ຂ່າວສານຫວຽດນາມລາຍງານວ່າ: ໃນວັນທີ 1 ມັງກອນປີ 2025, ໂປໂລຍ ໄດ້ດຳລົງຕຳແໜ່ງເປັນປະທານໝູນວຽນຂອງສະຫະພາບເອີຣົບ (ອີຢູ) ຢ່າງເປັນທາງການ ຊຶ່ງມີອາຍຸການຮອດວັນທີ 30 ມິຖຸນາປີນີ້.ໂດຍຮັບຕໍາແໜ່ງຕໍ່ຈາກ ຮົງກາລີ, ໃນ 6 ເດືອນຂ້າງໜ້າໂປໂລຍ ຈະເປັນປະທານກອງປະຊຸມລັດຖະມົນຕີ ສະຫະພາບເອີຣົບ.
ການດຳລົງຕຳແໜ່ງປະທານໝູນວຽນຂອງໂປໂລຍ ເກີດຂຶ້ນພ້ອມກັບການເລີ່ມຕົ້ນວາລະໃໝ່ຂອງຄະນະກໍາມະຫະພາບເອີຣົບ, ໂດຍໃຫ້ໂອກາດໃນການກໍານົດເປົ້າໝາຍຍຸດທະສາດ, ສະເໜີແນວທາງແກ້ໄຂ ແລະ ວາງແຜນການໃນ 5 ປີຕໍ່ໜ້າ.
ໃນໄລຍະນີ້, ໂປໂລຍ ຈະຈັດຕັ້ງບັນດາວາລະສຸມໃສ່ມາດຕະການເພີ່ມທະວີຄວາມໝັ້ນຄົງ ແລະ ປ້ອງກັນປະເທດ, ຫັນການສະໜອງພະລັງງານຢ່າງຫຼາກຫຼາຍ, ຊຸກຍູ້ການລົງທຶນດ້ານເຕັກໂນໂລຊີຂຽວ, ເພີ່ມທະວີການຟື້ນຟູເສດຖະກິດ ແລະ ເລັ່ງລັດການຫັນເປັນດີຈີຕອນໃນກຸ່ມ.
ກ່ອນໜ້ານັ້ນ, ທ່ານ ໂດນັລ ທັດນາຍົກລັດຖະມົນຕີ ໂປໂລຍກ່າວຄຳເຫັນໃນກອງປະຊຸມຂ່າວ ທີ່ນະຄອນຫຼວງວຣາຊໍ ປະເທດໂປໂລຍ ໃນກາງເດືອນທັນວາ ຜ່ານມາວ່າ: ໂປໂລຍ ຈະສາມາດສ້າງບາດກ້າວບຸກທະລຸໃນໄລຍະດຳລົງຕຳແໜ່ງປະທານ ອີຢູ, ດ້ວຍບັນດາບຸລິມະສິດໃນວາລະລວມມີຄວາມໝັ້ນຄົງ, ພະລັງງານ ແລະ ຄວາມສາມາດແກ່ງແຍ້ງຂອງ ອີຢູ.
