ໃນວັນທີ 6 ພະຈິກ ຜ່ານມານີ້, ທ່ານ ຄຳພັນ ຄຳພູບົວ ຮອງເຈົ້າເມືອງໆພຽງ ແຂວງໄຊຍະບູລີໄດ້ລົງມອບເງີນໃຫ້ກັບກຸ່ມຊາວນາບ້ານນາແວນ ຢູ່ທີ່ຫ້ອງປະຊຸມກຸ່ມນາສຳພັນ, ມີບັນດາຄະນະຫ້ອງການກະສິກຳ ແລະ ປ່າໄມ້ເມືອງ, ຄະນະປະສານງານໂຄງການພັດທະນາພື້ນຖານໂຄງລາງຊົນນະບົດ ແລະ ການຄຸ້ມຄອງອາງໂຕງແບບຍືນຍົງຂັ້ນແຂວງ ແລະ ຂັ້ນເມືອງ, ພະນັກງານຈາກອົງການອາຫານໂລກ, ທະນາຄານການຄ້າຕ່າງປະເທດ ສາຂາແຂວງໄຊຍະບູລີ, ອົງການປົກບ້ານພ້ອມດ້ວຍຊາວກະສິກອນບ້ານນາແວນເຂົ້າຮ່ວມ.

ການມອບເງີນໃນຄັ້ງນີ້, ແມ່ນໄດ້ຮັບງົບປະມານຈາກອົງການອາຫານໂລກມອບໃຫ້ສະມາຊິກກຸ່ມນຳໃຊ້ນ້ຳໂຄງການພັດທະນາພື້ນຖານໂຄງລາງຊົນນະບົດ ແລະ ການຄຸ້ມຄອງອາງໂຕງແບບຍືນຍົງ ເພຶ່ອຮັບໃຊ້ເຂົ້າໃນການຊື້ອຸປະກອນການຜະລິດກະສິກຳຄອບຄົວລະ 3 ລ້ານ 2 ແສນກີບ. ສຳລັບເມືອງພຽງແມ່ນໄດ້ຮັບທຶນຈາກໂຄງການທັງໝົດ 1 ຕື້ 7 ຮ້ອຍລ້ານກວ່າກີບ, ມີທັງໝົດ 560 ຄອບຄົວ ປະກອບມີ 10 ບ້ານຄື: ບ້ານນາແວນ, ໂພນໄຊ, ດົງເງີນ, ເມືອງພຽງ, ບ້ານກາງ, ແສງຈະເລີນ, ໂພນຫີນ, ໜອງງົວ, ນ້ຳເຮ້ຍ ແລະ ບ້ານໂພນສະຫວາງ. ສໍາລັບເງີນທີ່ນໍາມາມອບແມ່ນໄດ້ຜ່ານທະນາຄານການຄ້າຕ່າງປະເທດ ສາຂາແຂວງໄຊຍະບູລີ.

ໃນໂອ້ການນີ້, ທ່ານ ຮອງເຈົ້າເມືອງໆພຽງ ກໍໄດ້ມອບເງີນສົດໃຫ້ກັບປະຊາຊົນຊາວກະສິກອນບ້ານນາແວນຄອບຄົວລະ 3 ລ້ານ 2 ແສນກີບ. ຖ້າຄອບຄົວໃດຫາກໃຊ້ຈ່າຍເງິນຖືກຕາມເປົ້າໝາຍຂອງໂຄງການ ກໍຈະມອບເງິນໃຫ້ຕື່ມອີກເປັນຄັ້ງທີ 2 ໃນເດືອນ 4 ປີ 2025 ເພຶ່ອສະໜັບສະໜູນເສດຖະກິດເອກະລາດເປັນເຈົ້າຕົນເອງ, ແກ້ໄຂວາລະແຫ່ງຊາດກ່ຽວກັບຄວາມຫຍຸ້ງຍາກທາງດ້ານເສດຖະກິດ ແລະ ການເງີນ.

(ຂ່າວ: ວົງສະຫວັນ ສຸທິໂວຫານ)