ທ່ານນາງ ວຽງທອງ ສີພັນດອນ ປະທານສານປະຊາຊົນສູງສຸດ ພ້ອມຄະນະໄດ້ເຄື່ອນໄຫວວຽກງານຢູ່ແຂວງສາລະວັນ ເມື່ອບໍ່ດົນມານີ້ ທີ່ສະໂມສອນແຂວງ ໃຫ້ກຽດເຂົ້າຮ່ວມຂອງ ທ່ານ ແຫວນເພັດ ລັດດາວົງ ຫົວໜ້າຄະນະຈັດຕັ້ງແຂວງ, ມີທ່ານ ວິຊຽນ ນະວິກຸນ ປະທານກວດກາແຂວງ, ມີປະທານສານປະຊາຊົນແຂວງ, ປະທານສານເຂດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ພາຍຫຼັງທ່ານປະທານສານປະຊາຊົນສູງສຸດ ໄດ້ຮັບຟັງລາຍງານການຈັດຕັ້ງປະຕິບັດວຽກງານຂອງສານປະຊາຊົນແຂວງສາລະວັນ ໃນໄລຍະ 9 ເດືອນ ຕົ້ນປີ 2023 ຜ່ານມາ ເຫັນວ່າມີຜົນສຳເລັດຫຼາຍດ້ານໃນການຈັດ ຕັ້ງປະຕິບັດໜ້າທີ່ວຽກງານ.

ໂອກາດນີ້, ທ່ານນາງ ວຽງທອງ ສີພັນດອນ ໄດ້ໃຫ້ກຽດໂອ້ລົມ ຊຶ່ງທ່ານໄດ້ເນັ້ນໜັກໃຫ້ພ້ອມກັນເອົາໃຈ ໃສ່ວຽກງານການເມືອງແນວຄິດ ໂດຍການຈັດຕັ້ງເຊື່ອມຊຶມບັນດາມະຕິ, ຄຳສັ່ງຕ່າງໆຂອງພັກ, ກົດໝາຍ ແລະນິຕິກຳໃຕ້ກົດໝາຍໃຫ້ພະນັກງານໄດ້ຮັບຮູ້-ເຂົ້າໃຈ, ບໍ່ໃຊ້ສິດອຳນາດ ຫຼື ນຳໃຊ້ຊ່ອງວ່າງຂອງກົດໝາຍເພື່ອຫາຜົນປະໂຫຍດສ່ວນຕົວໃຫ້ແກ່ກຸ່ມກ້ອນ, ພັກພວກ ຫຼື ແກ່ຄູ່ຄວາມຝ່າຍໃດຝ່າຍໜຶ່ງ ທີ່ເປັນຕົ້ນເຫດພາໃຫ້ເກີດມີຫາງສຽງຈົມວ່າ, ເອົາໃຈໃສ່ພັດທະນາການຈັດຕັ້ງຂອງສານປະຊາຊົນແຂວງ ແລະ ສານປະຊາຊົນເຂດໃຫ້ມີຄວາມໜັກແໜ້ນເຂັ້ມແຂງ, ການກໍ່ສ້າງ ແລະ ຂະຫຍາຍພັກໃຫ້ປະຕິບັດສອດຄ່ອງກັບກົດລະບຽບຂອງພັກຢ່າງເຂັ້ມງວດ ໂດຍຖືເອົາຄຸນນະພາບເປັນກົກ ຕິດພັນກັບແຜນກຳນົດພະນັກງານນຳພາຄຸ້ມຄອງໃນແຕ່ລະໄລຍະ ພ້ອມນັ້ນກໍເອົາໃຈໃສ່ປັບປຸງແບບແຜນນຳພາ, ວິທີເຮັດວຽກໃນລະບົບສານປະຊາຊົນ ຕາມຫຼັກການລວມສູນປະຊາທິປະໄຕຢ່າງເຂັ້ມງວດ ເຮັດວຽກເປັນໝູ່ຄະນະ ບຸກຄົນຮັບຜິດຊອບ ສຽງສ່ວນໜ້ອຍຂຶ້ນກັບສຽງສ່ວນຫຼາຍ, ຂັ້ນລຸ່ມປະຕິບັດຕາມຂັ້ນເທິງ, ມີການສຳຫຼວດກວດກາຢ່າງເປັນປົກກະຕິ, ເພີ່ມທະວີເອົາໃຈໃສ່ໃນການຈັດຕັ້ງປະຕິບັດວຽກງານວິຊາສະເພາະໂດຍເລັ່ງໃສ່ກໍ່ສ້າງຈ່າສານ, ຜູ້ຊ່ວຍພິພາກສາ ແລະ ຜູ້ພິພາກສາໃຫ້ມີຄວາມຮູ້, ຄວາມສາມາດດ້ານວິຊາສະເພາະມີຄຸນນະທໍາ, ຈັນຍາບັນ-ຈັນຍາທຳ, ເອົາໃຈໃສ່ຕິດຕາມກວດກາການປະຕິບັດໜ້າທີ່ຂອງສະມະຊິກພັກ-ພະນັກງານ ແລະ ປັບປຸງກົນໄກການປະສານສົມທົບການແກ້ໄຂຄະດີໃຫ້ມີຄວາມກົມກຽວຖືກຕ້ອງໃນການດຳເນີນຄະດີຕ່າງໆ ພ້ອມນັ້ນຈົ່ງຮັກສາມູນເຊື້ອຄວາມສາມັກຄີ ສືບຕໍ່ໃນການຈັດຕັ້ງປະຕິບັດວຽກງານໃຫ້ມີຜົນສຳເລັດ ຖືກຕ້ອງ ແລະ ເປັນທຳ ພ້ອມດຽວກັນນັ້ນ, ທ່ານປະທານສານປະຊາຊົນສູງສຸດ ຍັງໄດ້ມອບພາຫະນະປະເພດລົດຈັກ, ເຄື່ອງຄອມພິວເຕີ ແລະ ເຄື່ອງໃຊ້ຫ້ອງການຈຳນວນໜຶ່ງ ໃຫ້ສານປະຊາຊົນແຂວງ ແລະ ເຂດ ເພື່ອນຳໃຊ້ເຂົ້າໃນການເຄື່ອນໄຫວວຽກງານວິຊາສະເພາະ.

ຂ່າວ-ພາບ: ສິດຕາ ເພັດວົງສາ