ຂ່າວຕ່າງປະເທດລາຍງານ ຫວ່າງບໍ່ດົນມານີ້ວ່າ: ຟີລິບປິນກຽມອອກມາດຕະການໃໝ່ເພື່ອແກ້ໄຂບັນຫາລາຄາເຂົ້າ, ຫຼັງຈາກພົບວ່າລາຄາເຂົ້າຍັງຄົງຢູ່ໃນລະດັບສູງ ເຖິງແມ່ນວ່າຈະມີການຫຼຸດຜ່ອນພາສີນໍາເຂົ້າຢ່າງຫຼວງຫຼາຍ, ມີເຂົ້າພຽງພໍຕໍ່ການບໍລິໂພກ ແລະລາຄາເຂົ້າໃນຕະຫຼາດໂລກກໍໄດ້ຫຼຸດລົງແລ້ວ.
ທ່ານ ຄຣິສຕິນ່າ ໂຣເກ້ ລັດຖະມົນຕີກະຊວງການຄ້າຟີລິບປິນ ເປີດເຜີຍຫວ່າງບໍ່ດົນມານີ້ວ່າ: ຄະນະກໍາມະການປະສານງານລາຄາແຫ່ງຊາດໄດ້ສະເໜີໃຫ້ອົງການອາຫານແຫ່ງຊາດ ຫຼືNFA ຊຶ່ງເປັນອົງການຂອງລັດຖະບານທີ່ຮັບຜິດຊອບໃນການຄຸ້ມຄອງເຂົ້າຂອງປະເທດເລີ່ມລະບາຍເຂົ້າອອກຈາກຄັງສຳຮອງ.
ທ່ານ ຟຣານຊິສໂກ ຕິອູ ລໍເຣລ ລັດຖະມົນຕີກະຊວງກະສິກໍາກ່າວຕື່ມວ່າ:NFA ອາດຈະເລີ່ມລະບາຍເຂົ້າສຳຮອງປະມານ 300,000 ໂຕນ ອອກສູ່ຕະຫຼາດໃນເດືອນກຸມພາ ນີ້.
ທ່ານ ລໍເຣລ ກ່າວວ່າ: ເຖິງວ່າພວກເຮົາໄດ້ຫຼຸດພາສີນຳເຂົ້າ ແລະ ລາຄາເຂົ້າໃນຕະຫຼາດໂລກກໍຫຼຸດລົງມາແລ້ວ. ແຕ່ລາຄາຂາຍຍ່ອຍພາຍໃນປະເທດບໍ່ໄດ້ຫຼຸດລົງ... ລາຄາເຂົ້າໃນປັດຈຸບັນໄດ້ສູງຂຶ້ນຜິດປົກກະຕິ, ໂດຍຟີລິບປິນໄດ້ຫຼຸດອັດຕາພາສີນຳເຂົ້າ-ເຂົ້າຈາກ 35% ລົງເປັນ 15% ໃນປີກາຍ ໂດຍຈະມີຜົນບັງຄັບໃຊ້ຮອດປີ 2028.
ຂ່າວລະບຸວ່າ: ລາຄາເຂົ້າທີ່ເພີ່ມຂຶ້ນແມ່ນປັດໃຈສໍາຄັນທີ່ເຮັດໃຫ້ອັດຕາເງິນເຟີ້ຂອງຟີລິບປິນເພີ່ມສູງກວ່າເປົ້າໝາຍຂອງທະນາຄານກາງທີ່ຕັ້ງໄວ້ 2-4% ສໍາລັບ ປີ 2022 ແລະ 2023, ທ່ານ ເຟີດີນານ ມາກອດ ຈູເນຍ ປະທານາທິບໍດີ ຟີລິບປິນ ສັ່ງໃຫ້ຄວບຄຸມລາຄາເຂົ້າ ຊຶ່ງເປັນອາຫານຫຼັກຂອງປະຊາຊົນ. ພ້ອມທັງຈັດສັນເງິນຊ່ວຍເຫຼືອໃຫ້ແກ່ຜູ້ຄ້າ-ຂາຍຍ່ອຍ ແລະເຈົ້າຂອງຮ້ານຄ້ານ້ອຍທີ່ໄດ້ຮັບຜົນກະທົບຈາກມາດຕະການດັ່ງກ່າວ.
