ພິທີປະກາດບົ່ງຕົວເລຂາ, ຮອງເລຂາໜ່ວຍພັກຄະນະຄຸ້ມຄອງເຂດເສດຖະກິດພິເສດ (ຄສສ) ແຂວງຄຳມ່ວນ ໄດ້ຈັດຂຶ້ນໃນວັນທີ 22 ກັນຍາ ຜ່ານມາ ທີ່ຫ້ອງການຄະນະຄຸ້ມຄອງເຂດເສດຖະກິດພິເສດຂອງແຂວງ ໂດຍການເຂົ້າຮ່ວມເປັນປະທານຂອງ ສະຫາຍ ຄຳສອນ ອ້ວນທະວີ ຄະນະປະຈໍາພັກແຂວງ ປະທານຄະນະກວດກາພັກແຂວງ, ເຂົ້າຮ່ວມມີຕາງໜ້າຈາກຄະນະຈັດຕັ້ງແຂວງ, ສະຫາຍ ຈັນທະຄອນ ອ່ອນມະນີສອນ ຫົວໜ້າຄະນະຄຸ້ມຄອງເຂດເສດຖະກິດພິເສດ ແລະ ພະນັກງານ - ລັດຖະກອນພາຍໃນ ຄສສ ເຂົ້າຮ່ວມ.

ໃນພິທີ, ສະຫາຍ ບຸນສຸກ ພາມີໂຊກ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດ ແຂວງ ຂຶ້ນຜ່ານບົດສະຫຼຸບວຽກງານການຈັດຕັ້ງປະຕິບັດຂອງຄະນະຄຸ້ມຄອງເຂດເສດຖະກິດພິເສດແຂວງໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ. ຄະນະຄຸ້ມຄອງເຂດເສດຖະກິດພິເສດແຂວງ ປະກອບມີຫົວໜ້າ 1 ທ່ານ, ຮອງ 1 ທ່ານ, ມີ 3 ຂະແໜງ ມີພະນັກງານທັງໝົດ 11 ທ່ານ ຍິງ 5 ທ່ານ, ເປັນພະນັກງານ-ລັດຖະກອນ 8 ທ່ານ ຍິງ 2 ທ່ານ, ພະນັກງານ 95% ມີ 1 ທ່ານ, ພະນັກງານອາສາສະໝັກ 2 ທ່ານ, ມີສະມາຊິກພັກສົມບູນ 5 ສະຫາຍ, ໃນນັ້ນ ມີປະລິນຍາໂທ 3 ທ່ານ, ປະລິນຍາຕີ 6 ທ່ານ ແລະ ຊັ້ນສູງ 2 ທ່ານ.

ເປັນເສນາທິການໃຫ້ແກ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ (ກະຊວງແຜນການ ແລະ ການລົງທຶນ) ແລະ ອົງການປົກຄອງແຂວງຄໍາມ່ວນ ໃນການຄົ້ນຄວ້າສັງລວມ, ສົ່ງເສີມການລົງທຶນເອກະຊົນພາຍໃນ ແລະ ຕ່າງປະເທດ ແລະ ການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ ເພື່ອພັດທະນາໃຫ້ສອດຄ່ອງກັບແນວທາງນະໂຍບາຍຂອງພັກ - ລັດ ແລະ ລະບຽບກົດໝາຍທີ່ວາງອອກໃນແຕ່ລະໄລຍະ. ນອກຈາກນັ້ນ ຍັງໄດ້ລາຍງານການຈັດຕັ້ງປະຕິບັດວຽກງານໃນໄລຍະ 9 ເດືອນຜ່ານມາຂອງຄະນະຄຸ້ມຄອງເຂດເສດຖະກິດພິເສດແຂວງ ແລະ ໄດ້ສືບຕໍ່ຈັດຕັ້ງປະຕິບັດບັນດາວຽກງານຕ່າງໆເຂົ້າໃນການພັດທະນາເຂດເສດຖະກິດພິເສດທ່າແຂກ ແລະ ທິດທາງ 3 ເດືອນທ້າຍປີ 2023 .

ຈາກນັ້ນ, ສະຫາຍ ທ່ານ ນິກອນ ພົມວົງສາ ຫົວໜ້າຂະແໜງກໍ່ສ້າງພັກ ຄະນະຈັດຕັ້ງ ແຂວງຄຳມ່ວນ ຂຶ້ນຜ່ານ ມະຕິຕົກລົງຂອງຄະນະປະຈຳພັກແຂວງ ວ່າດ້ວຍການບົ່ງ ຕົວແຕ່ງຕັ້ງ ເລຂາ, ຮອງເລຂາ ໜ່ວຍພັກຄະນະຄຸ້ມຄອງເຂດເສດຖະກິດພິເສດແຂວງ ທັງນີ້ໂດຍປະຕິບັດຕາມມະຕິຕົກລົງຂອງຄະນະປະຈຳພັກແຂວງ ດ້ວຍການບົ່ງຕົວແຕ່ງຕັ້ງ ເລຂາຮອງເລຂາ ໜ່ວຍພັກຄະນະຄຸ້ມຄອງເຂດເສດຖະກິດພິເສດ ແຂວງ ສະບັບເລກທີ 32/ຄປຈ ຄມ ລົງວັນທີ 5 ກັນຍາ 2023 ໄດ້ຕົກລົງບົ່ງຕົວແຕ່ງຕັ້ງ ສະຫາຍ ຈັນທະຄອນ ອ່ອນມະນີສອນ ເປັນເລຂາໜ່ວຍພັກຄະນະຄຸ້ມຄອງເຂດເສດຖະກິດພິເສດ ແຂວງ ແລະ ສະຫາຍ ບຸນສຸກ ພາມີໂຊກ ເປັນຮອງເລຂາໜ່ວຍພັກຄະນະຄຸ້ມຄອງເຂດເສດຖະກິດພິເສດ ແຂວງຊຸດໃໝ່.

ສະຫາຍ ຄຳສອນ ອ້ວນທະວີ ກໍໄດ້ມີຄໍາຄິດເຫັນໂອ້ລົມຕໍ່ພິທີ ຊຶ່ງສະຫາຍໄດ້ເນັ້ນໃຫ້ຄະນະ ໜ່ວຍພັກຊຸດໃໝ່ຈົ່ງໄດ້ຍົກສູງຄວາມຮັບຜິດຊອບຕໍ່ໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້ເປັນຕົ້ນແມ່ນການສຶກສາອົບຮົມດ້ານການເມືອງແນວຄິດໃຫ້ແກ່ສະມາຊິກພັກ-ພະນັກງານ, ເອົາໃຈໃສ່ເຕົ້າໂຮມຄວາມສາມັກຄີພາຍໃນ-ພາຍນອກໃຫ້ແໜ້ນແຟ້ນ, ເອົາໃຈໃສ່ປະຕິບັດວຽກງານວິຊາສະເພາະຂອງຕົນ ແລະ ພ້ອມກັນແກ້ໄຂວຽກງານທີ່ຍັງຄົງຄ້າງໃຫ້ລຸລ່ວງໄປດ້ວຍດີ.

ຂ່າວ-ພາບ: ແດງສະຫວັດ ແສນພານິດ.