ບໍລິຄຳໄຊ ຈັດສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມກັບຄືນປະເທດຢ່າງສົມກຽດ

ແຂວງບໍລິຄຳໄຊໄດ້ຈັດພິທີມອບ-ຮັບອັດຖິທະຫານອາສາສະໝັກ ແລະ ຊ່ຽວຊານຫວຽດນາມຈຳນວນ 9 ອັດຖິ ກັບຄືນປະເທດຢ່າງສົມກຽດໃນວັນທີ 15 ພຶດສະພາຜ່ານມາ ໂດຍການເຂົ້າຮ່ວມຂອງທ່ານ ພົຈວ ຈວງຈັນ ລາດສະວົງ ຫົວໜ້າການເມືອງກອງບັນຊາການທະຫານແຂວງ ຮອງຫົວໜ້າຄະນະປະຕິບັດງານພິເສດແຂວງ, ທ່ານ ເລ ຫງັອກ ເຈົາ ຮອງປະທານຄະນະກຳມະການປະຊາຊົນແຂວງ ຫົວໜ້າຄະນະຊີ້ນຳ 515 ຄະນະກຳມະການປະຊາຊົນແຂວງຮ່າຕິ່ງ ສສ ຫວຽດນາມ.
    ໂດຍປະຕິບັດຕາມເນື້ອໃນຈິດໃຈການຊີ້ນຳຂອງສອງພັກ-ສອງລັດຖະບານ ແລະ ຄະນະປະຕິບັດງານພິເສດຂອງສອງປະເທດລາວ-ຫວຽດນາມ ໂດຍສະເພາະແຂວງບໍລິຄຳໄຊ-ຮ່າຕິ່ງກ່ຽວກັບວຽກງານຊອກຫາ, ຂຸດຄົ້ນ, ມອບ-ຮັບ ແລະ ຈັດສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດໃນປາງສົງຄາມຢູ່ສປປ ລາວ ກັບຄືນປະເທດໃນສົກປີ 2023-2024 ນີ້ ຊຶ່ງທັງສອງຝ່າຍເຕັມໄປດ້ວຍຄວາມເອົາໃຈໃສ່ ແລະ ມີຄວາມຮັບຜິດຊອບສູງ ສາມາດສຳຫຼວດ ແລະ ຂຸດຄົ້ນໄດ້ຈຳນວນ 9 ອັດຖິ ພ້ອມນີ້ທັງສອງຝ່າຍໄດ້ເຊັນບົດບັນທຶກມອບ-ຮັບຢ່າງເປັນທາງການ ເພື່ອຈະໄດ້ຈັດສົ່ງກັບຄືນປະເທດລະຫວ່າງທ່ານ ພົຈວ ຈວງຈັນ ລາດຊະວົງ ແລະ ທ່ານ ເລ ຫງັອກ ເຈົາ ພ້ອມດ້ວຍພະນັກງານທັງສອງຝ່າຍເຂົ້າຮ່ວມເປັນສັກຂີພິຍານ. 
    ໂອກາດນີ້ຍັງໄດ້ມອບໃບຍ້ອງຍໍຂອງທ່ານເຈົ້າແຂວງບໍລິຄຳໄຊໃຫ້ພະນັກງານ-ນັກຮົບແຂວງຮ່າຕິ່ງ ສສ ຫວຽດນາມໃນໜ່ວຍງານຂຸດຄົ້ນອັດຖິປະຈຳແຂວງບໍລິຄຳໄຊ ທີ່ມີຜົນງານດີເດັ່ນໃນການຊອກຫາ ແລະ ຂຸດຄົ້ນອັດຖິປະຈຳແຂວງບໍລິຄຳໄຊ ແລະ ໃນຕອນເຊົ້າວັນທີ 16 ພຶດສະພາຜ່ານມາ ການນຳພັກ-ລັດ, ພະນັກງານ, ທະຫານ, ຕຳຫຼວດຕະຫຼອດຮອດປະຊາຊົນ, ນັກຮຽນໄດ້ເຂົ້າຮ່ວມພິທີຈັດສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດ ນາມກັບຄືນປະເທດຢ່າງສົມກຽດ. ຂ່າວ-ພາບ: ຄຳຟອງ