ທ່ານ ສີໃສ ທອງປັດສາ ກໍາມະການພັກເມືອງ ຫົວໜ້າຫ້ອງວ່າການເມືອງປາກຊ່ອງ ແຂວງຈຳປາສັກ ຕາງໜ້າຄະນະພັກ-ອົງການປົກຄອງເມືອງໃຫ້ສຳພາດວ່າ:ເມືອງປາກຊ່ອງສຸມໃສ່ການພັດທະນາເສດຖະກິດຕິດພັນກັບການປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະ ກິດ-ການເງິນ ຊຶ່ງໃນໄລຍະ 8 ເດືອນຂອງປີ 2022 ນີ້ ໄດ້ສຸມໃສ່ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ: ປະຕິບັດຕາມ 5 ຈຸດສຸມຄື: ໜຶ່ງ: ສົ່ງເສີມການຜະລິດເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ເພື່ອສ້າງຖານລາຍຮັບທີ່ເຂັ້ມແຂງຍືນຍົງ; ສອງ: ສ້າງຄວາມເຂັ້ມແຂງດ້ານການເກັບລາຍຮັບງົບປະມານ; ສາມ: ສົ່ງເສີມການປະຢັດ, ຕ້ານການຟຸມເຟືອຍ ຍົກສູງປະສິດທິຜົນການລົງທຶນ,ລາຍຈ່າຍງົບປະມານ ແລະ ການແກ້ໄຂໜີ້ສິນ; ສີ່: ສ້າງສະຖຽນລະພາບດ້ານເງິນຕາ; ຫ້າ: ຍົກສູງປະສິດທິພາບການຄຸ້ມຄອງລັດດ້ວຍກົດໝາຍ ໂດຍຊຸກຍູ້ໃຫ້ຂະແໜງການເປັນເຈົ້າການປະຕິບັດພາລະບົດບາດ, ຄວາມຮັບຜິດຊອບຂອງຕົນ ຢ່າງເປັນເຈົ້າການ ແລະ ເຂັ້ມງວດ ພ້ອມທັງປະສານສົມທົບກັບບັນດາ ການລົງທຶນຂອງເອກະຊົນພາຍໃນ-ຕ່າງປະເທດ ມີຢູ່ໃນເມືອງຈໍານວນ 96 ໂຄງການ. ມູນຄ່າ 98,8 ຕື້ກີບ ຫຼື ເທົ່າກັບ 10,9 ລ້ານໂດລາ.

ຂະແໜງກະສິກໍາ: ສົ່ງເສີມການຜະລິດສະບຽງອາຫານ ແລະ ຜະລິດເປັນສິນຄ້າ. ພືດຜັກຜົນຜະລິດ 351.786 ໂຕນ.(ສະເລ່ຍການສະໜອງພືດຜັກປະມານ 100 ກວ່າໂຕນຕໍ່ວັນ), ການຜະລິດຊີ້ນ,ປາ, ອາຫານ ໄດ້ 3.317 ໂຕນ. ຕອບສະໜອງການບໍລິໂພກໄດ້ 38 ກິໂລ/ຄົນ/ປີ ແລະ ສິນຄ້າທີ່ເປັນທ່າແຮງຂອງເມືອງ ຄື: ກາເຟຜົນຜະລິດ350.580 ໂຕນ(ໝາກແດງ) ຫຼື ເທົ່າກັບ 70.116 ໂຕນ (ໝາກຊ້ອມ). ສ້າງລາຍຮັບໃຫ້ຜູ້ຜະລິດກາເຟໄດ້ 2.800 ກວ່າຕື້ກີບ. ນອກຈາກນັ້ນຍັງມີພືດຊະນິດອື່ນໆ ເປັນຕົ້ນ: ໝາກແໜ່ງ, ຊາຕົ້ມນໍ້າ; ຂີງ,ໝາກນອດ ແລະ ໝາກໄມ້ໃຫ້ໝາກ. ເມືອງປາກຊ່ອງ ມີສະຫະກອນ 10 ສະຫະກອນເປັນຕົ້ນ: ສະຫະກອນຜູ້ຜະລິດກາເຟພູພຽງບະລິເວນ(CPC), ການສົ່ງເສີມກຸ່ມກາເຟຄຸນນະພາບຂອງບໍລິສັດ ສົມໄຊ ບ້ານກອງຕຸ່ນ; ຜະລິດພືດຜັກຂອງສວນອາໂກຣ ບ້ານທົ່ງເສັດ. ສາມາດຈຳໜ່າຍ 4-5 ໂຕນ/ມື້ ເປັນເງິນປະມານ 40-50 ລ້ານກີບຕໍ່ວັນ ແລະ ການສົ່ງເສີມການລ້ຽງປາຄາເວຍຂອງບໍລິສັດອຸດົມສິນ ຢູ່ຈຸດສຸມທົ່ງກາຫຼົງ ຈຳນວນ 12.000 ກິໂລ ເທົ່າກັບ 1 ຕື້ 200 ກວ່າລ້ານກີບ; ສຳລັບການຊຸກຍູ້ລາຍຮັບເຂົ້າງົບປະມານ: ເມືອງປາກຊ່ອງເປັນປີທໍາອິດ ທີ່ຂັ້ນເທິງໄດ້ມອບໝາຍເປັນເມືອງກຸ້ມຕົນເອງທາງດ້ານລາຍຮັບ-ລາຍຈ່າຍ: ໄລຍະ 8 ເດືອນ. ເກັບລາຍຮັບເຂົ້າງົບປະມານໄດ້ 9 ຕື້ 785 ກວ່າລ້ານກີບ, ທຽບໃສ່ແຜນອະນຸມັດປີ 2022 (12 ຕື້ 884 ລ້ານກວ່າກີບ) ເທົ່າກັບ 76%; ປະຕິບັດລາຍຈ່າຍງົບ 8 ຕື້ 224 ລ້ານກວ່າກີບ. ເທົ່າກັບ 64 %.

ຈາກສະພາບຕົວຈິງ,ຈຶ່ງເຮັດໃຫ້ເສດຖະກິດຂອງເມືອງມີການຂະຫຍາຍຕົວສົມຄວນ ແລະ ມີຈັງ ຫວະທີ່ໝັ້ທ່ຽງ ສະແດງອອກ ລວມຍອດຜະລິດຕະພັນພາຍໃນປະຕິບັດໄດ້ 2.175,5 ຕື້ກີບ. ທຽບໃສ່ແຜນປີປະຕິບັດໄດ້ 96,80% ຊຶ່ງເຮັດໃຫ້ອັດຕາການຂະຫຍາຍຕົວທາງດ້ານເສດຖະກິດຢູ່ໃນລະດັບ 4,16%, ສະເລ່ຍຕໍ່ຫົວຄົນໄດ້ 24 ລ້ານ 9 ແສນກີບຕໍ່ຄົນຕໍ່ປີ ຫຼື ເທົ່າກັບ 2.263 ໂດລາ. ເຮັດໃຫ້ໂຄງປະກອບເສດຖະກິດ ຂະແໜງກະສິກໍາ ກວມ 79,06 %, ຂະແໜງອຸດສາຫະກໍາ ກວມ 8,58 % ແລະ ຂະແໜງບໍລິການ ກວມ 12,36 % ຂອງລວມຍອດລາຍຮັບຜະລິດຕະພັນຂອງເມືອງ.

(ຂ່າວ: ເມືອງປາກຊ່ອງ)