ໃນວັນທີ 22ພະຈິກ ຜ່ານມາທີ່ ຈຸດກວດກາຊິງຊັ່ງນ້ຳໜັກບໍລິສັດ ນ້ຳຕານມິດລາວຈຳກັດແຂວງສະຫວັນນະເຂດ, ກົມມາດຕະຖານ ແລະວັດແທກກະຊວງອຸດສາຫະກຳ ແລະການຄ້າ, ໄດ້ລົງກວດກາຊິງຊັ່ງນ້ຳໜັກປະຈຳປີ 2023-2024ຂອງບໍລິສັດນ້ຳຕານມິດລາວຈຳກັດ, ໂດຍການເຂົ້າຮ່ວມຂອງ ທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ, ທ່ານ ສະອາດ ປັນຍາດິດວົງ ຜູ້ອຳນວຍການດ້ານອ້ອຍບໍລິສັດນ້ຳຕານມິດລາວຈຳກັດ, ມີບັນດາການນຳຂອງເມືອງໄຊບູລີ, ພະນັກງານວິຊາການຈາກກົມມາດຕະຖານ ແລະວັດແທກ, ຂະແໜງການກ່ຽວຂ້ອງ, ພະນັກງານວິຊາການບໍລິສັດ ແລະອຳນາດການປົກຄອງບ້ານແກ້ງແຮດ, ຊາວສວນຜູ້ປູກອ້ອຍເຂົ້າຮ່ວມເປັນສັກຂີພິຍານ.

ທ່ານ ສະອາດ ປັນຍາດິບວົງ ກ່າວວ່າ: ການກວດກາຊິງຊັ່ງນ້ຳໜັກຂອງບໍລິສັດແມ່ນມີຂຶ້ນທຸກໆປີກ່ອນຈະມີການໜີບອ້ອຍໃນຕົ້ນເດືອນທັນວາ, ເພື່ອສ້າງຄວາມໝັ້ນໃຈໃຫ້ແກ່ຊາວສວນອ້ອຍທີ່ສະໜອງອ້ອຍໃຫ້ບໍລິສັດ ແລະ ເພື່ອສ້າງຄວາມຍຸຕິທຳ, ຈະແຈ້ງຕໍ່ຜູ້ຊື້-ຜູ້ຂາຍ ຊຶ່ງກົມມາດຕະຖານ ແລະວັດແທກກະຊວງອຸດສາຫະກຳ ແລະການຄ້າສົມທົບກັບພະນັກງານວິຊາການຂັ້ນແຂວງ ແລະເມືອງໄດ້ລົງມາກວດກາຊິງຊັ່ງນ້ຳໜັກຢູ່ແຕ່ລະຈຸດຂອງບໍລິສັດປີລະໜຶ່ງຄັ້ງ, ທັງນີ້ ກໍເພື່ອໃຫ້ປະຊາຊົນຊາວສວນອ້ອຍມີຄວາມໝັ້ນໃຈໃນການຕິດນໍ້າໜັກອ້ອຍສົ່ງໃຫ້ບໍລິສັດ. ທ່ານ ສະອາດ ປັນຍາດິບວົງ ຍັງແຈ້ງໃຫ້ ຮູ້ຕື່ມວ່າ: ສຳລັບການນຳລົດບັນທຸກອ້ອຍເຂົ້າຊິງຊັ່ງ, ລົດບັນທຸກອ້ອຍທຸກຄັນ ຕ້ອງປະຕິບັດຕາມລະບຽບຂອງໂຮງງານວາງອອກຢ່າງເຂັ້ມງວດ, ເປັນຕົ້ນຄວາມສູງຂອງການບັນທຸກ, ຄວາມປອດໄພໃນການບັນທຸກອ້ອຍ ແລະຄວາມປອດໄພເທິງທ້ອງຖະໜົນຫຼວງນຳອີກ.

ສຳລັບປີນີ້ ຄາດວ່າຈະມີອ້ອຍປ້ອນໂຮງງານ ປະມານ 550.000 ໂຕນ,ໃນນັ້ນອ້ອຍອິນຊີ ຫຼືອ້ອຍປອດສານເຄມີ 100.000 ໂຕນ ແລະອ້ອຍທົ່ວໄປ 450.000 ໂຕນ ຊຶ່ງທາງບໍລິສັດນ້ຳຕານມິດລາວຮັບຊື້ໃນລາຄາ 820.000 ກີບຕໍ່ໂຕນ (ສຳລັບອ້ອຍອິນຊີ) ແລະ ອ້ອຍທົ່ວໄປໃນລາຄາ 720.000 ກີບຕໍ່ໂຕນ,ຄາດວ່າໃນປີ 2024-2025 ຈະມີອ້ອຍສົ່ງໃຫ້ບໍລິສັດເພີ່ມຂຶ້ນ 8ແສນໂຕນ.

ທ່ານ ອ່ອນລຳພັນ ບົວສີແກ້ວໄດ້ມີຄຳເຫັນ ພ້ອມທັງກ່າວຍ້ອງຍໍຊົມເຊີຍ ຕໍ່ບໍລິສັດນ້ຳຕານມິດລາວ ທີ່ໄດ້ມີການສົ່ງເສີມພໍ່ແມ່ປະຊາຊົນ ຊາວເມືອງໄຊບູລີ ໃນການປູກອ້ອຍຢ່າງມີເຕັກນິກ ແລະໄດ້ຮັບຜົນດີ, ໃນແຕ່ລະປີເຫັນວ່າປະຊາຊົນມີຄວາມຕື່ນຕົວຫຼາຍສົມຄວນຫັນມາປູກອ້ອຍເພື່ອສົ່ງຂາຍໃຫ້ບໍລິສັດນ້ຳຕານມິດລາວ ເຮັດໃຫ້ຊີວິດການເປັນຢູ່ດີຂຶ້ນ, ນອກນັ້ນ ທາງບໍລິສັດນ້ຳຕານມິດລາວ ຍັງໄດ້ຊ່ວຍພັດທະນາທ້ອງຖິ່ນຊ່ວຍເມືອງຕື່ມອີກ.

ຈາກນັ້ນ, ກົມມາດຕະຖານ ແລະວັດແທກ ກໍໄດ້ທຳການກວດກາ ພ້ອມທັງກວດສອບຊິງຊັ່ງ ໃຫ້ມີຄວາມຊື່ຕົງ ໃນລະດັບມາດຕະຖານສາກົນ, ເພື່ອຄວາມໂປ່ງໃສ, ຍຸດຕິທຳ ຕໍ່ຜູ້ຊື້ ແລະຜູ້ຂາຍ.

ຂ່າວ-ພາບ: ສະຫວັນນະເຂດ