ໃນວັນທີ 21 ພະຈິກນີ້ ທີ່ອົງການໄອຍະການປະຊາຊົນ (ອຍກ) ແຂວງເຊກອງ ໄດ້ຈັດພິທີເຊັນບົດບັນທຶກຮ່ວມລະຫວ່າງອົງການໄອຍະການປະຊາຊົນແຂວງ ກັບພະແນກການເງິນແຂວງ ວ່າດ້ວຍການປະສານງານການດໍາເນີນຄະດີພາສີກ່ຽວກັບລະບອບອາກອນຂອງລັດ ແລະການກະທໍາຜິດອື່ນໆທີ່ກ່ຽວຂ້ອງ.ຮ່ວມລົງນາມໂດຍທ່ານ ສໍລະເສີນສັກ ຟອງສານຸວົງ ຮອງຫົວໜ້າອົງການໄອຍະການແຂວງ ແລະ ທ່ານ ສຸກັນ ວໍລະຜັນໄຊ ຮອງຫົວໜ້າພະແນກການເງິນແຂວງ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມເປັນສັກຂີພິຍານ.
    ທ່ານນາງ ສົມສະໜຸກ ຍາດຕິວົງ ຫົວໜ້າຂະແໜງຕິດຕາມກວດກາທົ່ວໄປ ອົງການໄອຍະການປະຊາຊົນແຂວງ ໄດ້ຜ່ານບົດບັນທຶກສະບັບດັ່ງກ່າວທີ່ໄດ້ກຳນົດຫຼັກການ, ຄວາມຮັບຜິດຊອບ ແລະວິທີການປະສານງານ ລະຫວ່າງອົງການໄອຍະການປະຊາຊົນແຂວງກັບພະແນກການເງິນແຂວງ ກ່ຽວກັບການດຳເນີນວຽກງານຮ່ວມກັນ ໃນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃນການດໍາເນີນຄະດີພາສີ, ສ່ວຍສາອາກອນ ແລະການກະທໍາຜິດອື່ນໆທີ່ກ່ຽວຂ້ອງໃຫ້ຖືກຕ້ອງຕາມກົດໝາຍ ແລະມີປະສິດທິຜົນ. ທັງນີ້ເພື່ອຈັດຕັ້ງປະຕິບັດເນື້ອໃນບົດບັນທຶກຮ່ວມລະຫວ່າງອົງການອົງການປະຊາຊົນສູງສຸດ ແລະກະຊວງການເງິນໃນຄັ້ງວັນທີ 9 ມິຖຸນາ 2022 ໃຫ້ໄດ້ຮັບການຈັດຕັ້ງປະຕິບັດເຂົ້າສູ່ວຽກງານຕົວຈິງ.
    ໂອກາດນີ້, ທ່ານ ສໍລະເສີນສັກ ຟອງສານຸວົງ ໄດ້ມອບປຶ້ມກົດໝາຍ ວ່າດ່ວຍການດຳເນີນຄະດີອາຍາ(ສະບັບປັບປຸງ) ແລະປຶ້ມປະມວນກົດໝາຍອາຍາໃຫ້ 4 ພາກສ່ວນຄື: ພະແນກການເງິນແຂວງ, ພາສີປະຈໍາແຂວງ, ສ່ວຍສາອາກອນປະຈໍາແຂວງ ແລະຂະແໜງຄຸ້ມຄອງຊັບສິນຂອງລັດຕື່ມອີກ.
ຂ່າວ-ພາບ:ພຸດທະສອນ