ເມື່ອບໍ່ດົນມານີ້ທີ່ໂຮງແຮມພູແມນນະຄອນ-ຫຼວງພະບາງ, ກົມການບິນພົນລະເຮືອນກະຊວງໂຍທາທິການ ແລະ ຂົນສົ່ງ (ຍທຂ) ຮ່ວມກັບອົງການສົ່ງເສີມການຄ້າ ແລະ ການລົງທຶນຂອງ ສເກົາຫຼີປະຈຳນະຄອນຫຼວງວຽງຈັນ ໄດ້ຈັດກອງປະຊຸມຝຶກອົບຮົມຍົກລະດັບຄວາມຮູ້ ການຄຸ້ມຄອງຄວາມປອດໄພການບິນ ແລະແຜນແມ່ບົດສະໜາມບິນ ໃຫ້ພະນັກງານສະໜາມບິນສາກົນຫຼວງພະບາງ ໂດຍໄດ້ຮັບການສະໜັບສະໜູນຈາກບໍລິສັດ ໂດວ້າ ເອັນຈິເນຍລິ້ງ ຈຳກັດ ແລະບໍລິສັດການບິນ ສເກົາຫຼີ ໂດຍມີທ່ານ ທອງວັນ ສີສຸພາກອນ ຮອງຫົວໜ້າສະໜາມບິນສາກົນຫຼວງພະບາງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ການຝຶກອົບຮົມຄັ້ງນີ້, ເພື່ອຍົກລະດັບຄວາມຮູ້ໃຫ້ບັນດາພະນັກງານການບິນໄດ້ຮຽນຮູ້ດ້ານການຄຸ້ມຄອງຄວາມປອດໄພການບິນ ແລະແຜນແມ່ບົດສະໜາມບິນ. ໂດຍໄດ້ຮັບການບັນຍາຍຈາກຄູຝຶກ ສເກົາຫຼີ ຊຶ່ງເປັນຊ່ຽວຊານ ດ້ານການຄຸ້ມຄອງຄວາມປອດໄພການບິນ ແລະແຜນແມ່ບົດສະໜາມບິນ, ຜູ້ເຂົ້າຮ່ວມຍັງໄດ້ຮຽນຮູ້ກ່ຽວກັບການວິເຄາະໄພຄຸກຄາມ ແລະຄວາມສ່ຽງທີ່ອາດຈະເກີດຂຶ້ນ, ທັງມີການແລກປ່ຽນຄວາມຮູ້ດ້ານພຶດຕິກຳຕົວຈິງກ່ຽວກັບຄວາມປອດໄພເຂດສະໜາມບິນ ໃຫ້ແກ່ເຈົ້າໜ້າທີ່ຄຸ້ມຄອງສະໜາມບິນສາກົນຫຼວງພະບາງ ໂດຍນຳໃຊ້ປະສົບການຕົວຈິງ ທີ່ໄດ້ຮຽນຮູ້ຈາກຫຼາຍສະໜາມບິນ ແລະໂຄງການທີ່ປຶກສາລະດັບສາກົນ.
ຂ່າວ-ພາບ: ຫຼວງພະບາງ
