດາເມືອງ ແລະ ພະແນກການອ້ອມຂ້າງແຂວງ ເພື່ອນຳໄປໝູນໃຊ້ເຂົ້າໃນວຽກງານສື່ມວນຊົນ, ພ້ອມນີ້ການຝຶກອົບຮົມຍັງໄດ້ມີການແບ່ງກຸ່ມຈັດກິດຈະກຳແລກປ່ຽນຖາມຕອບເຊິ່ງກັນ ແລະ ກັນ ເພື່ອເປັນການປະເມີນ-ທົດສອບ ຄວາມເຂົ້າໃຈ-ຄວາມຮັບຮູ້ ກ່ຽວກັບຫົວຂໍ້ການຝຶກອົບຮົມໃນຄັ້ງນີ້.

(ຂ່າວ-ພາບ: ວຽງສະຫວັນ)