ເມື່ອບໍ່ດົນມານີ້ ທີ່ສະໂມສອນ ຂອງເມືອງວຽງຄໍາ ແຂວງຫຼວງພະບາງ ໄດ້ມີພິທີເຜີຍແຜ່ນິຕິກໍາການເມືອງ-ແນວຄິດ ມີ ທ່ານ ທະລາກອນ ບໍລະວົງ ຮອງເລຂາພັກເມືອງ, ພ້ອມດ້ວຍຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ ຕະຫຼອດຮອດພະນັກງານຫຼັກແຫຼ່ງ ໃນຂົງເຂດພັກ-ພະນັກງານ ແລະ ຂົງເຂດເສດຖະກິດ ເຂົ້າຮ່ວມຮັບຟັງ.
ໃນພິທີ, ທ່ານ ວັນໂຈຍ ວາຊົວລີ ກຳມະການປະຈໍາພັກເມືອງ ຫົວໜ້າຄະນະຈັດຕັ້ງເມືອງ ເຜີຍແຜ່ເອກະສານຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ຄວາມເປັນແບບຢ່າງນໍາໜ້າຂອງສະມາຊິກພັກ, ຈາກນັ້ນ ທ່ານ ທະລາກອນ ບໍລະວົງ ເຊື່ອມຊຶມເອກະສານເສີມຂະຫຍາຍມູນເຊື້ອ ແລະ ຄວາມສາມັກຄີເອກະພາບພາຍໃນພັກ, ໂອກາດດຽວກັນ ທ່ານ ສີພອນ ມິດໄມຕີ ກຳມະການປະຈຳພັກເມືອງ ຮອງເຈົ້າເມືອງ ໄດ້ເຜີຍແຜ່ດໍາລັດວ່າດ້ວຍການປະຢັດ, ຕ້ານການຟຸ່ມເຟືອຍ ແລະ ແກ້ໄຂຄວາມທຸກຍາກ ແນໃສ່ເຮັດໃຫ້ພະນັກງານຫຼັກແຫຼ່ງຂອງເມືອງ ໄດ້ເຂົ້າໃຈ, ກໍາແໜ້ນແນວທາງ, ແຜນນະໂຍບາຍ ຂອງພັກ-ລະບຽບກົດໝາຍ ຂອງລັດ ໂດຍການເພີ່ມທະວີເປັນເຈົ້າຕົນເອງ, ຈັດຕັ້ງຜັນຂະຫຍາຍເນື້ອໃນນິຕິກໍາ, ຕັ້ງໜ້າຝຶກຝົນຫຼໍ່ຫຼອມຕົນເອງບົນຫຼັກການຂອງຄຸນທາດການເມືອງ, ມີຄວາມຮັບຜິດຊອບສູງ, ມີຄຸນສົມບັດສິນທໍາປະຕິວັດ ແລະ ຄວາມເປັນແບບຢ່າງນໍາໜ້າມະຫາຊົນ, ຕັ້ງໜ້າເສີມຂະຫຍາຍມູນເຊື້ອ ແລະ ຄວາມສາມັກຄີພາຍໃນພັັກ, ດໍາລົງຊີວິດປອດໃສຂາວສະອາດ, ປະຢັດອົດທົນ, ຕ້ານການຟຸ່ມເຟື່ອຍ ສືບຕໍ່ຈັດຕັ້ງປະຕິບັດແກ້ໄຂບັນຫາຢາເສບຕິດຢ່າງຕັ້ງໜ້າ ແລະ ເພີ່ມທະວີແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດການເງິນ ຢູ່ພາຍໃນເມືອງຕື່ມອີກ.
ຂ່າວ-ພາບ: ບຸນທັນ ໄຊຍະວົງ
