ລາວ-ຫວຽດນາມ ຮ່ວມມືດ້ານປ້ອງກັນຊາດປ້ອງກັນຄວາມສະຫງົບ

 ບົດບັນທຶກຄວາມເຂົ້າໃຈ ລະຫວ່າງ ບັນດາກອງກໍາລັງ ທີ່ຂຶ້ນກັບກະຊວງປ້ອງກັນຄວາມສະຫງົບສອງປະເທດ ລາວ-ຫວຽດນາມ ໄດ້ສືບຕໍ່ຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະ ສະກັດກັ້ນຕ້ານຢາເສບຕິດ; ຮີບຮ້ອນອອກສົນທິສັນຍາວ່າດ້ວຍການໂອນຜູ້ຮ້າຍຂ້າມແດນໃຫ້ມີຜົນບັງຄັບໃຊ້. ສືບຕໍ່ເພີ່ມທະວີວຽກງານຄຸ້ມຄອງ,ປ້ອງກັນຊາຍແດນ, ຮັກສາການລາດຕະເວນສອງຝ່າຍຢ່າງເປັນປະຈໍາ, ປະສານສົມທົບຄຸ້ມຄອງ, ປົກປັກຮັກສາເສັ້ນຊາຍແດນ-ຫຼັກໝາຍຊາຍແດນຢ່າງໜັກແໜ້ນ ແລະ ແກ້ໄຂບັນດາບັນຫາທີ່ເກີດຂຶ້ນ ຢູ່ຊາຍແດນຢ່າງຖືກຕ້ອງກົມກຽວ.ເພີ່ມທະວີການປະສານສົມທົບຢ່າງແໜ້ນແຟ້ນຮັບປະກັນຮັກສາສະຖຽນລະພາບດ້ານການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມຢູ່ແຕ່ລະປະເທດ; ປະສານສົມທົບກັນຢ່າງແໜ້ນແຟ້ນໃນວຽກງານສະກັດກັ້ນ, ຕ້ານການປະຕິວັດສີ, ການຫັນປ່ຽນໂດຍສັນຕິ, ກໍ່ຄວາມບໍ່ສະຫງົບ, ໂຄ່ນລົ້ມ, ການກໍ່ການຮ້າຍ; ປະສານສົມທົບກັນຕໍ່ສູ້ສະກັດກັ້ນກົນອຸບາຍ, ແນວຄິດ, ເຄື່ອນໄຫວການສ້າງ ລັດເອກະລາດປົກຄອງຕົນເອງ ຂອງບັນດາອິດທິກໍາລັງປໍລະປັກ, ຕໍ່ຕ້ານ; ການເຄື່ອນໄຫວສວຍໃຊ້ບັນຫາຊົນເຜົ່າ, ສາສະໜາ, ປະຊາທິປະໄຕ, ສິດທິມະນຸດ. ລະເມີດຄວາມໝັ້ນຄົງແຫ່ງຊາດ ລາວ ແລະ ຫວຽດນາມ; ຍູ້ແຮງວຽກງານປະສານສົມທົບສະກັດກັ້ນບັນດາອາຊະຍາກໍາຂ້າມຊາດ, ເປັນຕົ້ນອາຊະຍາກໍາຢາເສບຕິດ, ອາຊະຍາກໍຄ້າມະນຸດ, ອາຊະຍາກໍານໍາໃຊ້ເຕັກໂນໂລຊີຂັ້ນສູງ; ປະສານສົມທົບກັນຮັບມືກັບບັນຫາຄວາມສະຫງົບຮູບແບບໃໝ່.ສືບຕໍ່ພັດທະນາກຸ່ມບ້ານທີ່ສ້າງສໍາເລັດ;ກໍ່ສ້າງກຸ່ມບ້ານໃໝ່ ຢູ່ແຂວງຫົວພັນ ແລະ ແຂວງຜົ້ງສາລີ ໃຫ້ໄດ້ຕາມແຜນການ; ດໍາເນີນການປະກອບເອກະສານສໍາລັບການພັດທະນາຢູ່ 3 ກຸ່ມບ້ານໃໝ່ ຢູ່ແຂວງບໍລິຄໍາໄຊ,ແຂວງຄໍາມ່ວນ, ແຂວງອັດຕະປື ໃຫ້ສໍາເລັດ.ກະຊວງປ້ອງກັນປະເທດຫວຽດນາມຕົກລົງຊ່ວຍກໍ່ສ້າງ ສໍານັກງານກອງບັນຊາການທະຫານຊາຍແດນລາວ. ໂຄງການກໍ່ສ້າງລະບົບຄຸ້ມຄອງສໍາມະໂນຄົວ ແລະ ອອກບັດປະຈໍາຕົວຂອງລາວ, ໂຄງການກໍ່ສ້າງສູນປິ່ນປົວ ບໍາບັດ ແລະ ຟື້ນຟູສຸຂະພາບຜູ້ຕິດຢາເສບຕິດຢູ່ແຂວງວຽງຈັນ,ສືບຕໍ່ປະສານສົມທົບກັນຊອກຫາ, ເຄື່ອນຍ້າຍຈັດສົ່ງອັດຖິຂອງທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດຢູ່ລາວ ໃນແຕ່ລະໄລຍະສົງຄາມ ກັບ ຄືນປະເທດຈົນກວ່າບໍ່ມີຂໍ້ມູນກ່ຽວກັບສະຖານທີ່ຝັງສົບຂອງຜູ້ເສຍຊີວິດ. ສືບຕໍ່ປະສານສົມທົບກັບຝ່າຍກໍາປູເຈຍ ຜັນຂະຫຍາຍ ກົນໄກການພົບປະປະຈໍາປີ ລະຫວ່າງ ສາມລັດຖະມົນຕີກະຊວງປ້ອງກັນປະເທດ, ການພົບປະຄັ້ງທີ 1 ລະຫວ່າງ ລັດຖະມົນຕີກະຊວງປ້ອງກັນຄວາມສະຫງົບ, ກະຊວງພາຍໃນສາມປະເທດ ລາວ-ຫວຽດນາມ-ກໍາປູເຈຍ ແລະ ການຊ້ອມຮົບຮ່ວມ ລະຫວ່າງ ກອງທັບສາມປະເທດ ລາວ - ຫວຽດນາມ - ກໍາປູເຈຍ ຢ່າງມີປະສິດທິຜົນ ເພື່ອຮັບມືກັບສິ່ງທ້າທາຍດ້ານຄວາມໝັ້ນຄົງຮູບແບບໃໝ່. ປະຕິບັດບັນດາສົນທິສັນຍາ, ຂໍ້ຕົກລົງສາກົນ ທີ່ສອງຝ່າຍຮ່ວມເປັນພາຄີຢ່າງມີປະສິດທິຜົນ.