ໃນລະຫວ່າງວັນທີ 6-7 ພະຈິກ ຜ່ານມາ, ອົງການແພຣນສາກົນປະຈໍາ ສປປ ລາວ ໄດ້ສືບຕໍ່ນໍາເອົາເຄື່ອງຊ່ວຍເຫຼືອລົງແຈກຢາຍໃຫ້ພໍ່ແມ່ປະຊາຊົນຄອບຄົວທີ່ຖືກຜົນກະທົບໄພນໍ້າຖ້ວມຢູ່ເມືອງຜາອຸດົມ ແຂວງບໍ່ແກ້ວ ຊຶ່ງນໍາພາທີມງານໂດຍ ທ່ານ ແສງສັນຕິສິດ ຊະນະສີສານ ຮອງອໍານວຍການອົງການແພຣນສາກົນ ປະຈໍາ ສປປ ລາວ ພ້ອມດ້ວຍຄະນະ ໄດ້ສົມທົບກັບ ການນໍາເມືອງຜາອຸດົມ ນໍາພາໂດຍທ່ານ ກາງ ມະນີຫວ່າງ ຮອງເຈົ້າເມືອງ ພ້ອມດ້ວຍພາກສ່ວນກ່ຽວຂ້ອງຂອງເມືອງ ໄດ້ນໍາເອົາເຄື່ອງຊ່ວຍເຫຼືອລົງແຈກຢາຍໃຫ້ພໍ່ແມ່ປະຊາຊົນຈໍານວນ 13 ບ້ານທີ່ຖືກຜົນກະທົບຈາກໄພພິບັດທໍາມະຊາດນໍ້າຖ້ວມໃນໄລຍະຜ່ານມາຈໍານວນ 255 ຄອບຄົວ, ໃນນີ້: ບ້ານນາໂຮມມີ 19 ຄອບຄົວ, ປາກຫາດ 35 ຄອບຄົວ, ຫາດຄໍາ 5 ຄອບຄົວ, ຫາດຫ້ອມ 20 ຄອບຄົວ, ຫ້ວຍບົງ 16 ຄອບຄົວ, ວັງປ້ອມ 16 ຄອບຄົວ, ຫາດລີ່ 27 ຄອບຄົວ, ດອນໃຈ 2 ຄອບຄົວ, ຫາດໜາມ 32 ຄອບຄົວ, ຫາດໂຊນ 44 ຄອບຄົວ, ຫາດໝວກ 12 ຄອບຄົວ ແລະ ບ້ານເພັງ 16 ຄອບຄົວ. ຄອບຄົວໜຶ່ງຈະໄດ້ຮັບເຂົ້າກິນ 120 ກິໂລ, ອາຫານແຫ້ງປະເພດປ໋ອງປາ, ໝີ່ແຫ້ງສໍາເລັດຮູບນວນໜຶ່ງ, ຜ້າຫົ່ມໂຕ່ໆ, ສາດປູ, ຖັງກອງນໍ້າ, ເຄື່ອງສຸຂະອະນາໄມ ແລະ ອື່ນໆ. ນອກຈາກນີ້, ຍັງໄດ້ມອບໃຫ້ຄູ-ອາຈານ ແລະ ນ້ອງນັກຮຽນ ທີຢູ່ຫໍພັກໂຮງຮຽນ ມຕ ຫາດໜາມ ໄດ້ຮັບເຂົ້າສານ 30 ກິໂລ/ຄົນ ພ້ອມທັງເຄື່ອງໃຊ້ອື່ນໆອີກຈໍານວນໜຶ່ງ ລວມມູນຄ່າ 2 ຕື້ 451 ກວ່າກີບ. ເຊິ່ງໄດ້ຮັບການສະໜັບສະໜູນທຶນຊ່ວຍເຫຼືອຈາກອົງການແພຣນສາກົນປະຈໍາຍີ່ປຸ່ນ.

(ຂ່າວ: ໂສພາ ທິບພະວົງ)