ຂ່າວຕ່າງປະເທດລາຍງານ ໃນວັນທີ 25 ກັນຍາ ຜ່ານມາ, ລັດຖະບານກຳປູເຈຍໄດ້ເປີດເຜີຍຖະແຫຼງການແຜນຍຸດທະສາດ ເພື່ອປ່ຽນສະຖານະໃຫ້ເປັນປະເທດທີ່ມີລາຍໄດ້ສູງພາຍໃນປີ 2050.

ຖະແຫຼງການລະບຸວ່າ: ເຊັ່ນດຽວກັບປະເທດກຳລັງພັດທະນາອື່ນໆ ກຳປູເຈຍຍັງຄົງມີຫຼາຍສິ່ງຫຼາຍຢ່າງທີ່ຕ້ອງເຮັດ ເພື່ອບັນລຸເປົ້າໝາຍການເປັນປະເທດທີ່ມີລາຍໄດ້ປານກາງລະດັບສູງພາຍໃນປີ 2050. ຂະນະດຽວກັນ, ກຳປູເຈຍມຸ່ງເນັ້ນທີ່ຈະເປັນປະເທດທີ່ມີລາຍໄດ້ສູງ, ມີຊີວິດຊີວາ ແລະ ຈະເລີນຮຸ່ງເຮືອງໃນປີ 2050. ເພື່ອບັນລຸຈຸດປະສົງດັ່ງກ່າວ ລັດຖະບານກຳປູເຈຍ ຈຶ່ງມຸ່ງເນັ້ນດຳເນີນການເພື່ອປ່ຽນສະຖານະຜ່ານຍຸດທະສາດຫ້າຫຼ່ຽມວ່າດ້ວຍການພັດທະນາເສດຖະກິດ ແລະ ສັງຄົມຂອງກຳປູເຈຍ ພາຍໃນ 25 ປີຂ້າງໜ້າ. ທັງນີ້, ຍຸດທະສາດຫ້າຫຼ່ຽມກຳລັງດຳເນີນການໄລຍະທີ 1 ໃນ 5 ດ້ານໄດ້ແກ່: ການຂະຫຍາຍຕົວ, ການຈ້າງງານ, ຄວາມສະເໝີພາບ, ປະສິດທິພາບ ແລະ ຄວາມຍືນຍົງ ພ້ອມທັງກ່າວຕື່ມວ່າ: ຫຼັກສຳຄັນ 5 ປະການຂອງຍຸດທະສາດນີ້ໄດ້ແກ່ຄົນ, ຖະໜົນຫົນທາງ, ນ້ຳ, ໄຟຟ້າ ແລະ ເຕັກໂນໂລຊີ ໂດຍສະເພາະເຕັກໂນໂລຊີດ້ານດີຈີຕອນ.

ທ່ານ ຮຸນ ມາເນັດ ກ່າວວ່າ: ກຳປູເຈຍກຳລັງປ່ຽນຜ່ານສະຖານະຈາກປະເທດພັດທະນານ້ອຍທີ່ສຸດກ້າວຂຶ້ນສູ່ປະເທດກຳລັງພັດທະນາພາຍໃນປີ 2027 ໂດຍຕັ້ງເປົ້າໝາຍການຂະຫຍາຍຕົວທາງດ້ານເສດຖະກິດຢ່າງຕໍ່ເນື່ອງທີ່ 5,6% ໃນປີນີ້ ຊຶ່ງຈະເພີ່ມຂຶ້ນຈາກ 5,2% ໃນປີ 2022.