ຂ່າວຕ່າງປະເທດ ລາຍງານຫວ່າງມໍ່ໆມານີ້ວ່າ: ກະ​ຊວງ​ສາ​ທາ​ລະ​ນະ​ສຸກ​ຂອງ​ກຳ​ປູ​ເຈຍ​ຮຽກ​ຮ້ອງ​ໃຫ້​ພົນ​ລະ​ເມືອງ​ລະ​ມັດ​ລະ​ວັງ​ການຕິດ​​ເຊື້ອ​ໄວ​ຣັ​ດຮິວແມນເມຕະນິວໂມ (HMPV)ໃນ​ລະ​ດູ​ໜາວ. ໂດຍພະຍາດຕິດຕໍ່ນີ້ເຮັດໃຫ້ເກີດອາການໃນລະບົບທາງເດີນຫາຍໃຈຄ້າຍຄືກັນກັບໄຂ້ຫວັດໃຫຍ່ ເຊັ່ນ: ໄຂ້, ໄອ, ຕັນດັງ, ເຈັບຄໍແລະຈາມ.

ກະຊວງ​ດັ່ງກ່າວ​ລະບຸວ່າ: ເຊື້ອ​ໄວ​ຣັດ​ນີ້​ສາມາດ​ເຮັດ​ໃຫ້ເດັກອ່ອນ, ເດັກນ້ອຍ, ຜູ້ອາຍຸສູງທີ່ມີອາຍຸ 65 ປີຂຶ້ນໄປ ເຈັບປ່ວຍໜັກ ຫຼື​ຜູ້​ທີ່​ມີ​ລະບົບ​ພູມ​ຕ້ານທານ​ທີ່​ອ່ອນແອ. ໂດຍນີ້ບໍ່ແມ່ນເຊື້ອໄວຣັດຊະນິດໃໝ່ ຍ້ອນວ່າຖືກກວດພົບຄັ້ງທຳອິດໃນປີ 2001 ໃນປະເທດໂຮນລັງ. ສ່ວນກໍາປູເຈຍ ກວດພົບພະຍາດນີ້ໃນເດັກນ້ອຍຫຼາຍຄົນ ລະຫວ່າງປີ 2007 ຫາ 2009.

ພະ​ຍາດ​ນີ້​ຢູ່​ກຳ​ປູ​ເຈຍ​ບໍ່​ຮ້າຍ​ແຮງ​ເທົ່າ​ກັບ​ໄຂ້​ຫວັດ​ໃຫຍ່ ເພາະ​ອາ​ກາດ​ບໍ່ໄດ້​ໜາວ​ຫຼາຍ ແລະເດັກນ້ອຍທີ່ຕິດເຊື້ອເກືອບທຸກຄົນຫາຍດີໄດ້,ກະຊວງດັ່ງກ່າວລະບຸຕື່ມວ່າ:ຜູ້ທີ່ຕິດເຊື້ອສ່ວນໃຫຍ່ມີອາການບໍ່ຮຸນແຮງ ແຕ່ເດັກນ້ອຍທີ່ຕິດເຊື້ອປະມານ 6-16%ອາດຈະພັດທະນາອາການເປັນພະຍາດຫຼອດລົມຝອຍອັກເສບ ຫຼືປອດອັກເສບ.ເຊື້ອໄວຣັດນີ້ແຜ່ລາມຜ່ານລະອອງຝອຍ ຫຼື ລະອອງລອຍຈາກການໄອ, ຈາມ ລວມທັງການສຳຜັດໃກ້ຊິດຫຼືຢູ່ໃນສະພາບແວດລ້ອມທີ່ມີການຕິດເຊື້ອໄວຣັດນີ້ ຊຶ່ງມີໄລຍະຟັກຕົວ 3-6 ມື້.

ກະຊວງ​ດັ່ງກ່າວ ແນະນຳ​ວິທີ​ປ້ອງ​ກັນ​ການ​ແຜ່​ລະບາດ​ຂອງ​ພະຍາດ​ແລະ ອາການເຈັບປ່ວຍໃນລະບົບ​ທາງ​ເດີນ​ຫາຍໃຈ​ອື່ນໆ ໄດ້ແກ່​ການ​ຮັກສາ​ສຸຂະ​ອະນາໄມ​ໃຫ້​ດີ, ໃສ່ໜ້າກາກອະນາໄມໃນພື້ນທີ່ທີ່ມີຄົນຫຼາຍ ແລະ ແອອັດ, ຮັກສາໄລຍະຫ່າງທາງສັງຄົມ, ລ້າງມືເລື້ອຍໆ ແລະຫຼີກລ່ຽງພື້ນທີ່ທີ່ມີຄົນຫຼາຍ, ແອອັດ ຫາກເປັນໄປໄດ້.